1 Aba lariñagun Wabureme lun Moisesi:

2 —Ariñagabá houn Ísüraelina lun hanügün garaba lauti oliwu bun, lun durungu luba lan lanpu súnwandan. 3 Aaronba ariha lau lun durungu luba lan sun áriebu nigibugiñe tidan kianpu lánina óundaruni, bóugudi tuéi belu to tubaduboun lubagüsina daradu. Laduraruba lúrudu le lun sun dan, lásügürüba hámagiñe agübürigu hamoun isaanigu. 4 Laranserubei burí lanpu lidan lebu sanudelu lauti golu lun ladurangun liñúarü Bungiu.

5 —Barüba tídangiñe tubuidun-agei fulúaru ábame básürün duusu fein to nefu líburu dimí tihürü kada aban, 6 bíchigounme luagu dábula lauti golu le nigibugiñebei lidan bián fíleiti, sisi fein lidan kada fíleiti. 7 Bíchigame kupali lidan kada fíleiti lun leseriwidun tun fein keisi idewesei aritawaguagülei le gudawarügüti lun luéirigun liri Aburemei. 8 Gasu ladagarun le nigibugiñe súnwandan sagü luéyuri emeraaguni, keisi aban daradu magumuchaditi luéigiñe hóubadina Ísüraelina. 9 Ligía le yuubei súnwandan lun Aarón hama ladügawagun ha lúnbaña héiginu fein tuguya lidan aban fulasu sánduti, ladüga aban lan lídangiñe idewesei le sagüráutimabei le águdahoubei nun, au le Aburemei le Hubungiute.

10,11 Hadan Ísüraelina ñeinñein meha aban wügüri tiráü aban würi Ísüraelina lau aban Ehiptuna. Selomítü tíribei lúguchu, liráü Dibürí, hádangiñe lani Dan türibu. Aba lasigenehan wügüri ligía luma aban Ísüraelina tidan kianpu-agei, lidan asigenehani ligía aba lanabaguni tiráü würi Ísüraelina ligía liri Wabureme íñaragualei. Ábati hanügüni lumoun Moisesi, 12 aba hóunigiruni sun aniha lan Wabureme ariñagei houn kaba lan hadüga. 13 Ábati ladimurehan Wabureme lun Moisesi, lariñaga lun:

14 —Sagabei wügüri le íñaragubalina tídangiñe kianpu-agei, ru haméi sun ha aganbubalin háhabu lábulugu, ábame hachamuragun sun lílana fulasu dübü luagu darí lounwen. 15,16 Ánheinti houn Ísüraelina, ariñagabá houn: Le anabaguti ani íñaragualei liri Wabureme le Wabungiute, gasu lanügüni lifigoun luougua ábame hachamuragun lílana fulasu dübü luagu lun lounwen. Dandu anhein terencha lubéi lumoun mama lan terencha, anhein lanabagua liri Wabureme, lasiadirúba lun lounwen.

17 —Le agidaruti libagari aban gürigia, lasiadirúba lun lounwen.

18 —Le áfaruti aban animaalu le lilügün amu gürigia, gasu líchugun leweñegua: Animaalu luagu animaalu.

19 —Le adügüti damichi lun aban hádangiñe líbirigu, gasu lasufuriruni libeméme damichi le ladügübei: 20 Luguguati luagu luguguati, aguu luagu aguu, ari luagu ari, gasu lasandiruni lidan lǘgürügü guánarügü damichimeme le ladügübei lun amu.

21 —Le áfaruti aban animaalu, gasu líchugun leweñegua. Le áfaruti aban gürigia, lasiadirúba lun lounwen.

22 —Ligiaméme lúrudubei dandu houn terencha kei houn ha mama terencha. Au Aburemeibei le Hubungiute.

23 Ábati ladimurehan Moisesi hama Ísüraelina, aba hasagaruni le buga íñaragubalin Bungiu kianpu-ágeirugu, aba hachamuragun dübü luagu, aba lounwen. Kei lariñaguni Bungiu lun Moisesi, ítara liña hadügüni Ísüraelina.