1 Lidan dan ligía, aba hekeharun gürigia dandu würiña keisi wügüriña hawagu hapaisanungu ha huríu. 2 Ñéinñanu ariñagutiña:

—Gíbetiña warahüñü, ani mégeitiwa wibihin türigu luéi wóunwegun walama.

3 Hariñaga híbiri:

—Lubaragiñe wóunwegun walama, peñá wamá wamúan, wachari le beibei-agei, tuma waban lun wagañeihan éigini.

4 Ñéinñanu ariñagutiña:

—Mosu wálugun seinsu furedeiti lun wafayeihan seinsu lun urúei luagu wachari-agei.

Ariñagatiña giñe: 5 «Wagía kéigubeirügü wapaisanungu ábanmeme néchani; ábanmeme habu warahüñü hama harahüñü. Lau sun lira wagía mosu wíchuguniña warahüñü lun idamunime. Reiti guentó idamuniñanu hádangiñe warahüñü würiña ani siñati wadügün ni kata lun wesefuruniña lugundun ámuhaña laburiña wamúan luma wanadürigu».

6 Lídanbei naganbuni hekeharun luma haricha, aba nagañidun saragu. 7 Lárigiñe nasaminaruni buidu, aba nadeinhan houn ha íñugutimabaña luma houn gumadimatiña luéigiñe híchuguni ihürügu le hawagun hapaisanun. Aba nóundaraguagüdüniña sun gürigia lun wakutihani kesi le, 8 aba nariñagun houn:

—Wagía, sefu wamaaña wábirigu huríu ha meha alugurúbaña houn néchanigu ha ibidiñehabutiña lun Wabungiute; guentoti, halugurahayaaña san lunya wesefurubaña lan?

Aba herederun maniñu, ibidiñeti houn kaba lan hóunaba. 9 Nariñagaya houn:

—Mabuidunti, le hadügübei. Lunti hamuga harufudun inebesei lun Wabungiute, ítara luba lerederun habularuniwa ha ibidiñehabubaña lun Wabungiute, ha wáganiñu. 10 Au, niduheñu, hama numusuniña, furedeihadiwa giñe seinsu luma türigu houn; so, feruduna wabéi dúeiti le houn! 11 Bégitina giñe hun lun háguyugüdüni hamúan luma hanadürigu tuma haban houn guentó guentó, ani maguburahan humañame luagu hadúeihan huma gayaraati seinsu lan, diwéin yebe, türigu yebe, o garaba.

12 Aba hariñagun:

—Wáguyugüdübei sun le houn, mamuriahanhadiwa ni kata hama. Wadügübei ítara kei bariñaguni.

Ábati nagúarun houn fádirigu, aba náfiñuragüdüniña hagibugiñe luagu le füramase hamaalibei. 13 Lárigiñe lira aba náfurudunu nisimisin, aba nariñagun:

—Ítarala láfuruduni Bungiu sun le magunfulirunti lau fiñú le lúbiñegiñe, gidaléime sun le lúmati luéi.

Aba hóunabun súngubei, hariñaga:

—Ítarala.

Aba híchugun uéiriguni lun Bungiu.

Aba hagunfulirun gürigia hagía lau hererun, 14 dúusuñein irumu, lúmagiñe irumu wein le líchugunbalina urúei Árütaherühesi keisi gumadimati lóubawagu Hudá, darí lumoun irumu darandi-biama lidan larúeihan, ni au, ni ha íderagubalina manügün wamuti le yebe yuubei nun keisi gumadimati. 15 Ánhañati gumadimatiña ha meha nubaabaña, ihürü meha lun ubóu. Sagü meha weyu, haguburahan bián-wein murusun pülata lun éigini tuma diwéin. Bóugudin luéi lira, rútiña meha hamusun lidere dan houn gürigia. Anhein au, madügün numuti ítara, ladüga inebe lan Bungiu nun. 16 Gúnfulitina giñe lau naranseruni lubarieirun uburugu, manügüntina múa nungua. Sun numutuniña, nadagimeintiña lidan baríeiru. 17 Hóutiña meha dagá hamoun san-dimí gürigia numa luagu nidabulan, dandu huríu ha lílana fulasu kei nadagimeintiña luma urúei, bóugudin hawéi ha ñǘbuinbaña ebeluha lídangiñe fulasu le yarafati woun. 18 Le meha naranseragüdübei sagü weyu lun éigini: Aban bágasu wügüri hama sisi mudún ha buídutimabaña, hama dunuru; ñeinñoun giñe saragu diwéin sagü diisi weyu. Lau sun lira, maguburahan numuti fáyeiti le yuubei nun keisi gumadimati. Lugundun gíbeeli ihürügu le hawagubei gürigia. 19 Haritaguabá nuagun Nubungiute, luagu sun le nadügübei luagu hafulesein gürigia ha!