1 —Danme lanügün aban gürigia aban idewesei le fulúaruauti lun Wabureme, gasu lanügün tubuidun-agei fulúaru ábame líchugun garaba luma kupali tuagu; 2 Lárigiñe ábame lanügünu houn lirahüñü Aarón, ha fádirigu, ábame lanügün aban hádangiñe murusun fulúaru lau agülei lau sun kupali, ábame lágudunu ligibuagu latarü keisi idewesei gudawarügüti lánina aritawaguni, le buiti líhemen lun Wabureme. 3 Lémeti ígiragubei lídangiñe idewesei, le sagüráutimabei lídangiñe idewesei le águdahoubei lun Wabureme, lánibei Aarón hama ladügawagun.

4 —Danme banügün aban idewesei le tauti fulúaru ásürahoutu lidan régigi, lunti durudia tan to tautu tubuidun-agei fulúaru to añoundawagutu lau garaba, gama lumoun lun magana tan lébini o furidasi tan to giñe maganatu lébini, to gawagutu garaba.

5 —Anhein fulúaru tubéi to ábugatu lidan afuridugülei bániboun idewesei, lunti tautu tan tubuidun-agei fulúaru, to añoundawagutu lau agülei ani to maganatu lébini; 6 ábame bagubachagunu, ábame babahichun garaba tuagun, lugundun idewesei tauti fulúaru lira.

7 —Anhein tautu lubéi fulúaru to ábugatu lidan sóudieru bidewese, lunti lautu lan tubuidun-agei fulúaru luma lau garaba. 8 Lárigiñeme aranse baali lan bidewese lau burí katei le, ábame banügünu ligibugiñoun Wabureme, bederegerounme lun fádiri, ábame lanügünu fádiri luagun latarü. 9 Ábame lanügün fádiri murusun tídangiñe idewesei lun lágudunu ligibuagu latarü keisi idewesei gudawarügüti le lánina aritaguagülei, le buiti líhemen lun Wabureme. 10 Lémeti erederuti lídangiñe idewesei, le sagüráubei lidan idewesei le agudúti lun Wabureme, lánibei Aarón hama ladügawagun.

11 —Míchiga humá lébini tidoun ni aban tídangiñe hidewese to fulúaruautu lun Wabureme. Lóugiñe lira, moun lumuti lagudún ni aban luwuyeri lébini ni sírudu keisi idewesei lun Wabureme. 12 Gayaraati hadagaragüdün lébini luma sírudu keisi idewesei lun Wabureme luagu furumiñeti alubahani, gama lumoun moun lumuti hadagaragüdüni luagu latarü keisi íhemeni buiti.

13 —Gasu bíchugun salu tidoun sun bidewese to tautu fulúaru, mígiraba lun lemegeirun salu le lisaluna lidaradun Bubungiute tidan bidewese le tauti fulúaru. Gasu gagana lan sun bidewese salu.

14 —Ánhabu anüga idewesei le fulúaruauti lun Wabureme, lídangiñe furumiñeti lin binadüri, gasu ilaü lan le funaali, le sarawarügüti lidan watu gemeti, luma ilaü le iseriti le hudúarügüti lídangiñe furumiñeti balubahan. 15 Gasu bíchugun garaba luma kupali ligibuagu idewesei lugundun idewesei lan le fulúaruauti. 16 Ábame lágudun fádiri murusun lídangiñe ilaü hudúarügüti luma garaba, úara luma sun kupali, ábame idewesei lan le aritaguagülei le agudúti lun Wabureme.