1 Ábati hóundaragun súngubei párükerugu le ligibugiñebei lubenari Duna, aba hariñagun lun máisturu Ésüdürasi lun lanügünu liliburuna lilurudun Moisesi to meha líchuguboun Bungiu lun Ísüraeli. 2 Aba lanügünu fádiri Ésüdürasi liliburuna lúrudu ligibugiñoun adamurini le ñein habéi wügüriña, würiña hama sun ha gunfurandahaña. Weyu furumiñe lidan lisedün hati; 3 aba laliihanu hagibugiñe súngubei, ligibugiñe párüke le ligibugiñebei lubenari Duna lúmagiñe binaafin darí lumoun amidirugu.

Deregüdagu haña sun gürigia aganbei taliihóun liliburuna lúrudu. 4 Rara liña máisturu Ésüdürasi luagu aban esenáriu lauti fulansu le adügǘbei lun luáguba lan lararama. Ñeinñein giñe Matatíasi, Sema, Aníasi, Uríasi, Ilükíasi, luma Maseíasi rara luéigiñe lóunwenren. Luéigiñeti lubaünan, ñeinñein Pedaíasi, Misaeli, Malükíasi, Asumu, Asübadána, Sakaríasi luma Mesulámü. 5 Ábati ladaarunu Ésüdürasi líburu hagibugiñe sun gürigia, kei arihúa lubéi hagibugiñe súngubei, dan ladaarunu aba hararamun súngubei. 6 Ábati líchugun Ésüdürasi uéiriguni lun Bungiu Suntigabafu, aba hóunabun sun gürigia lau háhabu iñurañu:

—Ítarala, ítarala.

Lárigiñe aba habuluchagun darí ladagarun herebe múarugu, aba híchugun uéiriguni lun Bungiu.

7 Hosué, Baní, Serewíasi, Hamín, Akubu, Sabütái, Odíasi, Maseíasi, Kelitá, Asaríasi, Hosabádü, Anán luma Pelaíasi ha Lewitagu, hagía afuranguagüdübalin lúrudu houn gürigia, añahalu gürigia lidan habara. 8 Lau umalali reinti haliihoun liliburuna lilurudun Bungiu, lárigiñe aba tafuranguagüdüniwa lun gunfuranda hamani gürigia le aliihóubei. 9 Keiti hayahun sun gürigia dan le haganbuni le lariñagubei lúrudu, dandu gumadimati Neemíasi kei máisturu ani fádiri Ésüdürasi, hama Lewitagu ha afuranguagüdübalin lúrudu houn gürigia, aba hariñagun houn:

—Lunti mírudagun humá, mayahun hugíame lugundun luéyuri lan Aburemei le Wabungiute weyu le. 10 Ariñagati giñe Ésüdürasi houn: "Heiba, hou huméi lubuidun-agei éigini, gurá hugíame diwéin bímetu. Agunbiraha humañame ha úabei ni kata aranseti hama, lugundun luéyuri Wabungiute uguñe. Meredera humá lau íruni, ladüga ugundani le líchugubei Bungiu waramudaguagülebei".

11 Ariñagatiña giñe Lewitagu houn gürigia lun hámanichun, lun mayahun hamá lugundun luéyuri lan Bungiu weyu ligía. 12 Ábati houdin sun gürigia eiga, ata, luma afanreinha éigini. Aba hadügün aban óunwenbu fedu, ladüga gunfuranda hamaali lan le arufudahóubei houn.

13 Larugan, aba hóundaragun sun hábutigu iduheñu, fádirigu hama Lewitagu lumoun máisturu Ésüdürasi lun haturiahan libügürü le lariñagubei lúrudu. 14 Aba hadarirun bürüwañu ñein luagu ariñaga lan buga Wabureme lídangiñe Moisesi, luagu lunti lan haganóun Ísüraelina tidan dibasein, lidan fedu le lídanbei lisedün hati. 15 Ábati lariñawagún lidan sun burí luburugute Herusalén lun háfuridun gürigia áluaha tilimun oliwu, arayán, yaraüwa o furumiñeguarügü tídibu wewe hilumati lun hadaagun dibasein keisi lariñawagúniwa tidan liliburuna lúrudu. 16 Aba houdin gürigia, lidan hayabin lau burí limu lun hadügünu hadibasein tábulugu muna kei fadá lan tábulugu burí haban Ísüraelina, adügatiña giñe tigibugiñe litenpulun Bungiu, lidan párüke le lani lubenari Duna, luma lidan párüke le lubenari Éfürain. 17 Sun gürigia ha agiribudubaña Babilóniagiñe, adügatiña dibasein, aba hebelurun aganawa tidan, ladüga lúmagiñe buga lidaani Hosué le liráü Nun, chülǘ lumoun weyu ligía, madügǘnti ítara. Aba ñein lan óunwenbu ugundani. 18 Sédüñein weyu hau efeduhei fedu ligia; lúmagiñe furumiñeti weyu darí lagumuhóun, sagü weyu laliihanu Ésüdürasi liliburuna lúrudu le lilurudun Bungiu; luagu liwidün weyu, ñeinñein aban óundaraguni wéiriguti, keisi igaburi le uágubei héchuda gürigia.