1 Aba lariñagun Wabureme lun Moisesi luma lun Aarón:

2 —Anhein anihein lubéi lúluguti o dáseiti luagu lura aban gürigia o guméi lan le lenege lépüra gasu lanügǘn gürigia ligía lun fádiri Aarón o lun lan aban hádangiñe fádirigu ha ladügawagun Aarón. 3 Ábame larihini fádiri guméi le luágubei lura gürigia ligía, anhein haruhali lubéi ídiburi le lídanbei guméi ligía, ani hulilitimati guméi ligía luéi uraü, gumeigubeiñein lánina lépüra lira, lárigiñemeti larihini fádiri gürigia ligía ítara, lunti líchuguni keisi wíyeti.

4 —Anhein haruti lubéi dáseiti le luágubei lura gürigia ligía, gama lumoun mahulilinti sügǘ lau uraü, ni ídiburi máharudungili, lunti ladaürüni fádiri gürigia ligía luagu sedü weyu. 5 Ábayame larihini fádiri luagu lisedün weyu, ánheinti ítaragili lubéi guméi ligía, maweiridagúngili, ábayame ladaürüni fádiri gürigia ligía luagu ábanya sedü weyu. 6 Luágume lisedün weyu ábayame larihini fádiri, ánheinti agumuchagueina liña lubéi guméi, ani maweiridagúnti luagu lura gürigia ligía, ábame líchuguni fádiri sánditi ligía keisi harumati, lugundun hiti lan le luágubei lura. Ábameti lachibunu sánditi ligía ladaüragun, ábame lerederun harumañu.

7 —Gama lumoun anhein aweiridagua hiti ligía luagu lura sánditi lárigiñe ru laali lan buga fádiri keisi harumati, gásuya lidin lumoun fádiri lun larihini. 8 Ánheinti ariha fádiri luagu wéirigua lan hiti ligía luagu sun lura gürigia ligía, ábameti líchuguni fádiri keisi wíyeti, lugundun anihein lépüra luagu.

9 —Danme anihein lan lugumeina lépüra luagu aban gürigia, lunti lanügǘn gürigia ligía lun fádiri. 10 Ábame larihini fádiri, ánheinti harú lubéi ilu le luágubei lura, ani harugüdalei lídiburi; ani arihúati lǘgürügü luagu luti ligía, 11 lépüragubeiñein le luágubei. Gasu líchuguni fádiri gürigia ligía keisi wíyeti, ani memegeirúnhalime ladaürüni ladüga rúaali keisi wíyeti.

12 —Anhein anüga lépüra fulasu lau lufuresen darí lun lanügüni sun lura le gawagubalin lúmagiñe lugudi lumoun lábulugu dagá le ñein lumuti gayara lan larihin fádiri, 13 lunti larihini fádiri; ánheinti barǘ laali lubéi lépüra sun lura, ábame líchuguni fádiri keisi harumati, ladüga haruhali lépüra le luágubei, ani rédeihali harumañu. 14 Gama lumoun wéyume lagumeidun lura darí lun larihíniwa ǘgürügü nibagariti luagu, lerederuba wíyeñu. 15 Ábameti larihini fádiri ǘgürügü wínwangili ligía, ábame líchuguni sánditi ligía keisi wíyeti, lugundun wíyeeli ligía ǘgürügü wínwangili: Lépüra luágubei.

16 —Ánheinya áharuda ǘgürügü le nibagariti ligía, gasu lidin sánditi lumoun fádiri 17 lun larihini. Ánheinti ariha fádiri luagu haruha lan guméi ligía, ábame líchuguni sánditi ligía keisi harumati, ladüga rédeiha harumañu.

18 —Anhein adagara guméi luagu lura aban gürigia, aba lareidagun, 19 ani aba lerederun aban luti haruti, o aban lan dáseiti haruti funayumati, gasu lidin lumoun fádiri. 20 Anhein ariha fádiri luagu hulilitima lan sügǘ lau líbiri lura gürigia ligía, ani haruha lan giñe lídiburi, ábame líchuguni gürigia ligía keisi wíyeti, lugundun lugumeina lépüra luágubei. 21 Anhein ariha luagu ua lan ídiburi haruti luagu guméi ligía ani mahulilin ligía luéi líbiri lura gürigia ligía, lubaragiñe lira agumuchagueina liña, ábame ladaürüni fádiri gürigia ligía luagu sedü weyu. 22 Ánheinti aweiridagueina liña lubéi sandi ligía luagu lura gürigia ligía, ábame líchuguni fádiri gürigia ligía keisi wíyeti, ladüga anihein guméi lánina lépüra luagu. 23 Gama lumoun anhein maweiridagun, ladügame lárigirugu lan guméi le luágubei gürigia ligía, ábameti líchuguni fádiri keisi harumati.

24 —Anhein anihein lubéi aban churati luagu lura aban gürigia, ani luagu ǘgürügü le nibagariti o lárigiñe achuraruni anihein aban dáseiti harufati ani funayumati o haruti, 25 lunti larihini fádiri. Anhein haruhali lubéi ídiburi le luágubei dáseiti ligía ani hulilitimati dáseiti ligía luéi líbiri uraü, lépüra asaliragubei lárigi churati ligía, ábameti líchuguni fádiri keisi wíyeti ladüga anihein lan lépüra luagu. 26 Anhein ariha fádiri luagu ua lan ni aban ídiburi haruti luagu dáseiti ligía, mahulilin ligía sügǘ lau le líbiri uraü, lubaragiñe lira aba agumuchagueina lan, lunti ladaürüni fádiri gürigia ligía luagu sedü weyu. 27 Luagu lisedün weyu ábame larihini fádiri, anhein wéirigua lubéi dáseiti ligía, ábame líchuguni gürigia ligía keisi wíyeti, lugundun anihein lugumeina lépüra luagu. 28 Gama lumoun anhein maweiridagun dáseiti ligía, ani agumuchagueina ligía, mama ni kata luéidigia láludun churati, ábameti líchuguni fádiri gürigia ligía keisi harumati, lugundun lárigirugu lan churati luágubei.

29 —Danme anihein lan guméi lábulugu aban gürigia o luagu lan láribugu, 30 lunti larihini fádiri guméi ligía, anhein hulili lubéi guméi ligía luéi uraü ani anihein ídiburi míbeti le dumariyumati larihín luagu, lunti líchuguni fádiri gürigia ligía keisi wíyeti, lugundun anihein tiña luagu o lépüra luáguti ichügü o áribugu. 31 Anhein ariha fádiri luagu mahulilin lan guméi ligía luéi uraü, ua ligía ídiburi wuriti luagu, ábame ladaürüni gürigia ligía luagu sedü weyu. 32 Luágume lisedün weyu ábame larihini fádiri guméi, anhein maweiridagúngili lubéi tiña, mahulilin ligía luéi le líbiri uraü, ua ligía ídiburi dumariyumati larihín luagu, 33 ábame líchugun fádiri dimurei lun lásaragun gürigia le gawagubei tiña ígira fulasu le sándibei másaragunga, ábameti ladaürüni luáguya sedü weyu. 34 Lárigiñeme sedü weyu ligía, ábayame larihini fádiri guméi, ánheinti maweiridagun lubéi tiña, mahulilin ligía luéi uraü, ábame líchuguni fádiri gürigia ligía keisi harumati, ábame lachibunu gürigia ligía ladaüragun ábame lerederun harumañu. 35 Gama lumoun anhein aweiridagua tiña lárigiñe rúaali lan gürigia ligía keisi harumati, 36 lunti larihiniya fádiri gürigia ligía, anhein wéiriguaali lubéi tiña, memegeirúnhalime láluahani ídiburi dumariyumati larihín, wíyeti gürigia ligía. 37 Gama lumoun anhein genege lubéi lun luagu rédeigua lan tiña ligía, ani salihali ídiburi wuriti, areidaguarügü liña tiña, ani harumati gürigia le buga laubei. Ábameti líchuguni fádiri gürigia ligía keisi harumati.

38 —Anhein anihein lubéi dáseiti luagu lura aban gürigia, 39 lunti larihini fádiri uraü ligía, anhein ariha dáseiti haruyumati o wuriyumati luagu, mama aban katei wéiriti luágubei uraü ligía, ítarati, harumati gürigia ligía.

40 —Anhein áhula lídiburi aban gürigia aba lerederun mádiburiga, harumati gürigia ligía. 41 Anhein áhula lídiburi ligibugiñe aba léheluchun lerebe, harumati giñe. 42 Gama lumoun anhein asaliragua aban guméi haruti funayumati luagu oubaü le helubei luagu, lanagangiñe yebe lábulugu o lereberugugiñe lan, lasaliraguñarügü liña lépüra luagu. 43 Ábameti larihini fádiri, anhein funayuma lubéi luti lánina guméi le luágubei kei larihín lépüra luagu uraü, 44 anihein lépüra luagu gürigia ligía, ladüga anihein guméi lábulugu. Ani ítara luba líchuguni fádiri keisi aban wügüri wíyeti.

45 —Le gawaguti lugumeina lépüra, gasu tau lan daüguaü huchecheeru, madaüga lichügü luma darugu lau ligibu, ábame lagúarahan ariñageina: Wíyetina! Wíyetina! 46 Ani sun aniha lan guméi luagu, lanügǘba keisi wíyeti, gasu laganóun lábugua, bóugudi tuéi kianpu-agei.

47 —Ánheinti asaliragua aban dáseiti tuagu aban daüguaü to lautu linu o to lan tautu lana, 48 o tuagu lan aban hüchaguaü to tautu lana o tautu linu o luagu lan gueru, o luagu lan furumiñeguarügü katei lauti gueru, 49 anhein funayuma lubéi dáseiti ligía o wurigili lan, lidaseitin lépüra dáseiti ligía ani gasu larufudúniwa lun fádiri. 50 Ábame larihini fádiri dáseiti ligía, ábame ladireiruni katei le gawagubalin lidoun amu fulasu luagu sedü weyu. 51 Luágume lisedün weyu, ábame larihini dáseiti ligía, anhein wéiriguaali lubéi tuagu gamisa o luagu lan gueru o katei lauti gueru, lidaseitina lépüra le wuribatimati, ani wíyeti burí katei le gawagubalin. 52 Furumiñeguarügü lubeiti katei le gawaguti dáseiti ligía, gasu lagudúniwa sunsuinagubei lugundun lépüra le wuribatimati luágubei, 53 gama lumoun anhein lariha fádiri, aba larihin luagu maweiridagúngili lan dáseiti, 54 ábame lariñagun lun lachibúniwa dáseiti, ábame ladireirúniwa katei le gawagubalin luagu sédüya weyu.

55 —Lárigiñeme lachibúniwa dáseiti ligía, ábame larihini fádiri. Anhein ariha luagu magumuchagungili lan, wíyeti dáseiti ligía, ani gasu lagudúniwa katei le gawagubalin íbini anhein maweiridagúngili lubéi dáseiti ligía, lugundun agahüdaguni lira, múnadagiñe lan yebe o bóugudigiñe lan. 56 Anhein ariha fádiri luagu gumugua lan dáseiti ligía lárigiñe lachibúniwa, ábame laheiriduni tuéigiñe daüguaü, gueru o gamisa. 57 Gama lumoun ánheinya asaliragua, aba laweiridagun tuagu dúnigu tuguya o katei le gawagubalin, ábame lagudúniwa katei ligía. 58 Ánheinti katei le uéigiñebei lagumuchagua dáseiti dan le lachibúniwa, ábayame lachibúniwa ábanya wéiyaasu, ábame lerederun harumañu.

59 Anihán burí arufudahanibei luáguti lidaseitin lépüra tuagu daüguaü linu o lana o tuagu gamisa o luagu burí katei lauti gueru, lun gayaraabei lan lichugúniwa keisi katei harumati o keisi katei wíyeti.