1 Aba ladimurehan Wabureme lun Moisesi, lariñaga lun:

2 —Óunahaba fiu wügüriña lun houdin ariha ida liña lan lumúan Kanán aramudaguarügü, le lunbei níchuguni houn Ísüraelina. Óunahaba aban lídangiñe kada türibu, wügüriña ha gagumadihaditiña.

3 Ítara kei lariñaguni Wabureme lun Moisesi, aba lóunahaniña lúmagiñe fulasu mageirawati Parán. Sun hagía, wügüriña lánina gumadi hadan Ísüraelina, 4 anihán burí híribei: Hádangiñe lani Rubén türibu, Samúa le liráü Sakuru; 5 lídangiñe lani Simeón türibu, Safatü, le liráü Orí, 6 lídangiñe lani Hudá türibu, Kalebü le liráü Hefuné, 7 lídangiñe lani Isakárü türibu, Igali le liráü Hosé, 8 lídangiñe lani Éfürain türibu, Oseasi, le liráü Nun, 9 lídangiñe lani Benhamín türibu, Palütí, le liráü Rafú; 10 lídangiñe lani Sabulón türibu, Gadieli, le liráü Sodí, 11 lídangiñe lani Hosé türibu, Gadi, le liráü Susí, (hameme lani Manasési türibu); 12 lídangiñe lani Dan türibu, Amieli le liráü Gemalí, 13 lídangiñe lani Aserü türibu, Seturu, le liráü Mikaeli, 14 lídangiñe lani Nefütalí türibu, Nabí, le liráü Wápüsi, 15 lídangiñe lani Gadü türibu, Geueli, le liráü Makí.

16 Ligía burí híribei wügüriña ha lóunahabaña Moisesi aríaahei ageiraü. Aba lasansiruni liri Oseasi le liráü Nun, aba líchugun Hosué luagu.

17 Aba lubeiti lóunahaniña Moisesi aríaahei lumúan Kanán, lariñaga houn:

—Heiba luéigiñe Négebü, ábame hamudeirun luagun wübü. 18 Ariha huméi ida liña lan ligaburi fulasu, anhein here habéi gürigia ha aganóubaña ñein lumoun mere hamá, anhein gibe habéi lumoun mibe hamá. 19 Ariha huméi anhein kianpu-agei lubéi haburugutebei o anhein gabarieirun lubéi, anhein buidu lubéi múa le ñein lubéi haganawa lumoun wuriba lan, 20 anhein arandara lubéi lumoun marandarun lan. Manufudeda humá, hanügame fiu in ñéingiñe danme hiabin.

Lidan lidaani talubahóun furumiñetu beibei lasusereda katei le. 21 Aba houdin wügüriña hagía, aba haríaahani fulasu lúmagiñe luéigiñe fulasu mageirawati Sin, luéigiñe suru, darí Reobu, luéigiñe nórute, lurugabu lubenari Amatü. 22 Hebelura luéigiñe Négebü aba hachülürün darí Ebürón. Ñein meha haganawa Aimán, Sesai luma Talümái, ha ladügawagun Anakü. Sedü irumu lubaragiñe lábunawagun Soán Ehiptu ligía lábunawagun Ebürón. 23 Aba hachülürün chülǘ liraüraü lidunari Esükólu, ñein háchuga aban lilimun beibei lau aban resimu beibei luagu; aba hanügünu biangua dibiñu luagu aban wewe. Abudahatiña giñe güranáda tuma igu. 24 Aba híchugun Esükólu lírime liraüraü duna ligía ladüga resimu le hátügürübei Ísüraelina ñein.

25 Lárigiñe haríaahani fulasu luagu bián-wein weyu, aba hagiribudun 26 lun Kadesin lidan fulasu mageirawati Parán. Ñeinñein Moisesi, Aarón hama sun híbiri Ísüraelina. Aba habahüdaguni sun le harihubei houn, arufuda hamóun in to hanügüboun lídangiñe fulasu ligía houn. 27 Aba hariñagun lun Moisesi:

—Ñǘdüntiwa lidan fulasu le ñein lubéi bóunahawa, le linarün katei rísiti fulasu ligía, múa le ñeinbei buiti lun ábunaguni ani anuhán burí in to wanügüboun ñéingiñe. 28 Gama lumoun héretiña gürigia ha aganóubaña ñein, wéinamuti giñe luburugute ani ayarawaguati lau dübü. Bóugudin luéi lira, arihatiwa ladügawagun hígandei Anakü ñein. 29 Lóubawagu Négebü haganawa Amaléküna, lóubawagu dabíara haganawa Étüna, Hebusuna hama Amoruna, luéigiñe louba barana lurugabu duna Hordán ñein haganawa Kananna.

30 Ábati lámanichagüdüniña Kalebü gürigia ha ligibugiñebaña Moisesi, aba lariñagun:

—Wagañeiraali múa ligía, gayaraati wagañeiruni!

31 Aba hóunabun ha ñǘdünbaña luma, hariñaga:

—Siñabei wageindagun hama gürigia hara! Héretiña wawéi.

32 Aba buriti habahüdagun iyeeni houn Ísüraelina luagu fulasu le hóudinbei aríaaha. Hariñaga:

—Wuribati múa le ñeinbei lun ábunaguni, ani wéinamutiña sun wügüriña ha aganóubaña ñein. 33 Ariha wamutiña giñe hígandei ha ladügawagun Anakü. Ñǘbüriti wasandiragun woungua hóubagiñe kamá chigangaru, ítara liña giñe ligaburi hanügüniwa.