1 Ábati hagumeserun Ísüraelina agúaraha, aba hásügürüni sun áriebu ligía ayahuaha. 2 Sun hagía aba hadimurehan wuriba luagu Moisesi luma Aarón. Hariñaga:

—Hilagubeihaadiwa hamuga meha Ehiptu, o ya lan lidan fulasu mageirawati! 3 Kame san lanügawa Wabureme lidoun ageiraü le? Lun san wóunwegun wuriburugu luma lun hábürühan wámarigu hama warahüñü háhaburugun áganiñu? Buítimati hamuga woun lun wagiribudun Ehiptun.

4 Aba hagumeserun ariñaga hámagua:

—Ru wamá aban wábuti ábame wagiribudun Ehiptun!

5 Aba labuluchagun Moisesi luma Aarón darí ladagarun herebe múarugu hagibugiñe sun Ísüraelina, 6 aba laheiridagunu Hosué luma Kalebü ha giñe buga aríaahabalin fulasu hadaüragun le liseinin igarigu, 7 aba hariñagun houn sun Ísüraelina:

—Buiti fulasu le wóudinbei aríaaha! 8 Anhein fuleseihabu Wabureme woun, líderagubadiwa lun webelurun lidoun fulasu ligía, ábame líchuguni woun. Rísiti fulasu ligía, múa le ñeinbei buiti lun ábunaguni. 9 Gama lumoun miñuragua humá hungua luagun Wabureme, manufudedun huguyame hawéi lílana fulasu ligía, lugundun wagañeirubaña; hagía máugiñetiña, ánheinti wagía, anihein Wabureme wámagiñe. Manufudeda humá!

10 Lau sun lira, busentiña yebe gürigia hachamuragun dübü hawagu. Ábati lasaliragun luéirigun Wabureme tidan kianpu lánina óundaruni, aríagu sun Ísüraelina lun, 11 ábati lariñagun Wabureme lun Moisesi:

—Ídaba san lagumucha mabahüdün hamanina gürigia ha? Ídaba san lagumucha lilouguan hafiñen nuagu lau sun ariha hamani burí milaguru le nadügübei haganagua? 12 Nóunaha aban sandi gáfarahati hawagun le lunbei lerederuniña luéi hárügüdüni múa ligía, gama lumoun bídangiñe nadügüba aban ageiraü wéiritimati ani héretima sügǘ hau.

13 Gama lumoun aba lóunabuni Moisesi Wabureme, lariñaga lun:

—Buguya asagarubaliña gürigia ha Ehiptugiñe lau bubafu. Danme haganbun Ehiptuna luagu katei le lunbei badügüni, 14 ábame habahüdaguni houn lílana Kanán. Hagía aganbaaña giñe lariñawagún luagu abunhein lan haganagua gürigia ha, luagu arufudagua ban bungua houn, luagu anihein lan bani dúeri hóugiñe, luagu habá habaañadibu lan wéyuagu lidan aban dúeri, áriebu lidan aban watu gemeti. 15 Ánhaña báfaragua gürigia ha lidan aban, hariñaguba híbiri néchanigu ha subudihabúbaña lun buéirigun, 16 "luagu siñagua ban bungua lun bebelaagüdüniña lidoun fulasu le füramase bubéi houn, ligía lan báfaragunbaliña hilagubei lidan fulasu mageirawati". 17 Ligía lubeiti Wabureme, arufudabéi lueirin bubafu ítara kei füramase bani. Buguya guánarügü ariñagubei 18 luagu magañidun ban ítara umenrengun, luagu weiri lan bínsiñehabu, luagu ferudunabani wuribani luma mabuchahaü lau sun mígirunbani le gadurunbei mabeichúnga, ábürügüda bumuti hariban agübürigu hawagun isaanigu, ibañani, adügawaguni hama aguraü. 19 Keiti weiri lubéi bínsiñehabu, ferudunabéi hariban gürigia ha, kei gaguraasunhadibu lubéi habá lúmagiñe Ehiptugiñe dagá ya.

20 Lóunabati Wabureme:

—Feruduna numutiña kei bamuriahani numa. 21 Ani ítara kei inarüni lan luagu winwan nan, luma luagu buin lan ubóu lau nuéirigun, fiñutina 22 luagu úabei lan ni aban hádangiñe gürigia ha ebeluruti lidoun fulasu le füramase nubéi. Ariha hamuti nuéirigun luma burí milaguru le nadügübei Ehiptu luma lidan fulasu mageirawati. Lau sun lira, óuchagua hamutina saragu wéiyaasu lidan fulasu mageirawati ani máhatiña hadügüni le nubeibei, 23 úabei ni aban hádangiñe arihiti fulasu le füramase nubéi houn hagüchagu. Úabei ni aban hádangiñe ha mabahüdünbalina arihiti fulasu ligía. 24 Kalebürügüñein le nubúein, gani aban sífiri amu luéi le hani híbiri ani adüga lumuti le nubeibei lidan lubudubu. Anati ligía nebelaagüdübei lidoun fulasu le lídinbei aríaaha, ábame haganóun ladügawagun ñein. 25 Lidan fulasu mawübüriti haganawa Amaléküna hama Kananna. Huguyati, giribugubei humá haruga, ábame hasigirun lídangiñe fulasu mageirawati luagun barana funati.

26 Aba líchuguni Wabureme uganu le lun Moisesi luma Aarón lun hariñaguni houn Ísüraelina:

27 —Ídaba san lásura nawanduni hadimurehan nuagu hagübüri Ísüraelina huguya le? Aganba naali hadimurehan wuriba nuagu: 28 "Au, le Aburemei, fiñutina luagu nibagari luagu nasuseredagüdaali lan hun keimeme le naganbubei hariñagun. 29 Sun ha weinbei irumu hau lun iñun ha abürüdǘbaña lidan habahüdǘn gürigia ani adimurehaaña wuriba nuagu, hóunweguba ábame lerederun hágubu chagagu lidan fulasu mageirawati le. 30 Úabei ni aban hídangiñe ebeluruti lidoun fulasu le füramase nubéi hun, luéidigia Kalebü luma Hosué. 31 Hisaaniguti ha buga uágubaña hariñaga luagu hábürühaba lan háhaburugun áganiñu, nanügübaña lidoun fulasu le unbei maha humá, lun haganóun ñein. 32 Lerederuba húgubu chagagu lidan fulasu mageirawati 33 le ñeinba lubéi haganawa hisaanigu keisi hóuniri mudún luagu bián-wein irumu. Ítara luba hafayeihan hisaanigu luagu magunfulirun humá, darime hóunwegun sun huguya ya lidan fulasu mageirawati. 34 Bianñein-wein weyu hau aríaahei fulasu; bianbei giñeti wein irumu hau afayeiha luagu hidurun: Aban irumu luagu kada weyu. Ítara luba hasubudiruni ka lan líchugubei hiñuragun hungua nuagun". 35 Au, le Aburemei ariñagubalin. Ítara luba nóuseruniña gürigia wuribatiña ha, ha agarabaagubaña nuagun. Lídanba fulasu mageirawati le hagumuchagua; yaaba hóunwegua.

36,37 Dan hayabin wügüriña ha lóunahabaña Moisesi aríaahei fulasu, aba hariñagun luagu mabuidun lan, agülülügüdaña gürigia, aba lábürügüdüniña Wabureme lau óunweni. 38 Hádangiñe sun hagía Hosuérügüñein luma Kalebü móunwegun.

39 Dan labahüdagunbalin Moisesi le lariñagubei Wabureme houn Ísüraelina, aba hírudagun sun hagía. 40 Larugan binaafin aba saragia hamá, aba hamudeirun luagun liñun-agei áraabu, aba hariñagun:

—Awanheinhadiwa ya! Keimoun lidoun fulasu le füramase lubéi Wabureme woun, lugundun inarüni luagu afigouhaadiwa lan.

41 Gama lumoun aba lariñagun Moisesi:

—Ka san uagu madügün hubalin le lubeibei Wabureme? Manügünbei le buiti hun! 42 Masigira humá hubaruaguóun, lugundun úati Wabureme huma. Háfaragubadün háganiñu. 43 Hagurabuñadün Amaléküna hama Kananna lun hageindagun huma luma lun háfaragunün. Ani keiti ígira humaali lubéi Wabureme, úaali Wabungiute huma.

44 Gama lumoun lau sun lira múdeimemetiña lábulugun wübü; gama lumoun ni lubagüsina daradu, ni Moisesi mamufutiña tídangiñe kianpu-agei. 45 Ábati háfuridun Amaléküna hama Kananna ha aganóubaña ñein, aba héibaahaniña Ísüraelina darí Orumá, aba hagañeiruniña sunsuinagubei.