1 Dan laganbunbei urúei Kananna le uburuguna Aradü, le aganóubei Négebü luagu añate lan Ísüraelina luéigiñe üma Atarímü, aba láfuridun ageindagua hama, aba lárügüdün fiu hádangiñe. 2 Ábati füramase hamá Ísüraelina lun Wabureme luagu ánhaña lan líderagua agañeirei ageiraü ligía, luagu hagünrinchagubei lan sun luburugute sunsuinagubei. 3 Aba líchuguni Wabureme le hamuriahabei Ísüraelina luma houn, aba líderaguniña áfaraguaña Kananna, aba hagünrinchaguniña Ísüraelina Kananna sunsuinagubei, lau sun burí haburugute, ligía híchugunbei Orumá* lírime fulasu ligía.

4 Aba háfuridun Ísüraelina lídangiñe wübü Oru, luéigiñe üma luagun Barana Funati, geyegueina hagía luéi hásügürün lumúanrugugiñe Edomu. Aba heferidiruni Ísüraelina haguraasun luagu héibugun, 5 aba hagumeserun adimureha wuriba luagu Wabungiute luma luagu Moisesi. Hariñaga:

—Kame san hasagarawa Ehiptugiñe? Lun san wóunwegun lidan fulasu mageirawati? Maniñetiwa duna, meigin wagía. Buchá wawagu lubá lagübüri éigini le!

6 Aba lóunahan Wabureme hewe péisinitiña hawagun lun hágüraguniña, aba hóunwegun saragu Ísüraelina. 7 Ábati houdin lumoun Moisesi, aba hariñagun lun:

—Afigouhaadiwa lau wadimurehan wuriba luagu Wabureme luma buagu! Bamuriaha luma Wabureme lun lagidaruniña hewe ha wawéi.

Aba lamuriahan Moisesi luma Wabureme lun feruduna lániña Ísüraelina, 8 aba lariñagun Wabureme lun:

—Adügabá aban hewe kei ha, ábame bíchugunu luagu aban lebu fanidira. Danme tágürün hewe aban gürigia, lunti larihin tuagun hewe to luáguboun lebu fanidira, ábame lasalbarun.

9 Aba ladügün Moisesi aban hewe lautu buronse, aba líchugunu luagu aban lebu fanidira, dántiha le tágürün hewe aban gürigia, ábaha larihin tuagun hewe lautu buronse, aba lasalbarun.

10 Aba hasigiruni Ísüraelina haweiyasun, aba herederagun Obotu. 11 Hígiragüda Obotugiñe herederagua Abarímü, lidan fulasu mageirawati, luéigiñe oubaü le ñéingiñe lubéi laboucha weyu libiti lumúan Moabü. 12 Hígiragüda ñéingiñe, aba herederagun Séredü. 13 Ñéingiñe hígiragüda, herederagua loubafurugu duna Arünón. Duna le, lídanñein fulasu mageirawati le agumeserubei lúmagiñe hamúanrugugiñe Amoruna, ligía láfadaragunbei lumúan Moabü luma hamúan Amoruna. 14 Ligía ariñawagúbei tidan líburu to lani luwuribun Wabureme:

«Sügütiwa Waebügiñe, lóubawagu Sufá,

luéigiñe burí lirahüñü duna luma luéigiñe Arünón,

15 luma lárurugugiñe burí lirahüñü duna

le achülürübei darí lóubawagu Arü,

chülǘ lumoun láfadaragun Moabü».

16 Aba hasigirun luéigiñe duna Arünón darí Beerü. Ñeinñein fusu le ñein lubéi lariñaga Wabureme lun Moisesi:

—Óundaraguabaña gürigia, ru náamuga duna houn.

17 Ligía dan ligía heremuhan Ísüraelina, hariñaga:

«Iñuraguagüdabéi bidunari, fusu!

Heremuha lun fusu!

18 Hachigin ábutigu lau hawewen le hagumadigüle,

hadaarun wéirigutiña fulasurugu lau habadun!»

Aba hasigirun Ísüraelina lídangiñe fulasu mageirawati darí Mataná; 19 Matanágiñe lun Naalielin, Naalieligiñe lun Bamotün, 20 Bamotügiñe lun luagun fulasu wayati le lumúanrugubei Moabü, iñun libiti Pisügá, le ñéingiñe lubéi larihúa fulasu mageirawati.

21 Aba hóunahan Ísüraelina fiu wügüriña ariñaga lun Sihón le harúeite Amoruna:

22 —Busentiwa hamuga wásügürün bumúanrugugiñe. Mebelubadiwa lidoun ichari le bunawaguaalibei, ni le ñein tumuti beibei-agei, matun wagíame duna lídangiñe bifusun, wánhiñuragubei bumúan luéigiñe üma le ñéingiñe lubéi leibugúa.

23 Gama lumoun máhati Sihón lun hásügürün Ísüraelina lumúanrugugiñe, aba lóundaruniña sun lumutuniña, aba láfuridun habaroun Ísüraelina lidan fulasu mageirawati, dan hachülürünbei Haasü aba lábürühan hawagun. 24 Gama lumoun aba hageindagun Ísüraelina luma aba hagañeiruni wuribu, aba hárügüdüni hamúan lúmagiñe duna Arünón darí lumoun duna Haboku, lememe fadaguaü luma hamúan Amonna, le baríeiruabei lau dübü. 25 Aba lubeiti hárügüdüni Ísüraelina sun haburugute Amoruna ligía, lememe Esübón lau sun burí fulasu le lani, aba herederun aganawa ñein. 26 Esübón, ligía bugaha uburugu le ñein lubéi laganawa Sihón le harúeite Amoruna. Lageindaguañahañati Sihón luma binadu lurúeite Moabü, aba lagidaruni sun fulasu ligía luéi darí lumoun duna Arünón. 27 Ligía hariñagunbei poetagu:

«Higougu lun Esübón,

uburugu le ñéingiñe lubéi lagumadiha urúei Sihón!

Bunaguaya huméi, héregüdaya huméi!

28 Lúmagiñe Esübóngiñe, le luburugute Sihón,

furiti watu lídangiñe aban gudáü,

le agünrinchagubalin Arü le lani Moabü

luma burí fulasu íñuti le lani Arünón.

29 Fugiabu buguya, Moabü!

Féridihadibu, buguya le lánigu bungiu le Kemosu!

Ígira laaña buwügüriñanigu lun hanurahan,

luma lun hábürühan würiña labun lubafu urúei Sihón.

30 Günrinwagua lubafu Esübón;

günrinwaguati lúmagiñe Diboungiñe darí Nofa,

chülüti gudáü darí Medebá».

31 Ítara liña lubeiti, aba hárügüdüni Ísüraelina hamúan Amoruna. 32 Óunahati giñe Moisesi fiu wügüriña aríaahei ida liña lan ligaburi fulasu le Haserü, aba hárügüdüni Ísüraelina uburugu burí le yarafabei, bugá hamaña Amoruna ha aganóubaña ñein. 33 Lárigiñe aba hagiribudun luagun Basán, gama lumoun aba láfuridun Ogu le lurúeite Basán hau sun lumutuniña ageindagua hama uburugu Edüréi. 34 Ábati lariñagun Wabureme lun Moisesi:

—Manufudedabá luéi, níchugubei búhaburugun hau sun lumutuniña luma lageira, ábame badügün lun kei badüga lun Sihón le urúei Amoruna le buga aganóubei Esübón.

35 Ítara liña háfaruni Ísüraelina Ogu hilagubei hau sun lirahüñü hama lumutuniña. Mígiruntiña ni aban wínwanñu, aba herederun lau hamúan.