1 Aba lariñagun Bungiu lun Moisesi:

2 —Adügabá bián fidu lautu pülata, nadagimeinwatu lau marüdiyu lun teseriwidun bun lun bagúarun houn gürigia lun hóundaragun, luma lun bíchuguni seini lánina awanseruni. 3 Danme tinwinrún biángubei fidu, ábame hóundaragun gürigia bigibugiñe tubenari kianpu lánina óundaruni. 4 Danme tinwinrún ábanrügü, hábutirügübaña türibu ha wéirigubaña óundaragua. 5 Danme lúaradun tínwinrun fidu luma agúarahani héreti, ábame hagumeserun ha luéigiñebaña oubaü le ñéingiñe lubéi laboucha weyu awansera, 6 danme labiamadun tínwinrun ábame hagumeserun ha luéigiñebaña suru awansera. Tinwinrúniwa fidu le úarati luma agúarahani héreti ligíaba liseinin amufuruni. 7 Tinwinrún fidu lábuguarügü ligíaba seini lun hóundaragun gürigia. 8 Fádirigu, ha ladügawagun Aarón, hagíaba íñaaha fidu. Ábanbei lúrudu le lunti súnwandan le hun.

9 —Danme lábürühan ágani huagun humúanrugu, ani lunti háfuridun ageindagua, hínwinrounme biángubei fidu ábame hagúaragun here. Ítara luba naritagun huagun au le Aburemei le Hubungiute, ábame nesefurunün hawéi háganiñu. 10 Win humóun giñe fidu lidan burí weyu lánina ugundani, lidan burí luéyuri fedu o iseri hati, danme híchugun adagaragüdüni gudawarügüti luma adagaragüdüni lánina arandaruni. Ítara luba naritagun huagun. Au Aburemeibei le Hubungiute.

11 Lidan libiaman irumu lúmagiñe háfuridun Ísüraelina Ehiptugiñe, weyu wein lidan libiaman hati, aba liñuragun dúeri lungua tigibuagugiñe sanduariu to lánina daradu, 12 aba hagumeserun Ísüraelina éibuga, háfurida lídangiñe fulasu mageirawati Sinaí. Aba lararamagun dúeri lidan fulasu mageirawati Parán. 13 Ítara kei lariñagagüdüni Wabureme lun Moisesi, 14 lisudaranigu Hudá lídanbei furumiñeti ubaraü lábugiñe lufanidiran Hudá, Naasón le liráü Aminadábü ligía hábutibei. 15 Natanaéli le liráü Suarü habá habaabei lisudaranigu lani Isakárü türibu. 16 Eliabü le liráü Elón habá habaabei lisudaranigu lani Sabulón türibu. 17 Ábati haragachagunu sanduariu, aba hagumeserun ladügawagun Gerüsón luma Merarí ha anaahabarun sanduariu awansera.

18 Lárigiñe aba hawanserun súdaragu ha lábugiñe lufanidiran Rubén, Elisúru le liráü Sedeuru hábutibei. 19 Selumiéli le liráü Surisadái ligía habá habaabei lisudaranigu lani Simeón türibu. 20 Eliasáfü le liráü Reueli habá habaabei lisudaranigu lani Gadü türibu. 21 Lárigiñe aba hawanserun ladügawagun Keatü, ha anügübalin ílagu le sagüráubei. Danha le hachülürün, láramaaruha sanduariu.

22 Lárigiñe hasigira súdara ha awanserubaña lábugiñe lufanidiran Éfürain, Elisamá le liráü Amiudu hábutibei. 23 Gamalieli le liráü Pedasúru habá habaabei lisudaranigu lani Manasési türibu. 24 Abidán le liráü Gidoní habá habaabei lisudaranigu lani Benhamín türibu.

25 Agumuhóuni, hárigi hárigi súdaragu houdin ha awanserubaña lábugiñe lufanidiran Dan, Aieserü le liráü Amisadái hábutibei. 26 Pagieli le liráü Okürán, ligía habá habaabei lisudaranigu lani Aserü türibu. 27 Airá le liráü Enán, ligía habá habaabei lisudaranigu lani Nefütalí türibu.

28 Ítara liña ligaburi hawanserun Ísüraelina lidan hadiñurun lídangiñe aban fulasu lidoun aban.

29 Luagu aban weyu aba lariñagun Moisesi lun libamu le Obabü le liráü Reueli le Madianna:

—Wagía wéibuga lidoun ageiraü le füramase lubéi Wabureme luagu líchugubei lan woun. Keimoun wama, wóuserubadibu buidu, lugundun füramasehali Wabureme lóuseruni Ísüraeli lau areini.

30 Lariñaga Obabü:

—Uá, himei numuti nagiribudun nageiroun, le ñein habéi niduheñu.

31 —Mídinba —ligíaya Moisesi lun—. Subuditi fulasu burí le ñein lubéi gayara lan lemeraawagun lidan fulasu mageirawati bun buidu buidu, gayaraabei beseriwidun woun lun badundehaniwa. 32 Ánhabu ñüdün wama, wafanreinhabei sun buiti le líchugun Wabureme woun buma.

33 Ítara liñati, aba houdin luéigiñe luwübüri Wabureme, aba héibugun luagu ǘrüwa weyu. Habá habaañoun lubagüsina lidaradun Wabureme áluaheina aban fulasu lun hemeraagun. 34 Wéyuaguha, ítara kei hagumeserun awansera aban giñeha lamufurun dúeri le lani Wabureme hóugiñe. 35 Dántiha le hagumeserun awansera tabu bágüsi, ábaha lariñagun Moisesi:

«Saraba, Wabureme!

Waraügua hamá báganiñu!

Lun lidan lanme harihinibu ha iyereehabúbaña bun lun héibaagun!»

36 Gama lumoun danha le tararamagun bágüsi, ábaha lariñagun Moisesi:

«Giribubá guentó, Wabureme,

houn lisudaranigu Ísüraeli

ha gíbebaña darí lun siñá lan habahüdǘn!»