1 Aba lariñagun Wabureme lun Moisesi luma Aarón:

2 —Au le Aburemei íchugubalin gumadi le: Ariñagabá houn Ísüraelina lun hanügün aban bágasu to funayumati tura bun, to úati mégeiti tuagu, to michugúngili yugu tuagu ni aban wéiyaasu. 3 Ábame hederegerunu lun fádiri Eleasárü, ábame lasagarunu bóugudin tuéi kianpu-agei, ábame lariñagun lun tafarún liñúarü. 4 Ábame lanügün fádiri Eleasárü murusun hitaü luagu lifinga, ábame labahichaguni sedü wéiyaasu tuagun kianpu lánina óundaruni. 5 Lárigiñeme ábame hágudunu bágasu tuguya liñúarü, gudá hameime tura, tǘgürügü, tita luma tídiga. 6 Lárigiñe ábame lanügüni fádiri wewe le hibúari, aban liraüraü limu isopu tuma gamisa funatu, ábame lachagaruni sun le lidoun watu gemeti le ñein lubéi tagudúa bágasu. 7 Lárigiñe ábame lachibunu ladaüragun chibagua ligíame lungua lau duna, lárigiñeme gayaraahalime lebelurun tidoun kianpu-agei, lau sun lerederuba lan wíyeñu según échuni darí lumoun rábounweyu. 8 Luáguti wügüri le águdubarun bágasu, lachibuboun ladaüragun chibagua ligíame lungua lau duna, ábame lerederun wíyeñu dagá rábounweyu. 9 Ámuba wügüri le harumati según échuni abudahei tubaligiñen bágasu ábame líchuguni lidan aban fulasu harumati según échuni bóugudi tuéi kianpu-agei. Leseriwiduba baligi ligía houn lílana Ísüraeli lun hesetiruni lidunarina arumaduni. Adagaragüdüni luagu figóu sun le. 10 Le buga wügüri le abudahabalin baligi, lunti lachibunu ladaüragun, ábame lerederun wíyeñu darí lumoun rábounweyu según échuni. Aban lúrudu lunti sun dan le, dandu hun huguya Ísüraelina kei houn terencha ha aganóutiña haganagua.

11 —Le aguuruti aban gürigia hilaali, lerederuba wíyeñu luagu sedü weyu. 12 Luagu lǘrüwan luma lisedün weyu gasu larumadaguagüdün lungua lau lidunarina arumaduni, ábame larumadun. Anhein marumadaguagüdün lungua luagu lǘrüwan luma lisedün weyu, marumadunbei. 13 Anhein aguura aban gürigia aban hilaali ani marumadaguagüdünti lungua, lawiyeduñoun lani Wabureme sanduariu lau lira, gasu lubeiti lagidarún hádangiñe lílana Ísüraeli. Ladüga kei mabahichawagun lubéi lau lidunarina arumaduni, lídanñein iwiyei según échuni.

14 —Dan le lounwen somu gürigia tidan aban kianpu, anihán katei le lunbei ladügǘn: Sun ha tídanbaña o ha lan ebelurutiña tidoun, herederuba wíyeñu luagu sedü weyu. 15 Sun dabarasi le madourúnti lau o wuriba lan ladourún lau, lerederuba giñe wíyeñu.

16 —Ánheinti bóugudi tuéi kianpu, le aguuruti aban gürigia hilaali le afarúarügüti o hilarügüti, o habu gürigia hilaaña o aban lan umúahaü, lerederuba wíyeñu luagu sedü weyu.

17 —Lidan burí kesi lánina awiyeduni ligía, lunti lanügǘn murusun lídangiñe tubaligiñen bágasu to adagarawagüdüboun luagu figóu, ábame lichugún lidoun aban ágeidinaü lun leserún duna lídangiñeti lísensen duna lanwoun. 18 Lárigiñe ábame lanügün aban wügüri le harumati aban lilimun isopu, ábame ladüdüragüdüni lidan duna, ábame labahichagunu kianpu lau, ágeidinaü, gürigia ha buga ñéinbaña luma giñe le buga aguurubei labu hilaali o lúgubu gürigia le afarúarügübei o le lan óunwebei lau furumiñeguarügü óunweni o aguuruti lan umúahaü. 19 Wügüri le harumabei según échuni, gasu labahichaguni le wíyebei lidan lǘrüwan luma lisedün weyu. Luágume lisedün weyu, harumagüda láalime. Ábameti lachibunu gürigia le buga wíyebei ladaüragun chibagua ligíame lungua lau duna, gama lumoun lerederamémeba wíyeñu darí lumoun rábounweyu. 20 Anhein marumadun aban gürigia le wíyeti según échuni, gasu lagidarún hádangiñe líbirigu lugundun ruti minebeni tun lisanduariun Wabureme. Lugundun kei mabahichawagun lubéi lau lidunarina arumaduni, wiyemémeti. 21 Aban lúrudu le, le lunti sun dan. Le abahichaguti amu lau lidunarina arumaduni, gasu lachibunu ladaüragun. Le aguuruti lidunarina arumaduni, lerederuba wíyeñu darí rábounweyu. 22 Sun katei le laguurun aban gürigia wíyeti, lerederuba wíyeñu; le giñe aguuruti aban gürigia wíyeti, lerederuba giñe wíyeñu darí rábounweyu.