1 Aba tagumeserun María luma Aarón adimureha wuriba luagu Moisesi, ladüga lamarieidun tuma aban würi Etiopíana. 2 Ariñagatiña giñe:

—Mámarügüñein lun Moisesi ladimureha Wabureme adimurehaali giñe woun.

Aba laganbuniña Wabureme.

3 Le linarün katei, Moisesi bugaha wügüri le manaaguntimabei lungua ubouagu. 4 Ligía lariñagunbei Wabureme lun Moisesi, Aarón tuma María:

—Heiba ǘrüwagubei huguya tidoun kianpu lánina óundaruni.

Aba houdin ǘrüwagubei hagía. 5 Ábati lararirun Wabureme lidan aban dúeri dereguati aba lararamun tigibugiñe kianpu; aba lagúarun lun Aarón tuma María, danbei hachülürün 6 aba lariñagun houn:

—Aganba huméi le lunbei nariñaguni hun: Lidan anihein lan aban profeta haganagua le nani, adimurehatina lau narufudun burí katei lun luma lidan uénedü; 7 ánheinti luma Moisesi le nubúein, mama liña nadügüni. Ligía le richaguatimabei hádangiñe sun nubúeingu, 8 adimurehatina lun gagibugu wagía, lidan aban luwuyeri dimurei le furanguti. Ánheinti ariha lubalina gagibugu wagía, kagia uagu hadimureha wuriba luagu?

9 Aba lagañidun Wabureme saragu hama, aba lidin. 10 Ladisedunbei dúeri tuéi kianpu, aba ladagarun lépüra tuagu María, aba láharudun sun tura. Dan ladigiragunbei Aarón ariha tuagun María, kei larihini luagu anihein lan lépüra tuagu, 11 aba lariñagun lun Moisesi:

—Fuleseihabubá nun nabureme, mabeichabawa luéigiñe figóu le wadügübei lau libidiounigan wau. 12 Mígiraba lun terederun María kei aban irahü to óunwetu lubaragiñe tágurahoun, to áfuriduboun héiriguañu tura.

13 Ábati layumuragun Moisesi lun Wabureme, lariñaga lun:

—Fuleseihabubá nun Wabungiute, ayumuraguatina bun lun bareidaguagüdünu.

14 Aba lóunabuni Wabureme lariñaga lun:

—Anhein hamuga ásuera túguchi tigibuagun terederuña hamuga lau busiganu luagu sedü weyu. Sagá humóun lubeiti bóugudin tuéi kianpu-agei luagu sedü weyu, lárigiñe gayaraahalime tagiribudun.

15 Ítara liña tasagarúniwa María tídangiñe kianpu-agei luagu sedü weyu. Sunti dan ligía, mamufutiña lílana fulasu ñéingiñe. 16 Tiábinbei María hamoun, aba hiñurahan wéiyaasu lúmagiñe Aserótugiñe, aba hemeraagun lidan fulasu mageirawati Parán.