1 Aba lariñagun Moisesi houn hábutigu türibu Ísüraelina:

—Rúhali Wabureme lúrudu 2 luagu danme lan ladügün aban gürigia aban füramasei lun o anhein lan áfiñura luagu somu katei, lunti lan lagunfuliruni lererun adügaleime sun le füramase lubéi.

3 —Anhoun adüga aban würi nibureingiru, to lábugiñegiru lagumadihan túguchi, aban füramasei lun Wabureme o tadügün lan daradu luagu somu katei, 4 anhein mariñagun túguchi ni kata le gayaraati ladüraaguni tuéi dan le lasubudiruni, gasu tagunfuliruni tani füramasei o tidaradun lan. 5 Gama lumoun, anhein máharun lubéi túguchi danbei lasubudiruni, mafosurun lubóun giñe Wabureme lun tagunfuliruni.

6 —Dan le tadügün aban würi aban füramasei lun Wabureme o tadügün lan aban daradu masaminarunga tuguya buidu lubá tadügüni, lárigiñe aba tamarieidun, 7 ani dan le lasubudiruni túmari, mariñagunti ni kata tun libügürü, gasu tagunfuliruni tani füramasei luma tidaradun. 8 Gama lumoun anhein danbei lubéi lasubudiruni túmari, múaradunti lau, mámaali mosu tagunfuliruni tani füramasei luma daradu le tadügübei masaminarunga tuguya buidu lubá tadügüni. Mafosurun lubóun giñe Wabureme lun tagunfuliruni.

9 —To adügüboun aban füramasei, anhein aban lubéi würi to hilaali túmari o aban lan würi to ígiraguaaru luma túmari, lunti tagunfuliruni sun daradu le tadügübei.

10 —Dan le tadügün aban würi maríeitu aban füramasei o táfiñurun lan anuhalu lúbiñe túmari luagu tadügüba lan aban daradu, 11 anhein mariñagun túmari ni kata tun libügürü dan le lasubudiruni, ani anha ligíame lun le tadügübei, gasu tagunfuliruni tani füramasei luma tidaradun. 12 Gama lumoun anhein dan le lubéi lasubudiruni túmari aba lamahadun, mámaali mosu tagunfuliruni, ladüga lamaharun túmari. Mafosurun lubóun giñe Wabureme lun tagunfuliruni.

13 —Gayaraati lánharun o lamaharun úmari lun furumiñeguarügü füramasei o fiñún le tadüga lúmari, füramasei o fiñún le afosurutu lun tayunarun. 14 Anhein mariñagun ni kata tun libügürü, aba lásügürün átiri weyu ítara, lau mariñagun lan ni kata, ánhati lun füramasei o daradu le tadügübei. 15 Anhein amahada átiri dan lárigiñe lasubudiruni, ligíaba ariha lau magunfulirun tan lúmari.

16 Anihán burí lúrudu le líchugubei Wabureme lun Moisesi, libügürü hanaagun úmarigu hámagua, luma hanaagun agübürigu houngua hama harahüñü hiñaruñu ha nibureinhaña lidan le lábugiñegiña lan lagumadihan háguchi.