1 Aba ladimurehan Wabureme lun Moisesi luma Aarón, lariñaga houn:

2 —Abahüdabaña Lewitagu ha ladügawagun Keatü, hawagu hani külán luma luagu iduheñuguaü 3 ha daranditi irumu hau lumoun dimí-san, ha gayaraati heseriwidun tidan kianpu lánina óundaruni. 4 Sagüráuti hawadigimari ladügawagun Keatü, anihán wadagimanu le lunbei hadügüni: 5 Danme le hamufurun súngubei lun hadüga lan wéiyaasu, lunti lagidarunu Aarón hama lirahüñü belu to lubenariboun fulasu le sándutimabei ábame hadouragunu tuagun bágüsi to lánina daradu. 6 Híchigame aban idáü to lautu uraü fínuti tigibuagu, ani tigibuagu tura ábame hátulerun aban gamisa koloru guchu to ábanrügütu fiesu, ábame híchuguni tebu tuagu lun hanügünu. 7 Hátuleruba giñe aban gamisa guchu ligibuagu dábula lánina adagaragüdüni lun Bungiu, tigibuaguba hadagaragüdei asiedu, guliyeru, kopu, weru, luma burí fudu tun diwéin to idewesei, tuma fein to adagarawagüdüboun súnwandan. 8 Ligibuagu sun le, hátuleruba aban gamisa funatu, ábame hadouragunu tau aban idáü to lautu uraü fínuti, ábame híchuguni wewe le lebu luagu lun hanügüni. 9 Lárigiñe ábame hanügün aban gamisa guchu, ábame hadouragun lau lebu sanudelu tau, lanpu, labudaha leñegura watu, lirahüñü asiedu luma sun weru le ayusurubei lun lágeime garaba. 10 Ábame hóuburaguni sun le tau aban idáü lautu uraü fínuti, ábame híchuguni ligibuagu fiu wewe lun hanügüni.

11 —Hátuleruba giñe aban gamisa guchu ligibuagu latarü le láutibei golu, ábame hóuburaguni tau aban idáü lautu uraü fínuti, ábame híchuguni wewe le lebu luagu lun lanügǘn. 12 Lárigiñe ábame habudahani umegeni le ayusurúbei tidan sanduariu, ábame híchuguni tidoun aban gamisa guchu, ábame hóuburaguni tidan aban idáü to lautu uraü fínuti, ábame hanügüni ligibuagu wewe. 13 Gasu hagidaruni agülei luma baligi luéigiñe latarü, lárigiñe ábame hadouragun lau tau aban gamisa funafunagutu. 14 Ábame híchuguni sun le ayusurúbei lidan lemesi luagu latarü: Lagei burí leñegura watu, fígiedu, chóbuli, kopu wéinamuti, sun burí ílagu le ayusurúbei luagu latarü. Ábame ladourawagun lau sun le tau aban idáü lautu uraü fínuti ani rúa ligíame luéwena lun lanaahóuniwa. 15 Danme súnhali lóuburaguni Aarón hama lirahüñü ílagu le burí sagüráubei, danme aranseña lun hiñurahan wéiyaasu, gayaraabei hayabin ladügawagun Keatü lun hagía lan anügei sun ílagu le. Gama lumoun moun lumuti haguurun ni kata le sagüráuti lau háhabu, luéi hóunwegun. Sun burí tila kianpu lánina óundaruni le, ligía lunbei hanügüni ladügawagun Keatü. 16 Eleasárü, le liráü fádiri Aarón, ligíaba ariha lau gasi lun lanpu, kupali hémeti, idewesei le fulúaruauti, sun idewesei le lunbei hadagaragüdüni nun súnwandan, luma lau garaba le lánina ederegeruni. Gasu giñe hóunigirunu sanduariu luma sun le tídanbei, luma giñe burí ílagu sagüráuti.

17 Aba ladimurehan Wabureme lun Moisesi luma Aarón, lariñaga houn:

18 —Mígira humá lun hagumuchagun liduheñu Keatü haganaguagiñe Lewitagu. 19 Anihán katei le lunbei hadügüni lun máfarawagun hamá luéigiñe haguurun burí katei le sagüráuti: Lariñagubei Aarón hama lirahüñü lun kada aban hádangiñe kaba lan ladüga luma kaba lan lanüga. 20 Ítara luba mebelurun hamá ni murusun oura arihei burí katei sagüráuti, lun móunwegun hamá.

21 Aba ladimurehan Wabureme lun Moisesi, lariñaga lun:

22 —Abahüdabaña giñe ladügawagun Gerüsón según hani külán luma luagu iduheñuguaü. 23 Abahüdabaña ha daranditi irumu hau lumoun dimí-san, ha gayaraati heseriwidun tidan kianpu lánina óundaruni.

24 —Anihánba hawadigimari ladügawagun Gerüsón: 25 Hagíaba anaahoun tikorutinan burí sanduariu, kianpu lánina óundaruni, idáü lautu uraü fínuti to adourúboun tigibuagu, korutína to luáguboun tubenari kianpu lánina óundaruni, 26 likorutinan burí yadü; korutína lánina ebeluruni lidoun yadü to egeyedagubarun sanduariu luma latarü, agürügaü luma sun ílagu le emegeirubei lun hafisiute luma lun hawadigimari. 27 Aarón hama lirahüñü hagíaba asubudiragüdei houn ladügawagun Gerüsón kaba lan hadüga luma burí katei le lunbei hagíaba lan anügei. Huguyaba ariha hau lun buídubei lan hadügüni hawadigimari. 28 Anihán eseriwiduni le lunbei hadügüni haduheñu ladügawagun Gerüsón tidan kianpu lánina óundaruni lábugiñe laríaahan Itamárü le liráü fádiri Aarón.

29 —Abahüdabaña giñe ladügawagun Merarí, según hani külán luma luagu iduheñuguaü 30 bürübaña sun ha daranditi irumu hau lumoun dimí-san, ha gayaraati heseriwidun tidan kianpu lánina óundaruni. 31 Wadagimanu le lunbei hadügüni tidan kianpu lánina óundaruni, lun hanaahani tufulansuna sanduariu, tíndanute, tuágaburi, tisilinin, 32 luagaburi yadü le geyegubei tau sanduariu, lau lisilinin, wewe le ácharuhoubei luma agürügaü luma sun le emegeirubei lun hawadigimari. Buguyaba ariñaga lun kada aban hádangiñe kaba lan katei lanüga. 33 Ligía wadagimanu le lunbei hadügüni ladügawagun Merarí tidan kianpu lánina óundaruni lábugiñe ladundehan Itamárü le liráü fádiri Aarón.

34 Aba labahüdüniña Moisesi luma Aarón hama ábutigu fulasurugu ladügawagun Keatü según hani külán luma luagu iduheñuguaü, 35 ha gúnfulihañabaña darandi lumoun dimí-san irumu, ha gayaraati heseriwidun tidan kianpu lánina óundaruni, 36 bián-milu-sedü-san-dimiñanu wügüriña ha abahüdǘbaña. 37 Hagía abahüdǘbaña hádangiñe ladügawagun Keatü ha gayaraabei heseriwidun tidan kianpu lánina óundaruni, según abahüdǘni le ladügübei Moisesi luma Aarón keisi lariñaguni Wabureme lun.

38 Ha ladügawagun Gerüsón, según hani külán luma luagu iduheñuguaü 39 ha lídantiña darandi lumoun dimí-san irumu, ha gayaraati heseriwidun tidan kianpu lánina óundaruni, 40 bián-milu-sisi-san-darandiñanu. 41 Sun ha, hagía ladügawagunbaña Gerüsón ha gayaraabei heseriwidun tidan kianpu lánina óundaruni, según labahüdüniña Moisesi luma Aarón keisi lariñaguni Wabureme houn.

42 Ladügawagun Merarí según hani külán luma luagu iduheñuguaü, 43 ha lídantiña darandi lumoun dimí-san irumu, ha gayaraati heseriwidun tidan kianpu lánina óundaruni, 44 ǘrüwa-míluñanu-bián-san. 45 Sun ha, hagía ladügawagunbaña Merarí ha gayaraabei heseriwidun tidan kianpu lánina óundaruni, según labahüdüniña Moisesi luma Aarón keisi buga lariñaguni Wabureme lun.

46 Hadan sun Lewitagu ha labahüdübaña Moisesi luma Aarón hama ábutigu Ísüraelina, hawagu hani külán luma iduheñuguaü, 47 ha lídantiña darandi dagá lumoun dimí-san irumu, ha gayaraahaña heseriwidun tidan kianpu lánina óundaruni, 48 widü-milu-seingü-san-gádürü-wéinñanu. 49 Adügǘwati abahüdǘni le, según lariñaguni Wabureme lun Moisesi, ariñawagúa lun kada aban kaba lan ladüga luma kaba lan lanüga, ítara kei lariñaguni Wabureme lun Moisesi.