1 Luagu aban weyu aba hagumeserun Ísüraelina agülülüha luagu Wabureme luagu lénrengunga le gádanbaliña. Dan laganbunbaliña Wabureme, aba lagañidun saragu, aba lóunahan aban watu gemeti aba láguduni geyegua tau kianpu-agei. 2 Aba hagúarahan gürigia amuriaha luma Moisesi lun líderaguniña, aba layumuragun Moisesi lun Wabureme hawagu. Ábati léñeguchun watu gemeti. 3 Ligía Taberá lubéi buga líribei fulasu ligía, ladüga leheleledagun lara líleme Wabureme hawagun ñein.

4 Mígisihañati buga sun hawuyeri gürigia hadoun Ísüraelina, ani gürigia hagía, luágunrügüñein éigini haritagua. Ábati hafalaruniña Ísüraelina, aba hayahun ani ariñageina hagía:

—Anihadügü hamuga úi lun weigin! 5 Lanarime waritagun hawagun úduraü ha meha wéigibaña Ehiptu mafayeihanga wagía hawagu. Hóutiwa meha giñe melón ñein, pepinu, sebuya luma lai. 6 Ánheinti guentó wóunweguña walama, ani marihintiwa amu katei tuéidigia maná.

7 (Maná tugía ítara tiña meha kei lila bariñe; dumariyumati meha tarihíniwa, ítara kei tühü wewe, 8 Lidan bóuchunu ítara liña tisemen kei durudia tautu fulúaru lau garaba. Ábaha háfuridun gürigia abudahoun, lárigiñe aba hamuligidunu lun hábougunu o hadügünu kei fein. 9 Áriebuha, danha le lábürühan serenu tuagun kianpu-agei, aba giñeha tábürühan maná.)

10 Aba laganbuni Moisesi hayahuahan Ísüraelina hama haduheñu tubenari hakianpun. Ladüga wéirihali buga ligañi Wabureme hama. Ítara giñe Moisesi, magundanti giñe. 11 Aba lariñagun lun Wabureme:

—Ka san uagu bóuserana wuriba ítara, au le bubuein? Ka san wuribati nadügübei, bíchugunbalina lun náfaguniña gürigia ha? 12 Au funagia háguchibei o háguchu lan bamuriahanbei numa lun nanügüniña narünarugu kei irahüñü guragiña darí lidoun fulasu le füramase bubéi houn hagüchagu? 13 Halíagiñebagia nasagara úi lun néigagüdüniña sun gürigia ha? Ñǘbuintiña ayahuaheina ariñaga nun: "Ruba úi woun lun weigin". 14 Au nábugua, siñá nun hau gürigia ha, wéiriyati ihürü le nun. 15 Anhein ítarameme luba lubéi bóuserunina, gidagubeibei nibagari, anhein inarüni lubéi luagu hínsiñe nan bun. Ítara luba madariragun nan nungua lidan saragu lénrengunga.

16 Gama lumoun aba lóunabuni Wabureme:

—Óundaraba ǘrüwa-wein-diisi wéiyaaña mutu Ísüraelina nun, hádangiñe ha basubudirun luagu agumadiha hamá fulasurugu, banügañame tidoun kianpu lánina óundaruni, ábame hagurabahanina ñein buma. 17 Naragachuba adimureha buma, ábame nanügün lídangiñe sífiri le búmabei, ábame níchuguni houn lun híderagunibu hau gürigia ha. Ítara luba mámarügübadibu lan bábugua. 18 Lárigiñe ábame bóunahaniña gürigia arumada lubá haruga, ábame heigin úi. Aganba naali hayahun ariñaga: "Gáidügü wagía hamuga lun weigin! Buítimati meha lidin woun Ehiptu!" Keiti ítara liña lubéi, níchiga úi houn lun heigin, 19 mámarügü aban weyu, ni biama, ni seingü o diisi, ni wein. 20 Héigiba úi luagu aban hati darime lun láfurihan hágirugugiñe lun hahahünedun lun, lugundun fui hamaadina, au le Aburemei, au le haganaguabei, ayahuahaaña ariñaga nigibugiñe: "Ka san uagu wáfurida Ehiptugiñe?"

21 Ábati lóunabun Moisesi, lariñaga:

—Sisi-san-míluñanu wügüriña eibu-umutiña ha númabaña, ani ariñagatibu luagu bíchuguba lan úi woun lun weigin aban hati dayarüti? 22 Halíañanugia saragu mudún hama bágasu lun hafarún lun buídurügübaña lan houn sun gürigia ha? Ni íbini ánhaña wíchiga sun úduraü ha baranahabaña houn, lóuguabaña.

23 Aba lóunabuni Wabureme, lariñaga lun:

—Haritaguatibu san luagu ñǘraüraü lan nubafu? Barihaaliti guentó anhein lagunfuliruba lubéi le nariñagubei lumoun magunfulirunbei lan.

24 Aba liabin Moisesi aba labahüdaguni le lariñagubei Wabureme lun houn lílana fulasu, aba lóundarun ǘrüwa-wein-diisi ábutigu Ísüraelina, aba líchuguniña geyegua tau kianpu. 25 Ábati lararirun Wabureme lidan dúeri aba ladimurehan luma Moisesi, lárigiñe aba lanügün lídangiñe sífiri le luágubei Moisesi aba líchuguni hawagun ǘrüwa-wein-diisi ábutigu hagía. Ítara kei ladagarun sífiri ligía hawagun ítara hagumeserun adimureha kei profetagu; gama lumoun masuseredúnyati katei le.

26 Ñéinñanu bián wügüriña, aban gíriti Elidádü le aban Medadü, biángubei hagía anuadirúatiña hadan ǘrüwa-wein-diisi hagía, gama lumoun mídintiña sanduariurugun, aba herederun kianpu-ágeirugu. Gama lumoun dagati sífiri hawagun, aba hagumeserun adimureha kei profetagu kianpu-ágeirugu. 27 Ábati lidin aban irahü éibaagueina, lariñaga lun Moisesi:

—Anihein Elidádü luma Medadü adimureha kei profetagu tidan kianpu-agei!

28 Ábati lariñagun Hosué le liráü Nun, aban hádangiñe lubúeingu Moisesi:

—Moisesi, nabureme, rédeibaña luéi hadügüni katei le!

29 Lariñaga Moisesi lun:

—Bemeidihaña san nau? Líchigeidügü hamuga Wabureme lani sífiri houn sun lumutuniña, lun profetagu hamá sun hagía.

30 Ábati lagiribudun Moisesi hama ábutigu Ísüraelina tidoun kianpu-agei.

31 Aba láfuragüdün Wabureme aban garabali baranahagiñe le anügübei aban hawuyeri dunuru ha geigúaditiña, aba hábürühan tuagun kianpu-agei luma geyegua tau, daruguatiña aban fulasu kei burí aban weyu éibuguni geyegua tau kianpu-agei, háhabuchagua luéi múa yarafa lun aban méturu. 32 Aba habudahan gürigia dunuru sun weyu ligía, sun áriebu luma sun weyu larugan. Le míbetimabei abudun, budati diisi háhabuchagun hádangiñe dunuru hagía, aba hasaleihaniña, hadibiragüdaña geyegua tau kianpu-agei. 33 Gama lumoun kei hagumeserun Ísüraelina achaguhaña hai dunuru, aba lagañidun Wabureme houn aba labeichaguniña, lau láfaragun saragu gürigia. 34 Ligía híchugunbalin Kibürótu-atawá lírime fulasu ligía, ladüga ñein hábunaña ha luágurügübei éigini haritagua.

35 Aba hasigiruni Ísüraelina héibugun Kibürótu-Atawágiñe darí Aserótu, ñein heredera.