1 Aba líchuguni Wabureme uganu le lun Moisesi lun lariñaguni houn Ísüraelina:

2 —Danme hebelurun lidoun fulasu le lunbei níchuguni hun lun haganóun ñein, 3 danme hadagaragüdün aban bágasu wügüri o aban lan mudún nun lun háguduni keisi adagaragüdüni o keisi lan adagaragüdüni gudawarügüti le buiti líhemen, lun hagunfulirun aban füramasei o keisi lan idewesei le hedewehan o ladüga lan somu fedu, 4 le íchugubalin idewesei gasu giñe líchugun gádürü líburu fulúaru fínutu to añoundawagutu lau aban líturu garaba. 5 Bóugudin luéi lira, gasu hedewehan aban líturu diwéin luagu kada liraüraü mudún lanwoun adagaragüdüni. 6 Anhein aban lubéi mudún adagaragüdünibei, gasu tichugún kei burí nefu líburu fulúaru lanwoun to añoundawagutu lau aban líturu luma murusunraüya garaba, 7 tuma aban líturu diwéin tuma murusunraüya keisi idewesei le buiti líhemen nun. 8 Anhein aban lubéi bágasu ñǘraügili adagaragüdünibei, lun ladagarun keisi adagaragüdüni gudawarügüti o keisi lan adagaragüdüni lánina arandaruni, o lun lan lagunfulirun aban füramasei, 9 tichugúba duusu líburu fulúaru ñóunwaguatu lau bián líturu garaba lanwoun, 10 túmaya bián líturu diwéin keisi idewesei gudawarügüti le buiti líhemen nun. 11 Ligía le lunbei ladügün luagu kada bágasu wügüri, kada mudún wéiriyaali, kada liraüraü mudún o kada lan liraüraü gábara le adagarawagüdüti. 12 Luagu kada animaalu adagarawagüdüti, lichugúba aban idewesei. 13 Sun Ísüraelina le íchuguti aban idewesei gudawarügüti nun, le buiti líhemen, gasu lagunfulirun lau igaburi le.

14 —Anhein abusenra aban terencha, le sügüina umuti o le lan aganóuti haganagua líchugun aban idewesei le gudawarügüti le buiti líhemen nun, gasu lagunfuliruni igaburimeme le higaburibei. 15 Ábanmemebei igaburi le dandu hun, kei houn terencha: Ábanbei lúrudu le magumuchaditi, le lunbei hígiruni agübürigu houn isaanigu. 16 Ábanmeme lúrudu ábanmeme igaburi hun luma houn terencha.

17 Aba líchuguni Wabureme uganu le lun Moisesi lun lariñaguni houn Ísüraelina:

18 —Danme beluhadün lidoun ageiraü le ñéinhinba lubéi nanügaün, 19 danme hagumeserun eiga lídangiñe türigu le ñeinbei, gasu hafanreinrun aban fánreinti lun hadagaragüdüni nun. 20 Ani ítarameme kei hadagaragüdüni furumiñeti fánreinti lídangiñe türigu éferehouaali nun, lunti giñe hadügün aban idewesei nun tau furumiñetu fulúaru to hañoundagun, gasu hadügün aban idewesei tau fein nun. 21 Gasu hadügüni idewesei le súnwandan.

22 —Anhaün ígira hadügün aban lídangiñe katei le uágubei nariñaga lun Moisesi mabusenrunga huguya, 23 lúmagiñe furumiñeti weyu lun hagunfuliruni huguya habu hadügawagun, lunti hadügüni katei le:

24 —Anhein mabusenrunga lubéi ladügǘwa duru ligía, ani sun lílana fulasu adügübalin, ábame hadagaragüdün aban bágasu ñǘraügili nun keisi adagaragüdüni gudawarügüti le buiti líhemen, lau lidewese le fulúaruauti tuma diwéin kei lariñaguni Wabungiute, dagagüda hagíame aban liraüraü gábara nun keisi adagaragüdüni luagu figóu. 25 Lárigiñe ábame ladügüni fádiri échuni lun libihini ferudun luagu hafulesein sun lílana Ísüraeli, ábame feruduna nániña, lugundun aban lan duru le mabusenrúntiña yebe hadügüni hadügübei, ani ru hamuti hadewese luma hadagaragüdün luagu figóu. 26 Feruduna nubaña sun lílana Ísüraeli hama sun terencha ha aganóubaña haganagua, anhein mabusenrunga lubéi hadügei duru ligía.

27 —Anhein aban lubéi gürigia adügübalin duru mabusenrunga ligía, ábame ladagaragüdün gürigia ligía aban liraüraü gábara le ábanti irumu lau keisi adagaragüdüni luagu figóu. 28 Ábame ladügüni fádiri échuni nigibugiñe lun libihíniwa ferudun luagu figóu le ladügübei gürigia ligía mabusenrunga, ábame ferudunanani. 29 Ligiamémeba igaburi dandu houn Ísüraelina kei houn terencha ha aganóubaña haganagua, anhein mabusenrunga lubéi ladügǘwa duru ligía.

30 —Gama lumoun anhein afigouha aban gürigia subudiñu lun, gayaraati Ísüraelina lan o terencha lan, lanabaguñadina. Lagidarúba lubeiti gürigia ligía hádangiñe líbirigu; 31 ladüga lanügüni nererun kei ni kata ani magunfulirunti lau le nubeibei, ligía guánarügüba gadurun luagu lounwen.

32 Dan meha lídanñanu lubéi fulasu mageirawati Ísüraelina, aba hadunragun luma aban wügüri abudaha watu lidan luéyuri emeraaguni. 33 Aba hanügüni ha adunragubaña luma lun Moisesi luma lun Aarón hama sun lílana fulasu, 34 aba hóunigiruni ladüga mariñawagungili lan kaba lan adügǘwa lau. 35 Ábati lariñagun Wabureme lun Moisesi:

—Lunti lafarún gürigia le, lunti hachamuragun sun Ísüraelina dübü luagu bóugudi tuéi kianpu-agei.

36 Ábati hasagaruni Ísüraelina bóugudin tuéi kianpu-agei, aba hachamuragun dübü luagun darí lounwen, ítara kei lariñaguni Wabureme lun Moisesi.

37 Aba líchuguni Wabureme uganu le lun Moisesi lun lariñaguni houn Ísüraelina:

38 —Huguya hama hadügawagun gasu hanügün riban luagu taru hadaüragun. Riban ligía, láutibei filu koloru guchu. 39 Ítara, danme harihini riban ligía, haritaguba luagu sun gumadi le ru naalibei hun, ábame hagunfuliruni, mígiraguagüdünbadün hungua lun lagumadirunün lagübüri haritagun, le burí lébubei múaradun humá numa. 40 Ítara luba haritagun luagu sun nugumadin, ábame hagunfuliruni ábame deregeguñu humá hungua nun, au le Hubungiute. 41 Au Aburemeibei, le Hubungiute, le asagarubalün Ehiptugiñe lun Hubungiute nan. Au Aburemeibei le Hubungiute.