1 Weyu wein-gádürü lídanmeme hati ligía, aba hóundaragun Ísüraelina lun hayunarun, aba hadaüragun daüguaü súsutu, aba híchugun múa hábulugu, lun harufuduni hagarigu luagu hafigoun. 2 Aba hafanreinragun hawéi ha terenchabaña agücha, aba hararamun, aba hagufeseruni hafigoun luma hafigoun hagüchagu. 3 Sun añaha lan ñein, aba taliihóun liliburuna lilurudun Bungiu houn, ábaya hagufeseruni hafigoun luagu ǘrüwa oura, aba háhuduragun lun Bungiu. 4 Lárigiñe aba lawarirun Hosué, Binúi, Kadümiéli, Sewaníasi, Binúi, Serewíasi, Baní luma Kenaní luagun esenáriu, aba hafurieidun lun Bungiu lau umalali héreti; 5 lárigiñe aba lariñagun Hosué, Kadümiéli, Binúi, Asabüníasi, Serewíasi, Odíasi, Sewaníasi luma Petaíasi ha Lewitagu:

«Sará humá ru humá uéiriguni lun Bungiu le Hubungiute lun súnwandan ru humá uéiriguni, abiniruni luma eremuhani lun liri le íñugubei ani wéirigu ligía!»

6 Ariñagati giñe Ésüdürasi:

—Buguya Búngiubei, úati amu buéi. Buguya adügübalin sielu luma liñun-agei sielu, hama sun waruguma ha lídanbaña; buguya adügübalin ubóu luma sun le lídanbei, barana luma sun le lídanbei. Buguya íchugubei ibagari lun sun katei. Ligía híchugunbei waruguma ha siélubaña uéiriguni bun.

7 —Bungiu, buguya Bungiu le anúadirubalin Abüraámü; buguya asagarubalin uburugugiñe Uru, le haburugute Kalüdéana, aba bíchuguni Abüraámü lírime. 8 Ariha bumuti luagu aban lan wügüri le afiñeti buagu ligía, aba badügün aban daradu luma, luagu bíchugubei lan hageira Kananna, Étüna, Amoruna, Féresüna, Hebusuna hama Hérühesina houn ladügawagun; ani gúnfuli baali bererun, lugundun gúnfulitibu súnwandan! 9 Ariha bumuti bugaha hasufurirun wagüchagu Ehiptu, aba baganbuni hayahuahan laru barana funati. 10 Adügatibu óunwenbu burí milaguru ligibugiñe urúei Ehiptuna hama sun lílana fulasu, lugundun barihini wuribani le aubei hóuseraña Ísüraelina. Ligía bagañeirunbalin lubuidun ladimurehoun buagu chülǘ lumoun dan le. 11 Fánreingua bumuti barana lidan biama hagibugiñe, aba hánhiñuragun lídangiñe üma mábeiti; gama lumoun bulugüda bumutiña ha éibaahabaliña keisi aban dübü lidan duna huliliti. 12 Lárigiñe aba badundehaniña lau aban dúeri wéyuagu, luma lau watu gemeti áriebu lun larugoungadagüdüni üma le lunbei hafalaruni.

13 —Lárigiñe aba bararirun luagun wübü le Sinaí, aba badimurehan hama siélugiñe, rútibu dimurei lánina úarani houn, arufudahani le inarüniti, luma lúrudu luma gumadi le buiti. 14 Arufudahatibu giñe houn lun hareiduni luéyuri emeraaguni, ru buguya gumadi luma arufudahani le inarüniti houn, lúrudu luma arufudahani lídangiñe Moisesi le bubuein. 15 Bóugudin luéi lira, rútibu fein siélugiñetu houn lun heigin, luma duna lídangiñeti dübü lun hatun. Lárigiñe aba bariñagun houn lun hebelurun árügüdei ageiraü le buga uágubei bariñaga houn.

16 —Gama lumoun hagía hama wagüchagu barüguatiña buga houngua, ani maganbadi hagía, madügüntiña gasu lau bugumadin. 17 Máhatiña haganbun, maha hagía haritagun luagu óunwenbu burí katei le buga badügübei luagu hafulesein. Wéiriti maganbadi hamá, darí lun híchugun aban hábuti lunya lanügüniña hárigoun idamunime uburugu Ehiptu. Gama lumoun aban Bungiu geferudunahaditibu buguya, aban Bungiu gudemehabuti, gaguraasuntibu, hínsiñehabutibu ani mígirun bumutiña. 18 Lábugiñe sun adüga hamá aban bágasu lauti golu, lun habungiutebei lan ariñaga hagía ligía lan asagarubaliña Ehiptugiñe, ani adüga hagía luéinamun burí anabawaguni. 19 Buguya lau lanarime bugudemehabu, mígirun bumutiña lidan fulasu mageirawati. Madireirúnti dúeri hawéi wéyuagu lun ladundehaniña luagu héibugun, ni watu gemeti áriebu lun larugoungadagüdüni üma le lunbei hafalaruni. 20 Rútibu giñe lídangiñe lubuidun bani sífiri houn lun larufudahan houn, magida bumuti maná le bóunahabei houn hawéi, rútibu duna houn lun hagalumaruni hamagürabu. 21 Rútibu éigini houn lidan fulasu mageirawati luagu bián wein irumu, memegeiruntiña ni kata: Mawesiruntu hadaüragun, máludun ligía hagudi. 22 Gáñeigüda bumutiña urúeigu houn, hama néchanigu aba bafanreinhani hamúan houn, aba hárügüdüni Esübón le lageira urúei Sihón, luma Basán le lageira urúei Ogu lun hageirame. 23 Adügatibu lun gibe hamá hasaanigu kei waruguma sielu, aba banügüniña lun hárügüdüni ageiraü le uágubei bariñaga houn hagüchagu luagu bíchugubei lan houn. 24 Aba hebelurun, aba hárügüdüni lumúan Kanán, adüga buguya lun habuluchagun lílana fulasu ligía hagibugiñe, derege bumutiña lurúeitegu fulasu ligía hama gürigia ha lílana háhaburugun lun hadügüni le habusenrun hau. 25 Ragütiña giñe uburugu burí baríeiruati luma burí múa le arandarati, muna burí buin lau lubuidun agei katei, fusu, beibei agei, tídibu burí oliwu, tuma burí saragu wewe to geigúaditu tin; hóutiña darí hakimuledun, dibunetiña, ani winwan hamuti lueirin bareini. 26 Gama lumoun maganbaditiña bun, iñuraguarügü hagía houngua buagun, aba liyereegudun bilurudun houn. Áfaragua hamutiña giñe bánigu profeta, ha meha adundehabaliña lun háluahanibu, lunya hagararaagun bun, anabaguarügü hamabu. 27 Ligía lébubei bederegeruniña houn háganiñu ha íchugubaña lidere dan houn. Lídanbei añaha lan labu idiheri, aba hamuriahan buma lun bíderaguniña, aba baganbuniña siélugiñe ladüga lueirin bugudemehabu; aba bíchugun wügüriña lun hesefuruniña hawéi ha íchugubaña lidere dan houn. 28 Gama lumoun danha le hadariragun houngua lidan murusun darangilaü, ábaya hadügüni le mabuidunbei bun; ligía bígirunbaliña houn háganiñu, ha asufuriragüdübaliña. Lárigiñe ábayaha hamuriahan buma lun bíderaguniña, buguyatiha buin lau gudemehabu ábaha bíderaguniña ladüga lueirin bugudemehabu, aganba bumutiñaha siélugiñe sefu bumutiña saragu wéiyaasu. 29 Ábayaha beweridiruniña lunya hagunfuliruni bilurudun; gama lumoun haritaguatiñaha luagu gayaraagua hamá houngua, madügüntiñaha gasu lau bugumadin; dürüguarügü hameiha le lariñagubei bererun le íchugubei ibagari houn ha agunfulirubalin; mabuchahatiña, deré ligía haganbun madügüntiña gasu. 30 Gaguraasuntibu habá luagu saragu dan, eweridiha bumutiña lau bani sífiri luma hau bani profetagu, gama lumoun madügüntiña gasu, ligía bederegerunbaliña labun hagumadihan néchanigu ubouagu. 31 Gama lumoun ladüga lueirin bugudemehabu, máfaragun bumutiña, mágurun bumutiña giñe; ladüga aban lan Bungiu gudemehabuti buguya.

32 —Ligía lubeiti Wabungiute, Bungiu wéiriti, héreti ani hanufunehabuti, buguya le gúnfulibei lau bidaradun luma lau bugudemehabu, luma lueirin bínsiñehabu, mabulieidabei sun katei wuribati le susereelibei houn warúeitegu, wafadirinigu hama wani profetagu, houn wagüchagu luma houn sun wíbirigu lúmagiñe bugaha hadaani lurúeitegu Asiria, darí lumoun guentó. 33 Buguya, maduruntibu lidan sun le asuseredubei woun; lugundun buguya lau úaraguni badügei sun le badügübei, anhein wagía adüga wamuti le wuribabei. 34 Ni warúeitegu, wábutigu hama wafadirinigu, ni wagüchagu magunfuliruntiña lau bilurudun madügün hagía gasu lau bugumadin luma lau eweridihani le badügübei houn. 35 Lubaragiñe lira, lidan harúeihan luma lidan saragu buiti le bíchugubei houn, luma ageiraü wéiriti ani arandarati le bederegerubei houn, meseriwiduntiña bun, mígirun haméi luriban hóuserun.

36 —Arihabáwa guentó, idamuniñadiwa lidan fulasu le bíchugubei houn wagüchagu lun buga héigini le áhüchübei ñein luma sun le buídubei ñein. 37 Sun buiti le ñeinbei, hounti urúeigu ha bíchugubaña wawagun ladüga wafigoun. Adüga hamuti habusenrun dandu wau keisi hau wabiñanigu. Ligía luéirinbei wadiheri.

38 Luagu sun katei le, adügatiwa daradu, bürǘ wamuti, seini haméi wábutigu, Lewitagu hama fádirigu dugumedu.