1 Aba houdin hábutigu haduheñu lani Galaadü külán ha ladügawagun Makirü, Manasési luma Hosé lumoun Moisesi, aba hariñagun hábutigu Ísüraelina lun:

2 —Ariñagati bugaha Wabureme bun lun bafanreinhani le lunbei latokarun lun kada Ísüraelina lau ubunuruni, ariñagati giñe bun lun bíchuguni lufanran Selofádü le meha hádangiñebei waduheñu houn lirahüñü würiña. 3 Gama lumoun ánhaña amarieida würiña hagía hama wügüriña ha lídangiñetiña amu türibu Ísüraelina, mámaalime lani wani türibu múa le yuubei houn, hánihalime türibu ha ídangiñebaña wügüriña ha úmabaña hamarieida. Ítarati agidarúeina luba lídangiñe le atokarubei woun wawéi. 4 Dánmeti lachülürün lidaani esefuruni Ísüraeli, ábame lásügürün hamúan sunsuinagubei hánime türibu hagía, mámaalime lani wani türibu.

5 Ábati lariñaguni Moisesi katei le houn Ísüraelina según arufudahani le líchugubei Wabureme lun:

—Garichatiña wügüriña ha lídangiñebaña lani Hosé türibu. 6 Lánharuba Wabureme lun hamarieidun lirahüñü Selofádü luma le úmati habusenra, lídangiñetirügaali ligía aban külán le lídangiñeti hani türibu luéigiñe háguchi. 7 Múa le atokarubei lun kada aban lumúanrugu Ísüraeli, moun lumuti lásügürün lúmagiñe aban türibu lumoun amu; sun Ísüraelina gasu lakipuruni lalagante lidan lani türibu. 8 Anhoun galagante aban würi lídangiñetu furumiñeguarügü türibu múa, gasu tamarieidun luma aban wügüri le lídangiñeti tani türibu. Ítara luba lakipuruni kada Ísüraelina lalagante hámagiñe lagübürigu. 9 Moun lumuti lásügürün aban alagan lídangiñe aban türibu lidoun amu. Kada lani Ísüraeli türibu, gasu lakipuruni múa le atokarubei lun.

10,11 Ábati tadügüni Malá, Tirüsá, Ogulá, Milüká tuma Noá, ha lirahüñü Selofádü le lubeibei Wabureme lun Moisesi, aba hamarieidun hama hasaanigu hayawüritegu luéigiñe háguchi, 12 ha ladügawagun Manasési le liráü Hosé. Ábati lerederun halagante lidan lani háguchi türibu.

13 Anihán burí gumadi luma lúrudu le líchugubei Wabureme houn Ísüraelina luéigiñe Moisesi lidan fulasu mawübüriti Moabü, lubadu duna Hordán, ligibugiñe Herikó.