1 —Hadügüba óundaraguni sánduti weyu furumiñe lidan lisedün hati. Madügünbadün ni aban luwuyeri wadagimanu lidan weyu ligía, hagidenehabei weyu ligía lau tinwinrúniwa fidu. 2 Hadagaragüdüba aban bágasu wügüri le ñǘraügili, aban mudún wéiriyaali hama sedü harahüñü mudún ha ábanti irumu hau, ha úati mégeiti hawagu, keisi adagaragüdüni gudawarügüti le buiti líhemen lun Wabureme. 3 Idewesei tauti fulúaru to añoundawagutu lau garaba to lunboun tadagarun úara hama animaalugu ha, dúusuboun líburu luagu bágasu, widü líburu luagu mudún wéiriaali 4 luma gádürü líburu luagu kada liraüraü mudún. 5 Hadagaragüdüba giñe aban gábara lun ferudunawa lan hifigoun, 6 luma adagaragüdüni gudawarügüti le lánina sagü hati, luma adagaragüdüni gudawarügüti le lánina sagü weyu, lau idewesei fulúaruauti, luma idewesei tauti diwéin, kei lariñaguni Wabungiute. Ábanbei idewesei buíduti líhemen lira le águdahouti lun luéirigun Wabureme.

7 —Hadügüba giñe óundaraguni sánduti weyu diisi lídanmeme lisedün hati ligía. Hayunaruba ani madügünbadün ni aban luwuyeri wadagimanu weyu ligía. 8 Hadagaragüdüba aban bágasu ñǘraügili, aban mudún wéiriyaali hama sedü harahüñü mudún ha ábanti irumu hau, ha úati mégeiti hawagu keisi adagaragüdüni gudawarügüti le buiti líhemen lun Wabureme. 9 Idewesei tauti fulúaru to añoundawagutu lau garaba to lunboun híchugunu, dúusuboun líburu luagu kada bágasu, widü líburu luagu mudún wéiriyaali 10 tuma gádürü líburu luagu kada liraüraü mudún. 11 Hadagaragüdüba giñe aban gábara keisi adagaragüdüni luagu figóu, lumoun adagaragüdüni luagu figóu le adügǘbei lidan luéyuri ferudun, luma adagaragüdüni gudawarügüti le lánina sagü weyu, lau idewesei fulúaruauti luma idewesei tauti diwéin.

12 —Hadügüba óundaraguni sánduti weyu keinsi lidan lisedün hati. Madügünbadün ni aban luwuyeri wadagimanu weyu ligía. Hefeduhaba sedü weyu luagu luéirigun Wabureme. 13 Furumiñeti weyu, hadagaragüdüba tareisi bágasu ñǘbürigiña ha wügüriña, bián mudún wéinamuhaña hama katorusu harahüñü mudún ha ábanti irumu hau, ha úati mégeiti hawagu, keisi adagaragüdüni gudawarügüti le buiti líhemen lun Wabureme. 14 Idewesei tauti fulúaru to ñóunwaguatu lau garaba to lunboun híchugunu, dúusuboun líburu luagu kada bágasu, widü líburu luagu kada mudún 15 tuma gádürü líburu luagu kada liraüraü mudún. 16 Hadagaragüdüba giñe aban gábara keisi adagaragüdüni luagu figóu, lumoun adagaragüdüni gudawarügüti le lánina sagü weyu lau idewesei fulúaruauti luma idewesei tauti diwéin.

17 —Libiaman weyu, hadagaragüdüba duusu bágasu ñǘbürigiña ha wügüriña, bián mudún wéinamuhaña hama katorusu harahüñü mudún ha ábanti irumu hau, ha úati mégeiti hawagu. 18 Bóugudin luéi lira lichugúba giñe idewesei fulúaruauti luma idewesei tauti diwéin úaragua luma hiibe animaalugu adagarutiña, kei lariñaguni Wabungiute. 19 Ladagaruba giñe aban liraüraü gábara keisi adagaragüdüni luagu figóu, bóugudin luéi adagaragüdüni gudawarügüti le lánina sagü weyu lau lidewese fulúaruauti luma idewesei tauti diwéin.

20 —Lǘrüwan weyu, hadagaruba unsu bágasu ñǘbürigiña ha wügüriña, bián gábara hama katorusu harahüñü mudún ha ábanti irumu hau, ha úati mégeiti hawagu. 21 Lichugúba giñe idewesei fulúaruauti luma idewesei tauti diwéin ítara kei hiibe animaalugu adagarawagüdütiña, kei lariñaguni Wabungiute. 22 Ladagaruba giñe aban gábara keisi adagaragüdüni luagu figóu, lúmounya adagaragüdüni gudawarügüti le lánina sagü weyu, lau idewesei fulúaruauti tuma diwéin.

23 —Ligadürün weyu, hadagaruba diisi bágasu ñǘbürigiña ha wügüriña, bián mudún wéinamuhaña hama katorusu harahüñü mudún ha ábanti irumu hau, ha úati mégeiti hawagu. 24 Lichugúba giñe idewesei fulúaruauti luma idewesei tauti diwéin según hiibe animaalugu adagarutiña, kei lariñaguni Wabungiute. 25 Ladagaruba giñe aban gábara keisi adagaragüdüni luagu figóu, lúmounya adagaragüdüni gudawarügüti le lánina sagü weyu lau lidewese fulúaruauti luma idewesei tauti diwéin.

26 —Liseingün weyu, hadagarawagüdüba nefu bágasu wügüriña ha ñǘbürigiña, bián mudún wéinamuhaña hama katorusu harahüñü mudún ha ábanti irumu hau, ha úati mégeiti hawagu. 27 Lichugúba giñe idewesei fulúaruauti luma idewesei tauti diwéin, según hiibe animaalugu adagarutiña kei lariñaguni Wabungiute. 28 Ladagaruba giñe aban liraüraü gábara keisi adagaragüdüni luagu figóu lúmounya adagaragüdüni gudawarügüti le lánina sagü weyu lau lidewesena le fulúaruauti luma idewesei tauti diwéin.

29 —Lisisin weyu, hadagaruba widü bágasu ñǘbürigiña ha wügüriña, bián mudún wéinamuhaña hama katorusu harahüñü mudún ha ábanti irumu hau, ha úati mégeiti hawagu. 30 Lichugúba giñe idewesei fulúaruauti luma idewesei tauti diwéin según hiibe animaalugu adagarutiña, kei lariñaguni Wabungiute. 31 Ladagaruba giñe aban gábara keisi adagaragüdüni luagu figóu, lúmounya adagaragüdüni gudawarügüti le lánina sagü weyu lau lidewese fulúaruauti luma idewesei tauti diwéin.

32 —Lisedün weyu, hadagaruba sedü bágasu ñǘbürigiña ha wügüriña, bián mudún wéinamuhaña hama katorusu harahüñü mudún ha ábanti irumu hau, ha úati mégeiti hawagu. 33 Lichugúba giñe idewesei fulúaruauti luma idewesei tauti diwéin según hiibe animaalugu adagarutiña kei lariñaguni Wabungiute. 34 Ladagaruba giñe aban gábara keisi adagaragüdüni luagu figóu, bóugudin luéi adagaragüdüni gudawarügüti le lánina sagü weyu lau lidewesena le fulúaruauti luma idewesei tauti diwéin.

35 —Liwidün weyu, hefeduhabei lau aban óundaraguni wéiriguti, madügünbadün ni aban luwuyeri wadagimanu weyu ligía. 36 Hadagaragüdüba keisi adagaragüdüni gudawarügüti le buiti líhemen lun Wabureme aban bágasu ñǘraügili, aban mudún wéiriyaali hama sedü harahüñü mudún ha ábanti irumu hau, ha úati mégeiti hawagu. 37 Lichugúba giñe idewesei fulúaruauti luma idewesei tauti diwéin hawagu animaalugu ha adagarawagüdübaña. 38 Ladagarawagüdüba giñe aban gábara keisi adagaragüdüni luagu figóu, bóugudin luéi adagaragüdüni gudawarügüti le lánina sagü weyu lau idewesei fulúaruauti luma idewesei tauti diwéin.

39 —Ligía burí adagaragüdüni le lunbei hadagaragüdüni lun Wabureme lidan lidaani, lúmounya idewesei le lánina lagunfulirun aban füramasei, o kei lan idewesei le líchugun gürigia lau lugundan, gayaraati idewesei lan o adagaragüdüni gudawarügüti, fulúaruauti luma idewesei lautu diwéin o adagaragüdüni lan le lánina arandaruni.

40 Aba lariñaguni Moisesi sun le lariñagubei Wabureme lun houn Ísüraelina.