1 Lidan libiaman irumu lúmagiñe háfuridun Ísüraelina Ehiptugiñe, weyu furumiñe lidan libiaman hati, aba ladimurehan Wabureme lun Moisesi lidan fulasu mageirawati le gíribei Sinaí, tidan kianpu lánina óundaruni luma Wabungiute, lariñaga lun:

2 —Abahüdǘwa hamá sun Ísüraelina, hawagu hani türibu luma luagu iduheñuguaü, lun lasubudirúniwa hiri ani lun larihín átiriñanu lan wügüriña 3 ha weinti irumu hau lun iñun, ha gayaraahali houdin awuribuha. Abürüha humaña kei habürühóuniwa milidaru, lau lídehan Aarón 4 luma aban hábuti iduheñu luagu kada türibu. 5 Anihán burí hiri ábutigu ha lúnbaña híderagunün:

—Lídangiñe lani Rubén türibu: Elisúru le liráü Sedeuru.

6 —Lídangiñe lani Simeón türibu: Selumiéli, le liráü Surisadái.

7 —Lídangiñe lani Hudá türibu: Naasón, le liráü Aminadábü.

8 —Lídangiñe lani Isakárü türibu: Natanaéli, le liráü Suarü.

9 —Lídangiñe lani Sabulón türibu: Eliabü, le liráü Elón.

10 —Lídangiñe hani lirahüñü Hosé türibu: Elisamá, le liráü Amiudu, lídangiñe lani Éfürain türibu; luma Gamalieli, le liráü Pedasúru, lídangiñe lani Manasési türibu.

11 —Lídangiñe lani Benhamín türibu: Abidán, le liráü Gidoní.

12 —Lídangiñe lani Dan türibu: Aieserü, le liráü Amisadái.

13 —Lídangiñe lani Aserü türibu: Pagieli, le liráü Okürán.

14 —Lídangiñe lani Gadü türibu: Eliasáfü, le liráü Reueli.

15 —Lídangiñe lani Nefütalí türibu: Airá, le liráü Enán.

16 Hagía burí hábutibaña türibugu ha anúadirubaña hadan Ísüraelina lun hagíaba lan ararama habá habá hani türibu. 17,18 Weyu furumiñe lidan libiaman hati lidan irumu ligía, aba lóundaruniña Moisesi luma Aarón wügüriña ha líridubaña Bungiu, hama sun lílana fulasu, aba habahüdüniña sun Ísüraelina, abürüheina haméi hani türibu, haduheñu, liri kada aban luma átiriñanu lan wügüriña ha weinti irumu hau lun iñun hadan súngubei, 19 ítara kei lariñaguni Wabureme lun Moisesi. Lidan fulasu mageirawati le gíribei Sinaí ladügǘwa abahüdǘni le.

20,21 Dan lásurunbei habahüdǘn gürigia luagu hani türibu, luma luagu iduheñuguaü, bürüwa ligía liri kada aban luma átiriñanu lan wügüriña ha lóugiñebaña wein irumu, ítara liña herederun: Hádangiñe lani Rubén türibu, le liráü Ísüraeli le íbugañaü, abahüdǘwatiña bián-wein-sisi-milu-seingü-san wügüriña ha gayaraahali houdin awuribuha.

22,23 Dimí-san-nefu-milu-ǘrüwa-san abahüdǘtiña lídangiñe lani Simeón türibu.

24,25 Bián-wein-seingü-milu-sisi-san-dimí lídangiñe lani Gadü türibu.

26,27 Ǘrüwa-wein-katorusu-milu-sisi-san lídangiñe lani Hudá türibu.

28,29 Dimí-san-gádürü-milu-gádürü-san lídangiñe lani Isakárü türibu.

30,31 Dimí-san-sedü-milu-gádürü-san lídangiñe lani Sabulón türibu.

32-35 Hádangiñe ladügawagun Hosé abahüdǘwatiña bián-wein-milu-seingü-san lídangiñe lani Éfürain türibu, darandi-bián-milu-bián-san lídangiñe lani Manasési türibu.

36,37 Lídangiñe lani Benhamín türibu abahüdǘwatiña darandi-seingü-milu-gádürü-san.

38,39 Ǘrüwa-wein-bián-milu-sedü-san lídangiñe lani Dan türibu.

40,41 Bián-wein-aban-milu-seingü-san lídangiñe lani Aserü türibu.

42,43 Dimí-san-ǘrüwa-milu-gádürü-san lídangiñe lani Nefütalí türibu.

44 Hadan sun gürigia Ísüraelina ha labahüdübaña Moisesi, Aarón hama duusu ábutigu Ísüraelina ha hábutigubaña hani türibu hama haduheñu: 45,46 Sisi-sánñanu-ǘrüwa-milu-seingü-san-dimí Ísüraelina ha weinti irumu hau lun iñun ha gayaraahali houdin awuribuha.

47 Mabahüdǘntiña Lewitagu hadan hatüribun hagüchagu, 48 ladüga ariñagaali lan buga Wabureme lun Moisesi:

49 —Danme babahüdüniña Ísüraelina, mabahüdabei lani Lewí türibu hadan. 50 Lunti bíchuguniña Lewitagu lun heseriwidun tidan sanduariu to lánina daradu, lun harihin lau umegeni luma sun le yuubei tun sanduariu. Hagíaba anaahoun sanduariu luma tumegegu, hadügübei giñe eseriwiduni ñein. Lunti giñe geyeguba lan tau sanduariu hararamagüdoun hakianpun-agei, 51 ani danme lunti lan tanügǘn lidoun amu fulasu, hagíaba aragachaguoun ráramagüda hamounme tárigoun dánmeya lunti lan hararamagun lidan somu fulasu. Furumiñeguarügü gürigia le ayarafaduti tun sanduariu bóugudin hawéi Lewitagu, lasiadirúba lun lounwen. 52 Ha híbiri Ísüraelina hesetiraguame houngua kei milidaru, kada aban tidan likianpun-agei, lábugiñe lufanidiran. 53 Ha Lewitagu, herederuba geyegua tau lisanduariuna daradu lun hóunigirunu luéi lagañidun Wabureme houn Ísüraelina.

54 Aba hadügüni Ísüraelina sun katei ítara kei lariñaguni Wabureme lun Moisesi.