1 Aba lariñagun Wabureme lun Moisesi:

2 —Ariñagabéi katei le houn Ísüraelina: Furumiñeguarügü Ísüraelina o terencha le aganóuti Ísüraeli, anhein íchiga aban hádangiñe lirahüñü lun Moloku, lunti hachamuragun lílana fulasu dübü luagu darí lounwen. 3 Kóntürabadina wügüri ligía, ani nagidarubei hádangiñe líbirigu, ladüga lawiyedunu nisanduariun ani wíyedalei niri le sándubei lau lederegeruni liráü lun Moloku. 4 Ánhaña meberesen lílana fulasu lau katei le, lun masiadirún hamani wügüri ligía lun lounwen, 5 kóntürabadina luagu hau sun liduheñu, ábame nagidaruni hádangiñe líbirigu úara hama sun ha agadeirubaña úara luma ñüdün hagía lumoun Moloku. 6 Le álügüdahati hama garíaahatiña ani aba laribadun ladüga lafalaruniña, kóntürabadina luagu gürigia ligía, ábame nagidaruni hádangiñe líbirigu.

7 —Díreigua humá hungua nun le gumuti, sandu humá, lugundun au Aburemeibei le Hubungiute. 8 Adüga huméi le lubeibei nilurudun, gúnfuli huméi. Au Aburemeibei le anúadirubalün nungua.

9 —Furumiñeguarügü le íñaragutiña lagübürigu, lasiadirúba lun lounwen. Lugundun íñaragua laali lúguchi o lúguchu, ani ligíaba gadurun luagu lounwen guánarügü.

10 —Anhein adüga gürigia agabarahani tuma lúmari wügüri líledi, lasiadirúba lun lounwen dandu ligía kei würi to úmaboun ladüga agabarahani.

11 —Anhein arounra gürigia tuma lúmari lúguchi, ǘnabudagüda lumuti lúguchi guánarügü. Lasiadirúba lubeiti wügüri ligía lun lounwen tau sun würi to úmaboun larounra, hagíaba giñe gadurun luagu hóunwegun.

12 —Anhein arounra gürigia tuma lídiñu, hasiadirúba biángubei lun hóunwegun ani hagíaba gadurun luagu hóunwegun, lugundun aban iwiyei wéiriti lira.

13 —Le arounruti luma aban wügüri kei larounrun tuma aban würi, hasiadirúba biángubei lun hóunwegun ani hagíaba giñe gadurun luagu hóunwegun, lugundun adügaaña aban lanarime iwiyei.

14 —Anhein anüga aban wügüri aban würi lúmarime tau sun túguchu, ladügüña aban óunwenbu iwiyei, dandu ligía kei hagía, hagudúba wínwanñu. Ítara luba ua lan libe iwiyei le haganagua.

15 —Anhein agamarida aban wügüri aban animaalu, lasiadirúba lun lounwen, afarúame giñe animaalu tugía.

16 —Anhoun agamarida aban würi aban animaalu, dandu würi tuguya kei animaalu ligía, háfarawaguba hilagubei ani hagíaba giñe gadurun luagu hounwen guánarügü.

17 —Anhoun lagamarida aban wügüri aban würi to litu luéigiñe lúguchi o tuéigiñe lan lúguchu, háfarawaguba biángubei hagía hagibugiñe hapaisanun, lugundun nibusigarídünati lun lagamaridunu wügüri litu guánarügü, le adügüti lira, gasu lanügüni lidurun luougua.

18 —Anhein arounra aban wügüri tuma aban würi dan lauñoun lan tidaani, aba lagamaridunu, arufuda lumuti lísensen tidaani, ani ariha tumuti giñe, lunti lubeiti hasagarúniwa hádangiñe lumutuniña Bungiu.

19 —Magamarida humóun tíbugaña o tamulelua húguchu, ni litu húguchi, lugundun kéisigubeirügü badügüñein lan tuma biduhe, anhein hadüga, hanügübei hariban hawouguoun hagía biángubei.

20 —Le arounruti tuma lúmari liyaurite, ǘnabudagüda lumuti liyaurite guánarügü, hanügübei biángubei hagía hafigoun hawougua, ani hóunweguba madügawagunga.

21 —Le agidarutu lúmari líbiri luéi, ǘnabudagüda lumuti líbiri. Aban katei iyereehabúti lira, ani herederuba biángubei hagía marahüñüga.

22 —Adüga huméi le lubeibei nilurudun; gúnfuli huméi súngubei. Ítara luba machagarun lanün ageiraü le ñéinhinba lubéi nanügaün lun haganóun ñein luáriua. 23 Madüga huméi le hadügübei gürigia ha lúnbaña nachagaruniña higibugiñegiñe, adüga hamuti sun katei le, ligía lásiñarunbei nawanduniña. 24 Huguyaba laburiña hageira gürigia hagía, níchugubei ageiraü ligía hun, ageiraü le rísibei ani buidu ligía lun ábunaguni.

—Au Aburemeibei le Hubungiute, le anúadirubalün hádangiñe híbiri néchanigu. 25 Gasu giñeti amu lan hanügüniña animaalugu harumatiña hawéi ha wíyebaña, dunuru harumatiña hama wíyetiña. Mǘnabudaguagüda humá hungua hadüga animaalugu, dunuru hama animaalugu ha aduruuharügübaña múarugu ha uágubaña nariñaga luagu wiye hamá. 26 Huguya gasu sandu humá, lugundun sándutina, au le Aburemei. Anúadira naadün hawéi híbiri néchanigu lun nánigu humá.

27 —Wügüri o würi ha gawagutiña aban sífiri o gagaburi hamani aríaagüdüni, lachamurawaguba dübü hawagun lun hóunwegun ani hagíaba gadurun luagu hóunwegun.