1 Aba lagúarun Wabureme lun Moisesi tídangiñe kianpu lánina óundaruni, aba lariñagun lun:

2 —Badimureha hama Ísüraelina bariñagame houn lun danme lan lanügün aban gürigia idewesei ha animaalugu nun, lunti hádangiñe lan lilügüniña lanüga.

3 —Anhein hádangiñeti lubéi libiñanigu animaalu le lunbei líchuguni kei adagaragüdüni gudawarügüti, lunti ábanbei lan bágasu wügüri le úati mégeiti luagu. Lun leresibirúniwa, gasu ladagaragüdüni ligibugiñe Wabureme, tubenari kianpu to lánina óundaruni, 4 ábame líchuguni lúhabu lábulugu animaalu ligía. Ítara luba leresibirúniwa animaalu ligía lun ferudunawa lan lifigoun. 5 Ábame ladürürüni lichügü bágasu ligía liñúarü Wabureme, lárigiñeme ábame hadagaragüdüni lirahüñü Aarón ha fádirigu lita bágasu, ábame habahichaguni latarü lau hitaü ligía, dandu lóugiñe kei geyegua lau latarü le tubenaribei kianpu to lánina óundaruni. 6 Le anügüti animaalu lun ladagaragüdüni, gasu lélechuni lura, ábame lañügürihani, 7 ábame háfuragun fádirigu watu ligibuagu latarü, ábame haranseraguni watu, 8 lun híchuguni lúgubu animaalu le añügürihóuaali ligibuagu lau sun lábulugu luma lagüle lisasa. 9 Le adügübalin adagaragüdüni gasu lachibuni lisasa luma liyada animaalu, ábameti láguduni fádiri sun le ligibuagu latarü keisi idewesei gudawarügüti le buiti líhemen lun Wabureme.

10 —Anhein hádangiñeti lubéi lilügüniña mudún, o gábara animaalu ligía, gasu ábanbei lan animaalu wügüri le úati mégeiti luagu, 11 ábame líbuguni ligiina luéigiñe nuru libiti latarü ligibugiñe Wabureme ábame habahichaguni fádirigu ha lirahüñü Aarón lita animaalu ligía lóugiñe latarü luma geyegua lau, 12 lárigiñe ábame lañügürihóun animaalu, ábame líchuguni fádiri ligibuagu watu gemeti le luágubei latarü, úara luma lábulugu animaalu ligía luma lagüle lisasa. 13 Leti adügübalin adagaragüdüni, ábame lachibuni lumegegu luma liyada animaalu lau duna, ábame láguduni fádiri sun le ligibuagu latarü keisi idewesei gudawarügüti le buiti líhemen lun Wabureme.

14 —Anhein aban lubéi dunuru adagarawagüdüboun lun Wabureme, gasu ábanboun lan wagugua, o aban lan tiraüraü unhun. 15 Ladagaragüdounme fádiri dunuru luagu latarü: Ábame láhulaaguni tichügü, ábame lágudunu dunuru ligibuagu latarü lárigiñe lasagaruni tita lóubagiñe latarü. 16 Ábame lagidaruni tigunregunren lau sun le lídanbei, ábame láguruni luagun oubaü le ñéingiñe lubéi laboucha weyu libiti latarü, lidoun lubara baligi; 17 lárigiñe ábame labouchagunu dunuru lidan biama ragüinalounme luéigiñe tarüna, gama lumoun mafanreinragungaloun, lárigiñeme ábame lágudunu ligibuagu líleme latarü keisi idewesei gudawarügüti, le buiti líhemen lun Wabureme.