1 Aba lariñagun Wabureme lun Moisesi luma lun Aarón:

2 —Ariñaga huméi katei le houn Ísüraelina: Anhein gasandi aban wügüri ésedügüni tídangiñe tin lura, wíyebei. 3 Wíyebei wügüri ligía ladüga lisandi, dandu anhein éseha lubéi kéisirügü anhein mésehan lubéi, ladügameme sandi ligía. Lau sun luwuyeri wíyeti.

4 —Furumiñeguarügü fulasu le ñein lumuti larounra wügüri ligía anhein áwiyura lisandi ñein, lanügǘba fulasu ligía keisi wíyeti.

—Furumiñeguarügü katei le uáguti lañuura, lanügǘba giñe keisi wíyeti.

5 —Furumiñeguarügü le aguuruti fulasu le ñein lubéi larounra sánditi ligía, gasu lachibunu ladaüragun chibagua ligíame lungua lau duna, ábame lanügǘn keisi wíyeti dagá lumoun laguñeedun.

6 —Furumiñeguarügü le añuuruti le ñein lubéi lañuura sánditi ligía, gasu lachibunu ladaüragun chibagua ligíame lungua lau duna, ábame lanügǘn keisi wíyeti dagá lumoun laguñeedun.

7 —Le aguuruti luagu sánditi ligía, gasu lachibunu ladaüragun, chibagua ligíame lungua lau duna, ábame lanügǘn keisi wíyeti dagá lumoun laguñeedun.

8 —Anhein ásuera aban gürigia le gasanditi ésedügüni luagun aban gürigia le masanditi, gasu lachibunu gürigia le uágunbei lásuerua ladaüragun, chibagua ligíame lungua lau duna, ábame lerederun wíyeñu dagá lumoun laguñeedun.

9 —Furumiñeguarügü lisadilin gabayu le layusurun gürigia gasanditi ésedügüni, lanügǘba keisi wíyeti.

10 —Le aguuruti furumiñeguarügü katei le uáguti lañuura le gasandibei ésedügüni, lerederuba wíyeñu dagá lumoun laguñeedun.

—Le anügüti aban lídangiñe katei le, gasu lachibunu ladaüragun, chibagua ligíame lungua lau duna, ábame lerederun wíyeñu dagá lumoun laguñeedun.

11 —Le uáguti laguura gawaguti ésedügüni machibungalei lúhabu, gasu lachibunu ladaüragun chibagua ligíame lungua lau duna, ábame lerederun wíyeñu darí lumoun laguñeedun.

12 —Gasu labouchawagun sóudieru lauti múa le uáguti laguura le gasanditi ésedügüni, umegeni le lauti wewe, gasu lachibúniwa.

13 —Anhein areidagua gürigia ligía lídangiñe lisandi, gasu labahüdün sedü weyu lun larumadun; ábame lachibunu ladaüragun chibagua ligíame lungua lidan lísensen duna, ábameti larumadun. 14 Luágume liwidün weyu ábame lanügün bián wagugua o bián lan harahüñü unhun ábame lidin ederegeraña lun fádiri tubenari kianpu lánina óundaruni ligibugiñe Wabureme. 15 Ábame ledewehan fádiri aban keisi adagaragüdüni luagu figóu, to aban keisi adagaragüdüni gudawarügüti, ítara luba ladügǘn larumadun gürigia le sándibei ligibugiñe Wabureme.

16 —Danme lígiragüdün aban wügüri laugua, lunti lachibuni sun lúgubu lau duna, ábame lerederun wíyeñu dagá lumoun laguñeedun.

17 —Furumiñeguarügü daüguaü odi gueru le uágunti ladagara lídangiñe lígiragüdün, gasu lachibúniwa lau duna, ábame lerederun wíyeñu dagá lumoun laguñeedun.

18 —Anhein agamarida aban wügüri aban würi, gasu hachibagun biángubei hagía houngua lau duna, ábame herederun wíyeñu dagá lumoun laguñeedun.

19 —Danme lauñoun lan tidaani aban würi tanügǘba keisi wíyetu luagu sedü weyu.

—Furumiñeguarügü le aguuruti tuagu, lerederuba wíyeñu darí lumoun laguñeedun.

20 —Furumiñeguarügü katei le uáguti tarounra dan le lauñoun lan tidaani, lanügǘba keisi wíyeti.

21 —Le aguuruti luagu fulasu le ñein lubéi tarounra gasu lachibunu ladaüragun chibagua ligíame lungua lau duna, ábame lerederun wíyeñu darí lumoun laguñeedun.

22 —Le aguuruti luagu somu katei le uáguti tañuura, gasu lachibunu ladaüragun chibagua ligíame lungua, ábame lerederun wíyeñu darí lumoun laguñeedun. 23 Gayaraati fulasu lan le ñein lubéi tarounra o le lan ñein lubéi tañuura laguura, lerederuba wíyeñu darí lumoun laguñeedun.

24 —Anhoun lagamarida aban wügüri, gafanranbei lidan tiwiye, lerederubati wíyeñu luagu sedü weyu, kéisirügü giñe fulasu le ñein lumuti larounra.

25 —Anhein éseha hitaü tídangiñe aban würi dan le mámañoun lan lau tidaani, lun ladurarun lésehan hitaü ligía saragu dan tuagu, o anhein lan anüga tidaani saragu dan tuagu, tanügǘba keisi wíyetu sun anihagua lan lésehan hitaü tuagu kéigubeirügü hamuga lauñoun lan tidaani.

26 —Furumiñeguarügü fulasu le ñein lumuti tarumuga luma furumiñeguarügü katei le uáguti tañuura sun anihán lan lésehan hitaü tuagu, lanügǘba keisi wíyeti, kéigubeirügü hamuga lauñoun lan tidaani.

27 —Le aguuruti luagu burí katei le, lanügǘba kei wíyeti. Gasu lachibunu ladaüragun, chibagua ligíame lungua, ábame lerederun wíyeñu darí lumoun laguñeedun.

28 —Danme lerederagun lésehan hitaü tuéi, ábame tabahüdün sedü weyu, lárigiñeme ábame tarumadun. 29 Luágume liwidün weyu ábame tanügün bián wagugua o bián lan harahüñü unhun lun fádiri tubenarin kianpu lánina óundaruni. 30 Ábame ladagaragüdün fádiri aban hádangiñe keisi adagaragüdüni luagu figóu, aban keisi adagaragüdüni gudawarügüti. Ítara luba ladügün fádiri lun tarumadun würi to gawaguboun lésehan hitaü ligibugiñe Wabureme, 31 ítara luba giñe hadisedagüdüniña Ísüraelina luéi hawiye, lun móunwegun hamá lau hadaseiruni fulasu le ñein lubéi naganawa haganagua.

32 Ligía burí arufudahanibei habügürü ha gasandibaña lésehan hitaü, hama ha gasandibaña ésedügüni aba herederun wíyeñu ladüga katei ligía, 33 luma habügürü würiña dan le láuñanu lan hadaani, lidan aban dimurei, sun ha gasanditiña lésehan katei hádangiñe, dandu wügüriña kei würiña, hama giñe wügüriña ha agamaridutiña würiña dan le lauñanu lan tidaani.