1 Hadan lani Manasési türibu, ñéinñanu seingü würiña gamulenuguátiña gíritiña Malá, Noá, Ogulá, Milüká tuma Tirüsá. Lirahüñü Selofádü, ladügawagun Éferü, Galaadü, Makirü, Manasési luma Hosé. 2 Aba houdin seingü würiña gamulenuguátiña ha tigibugiñoun kianpu lánina óundaruni adimureha luma Moisesi labu luma fádiri Eleasárü luma hama ábutigu fulasurugu, aba hariñagun houn:

3 —Hilati wáguchi lidan fulasu mageirawati, gama lumoun mama meha hádanñein lánigu Koré ha awügürihóubaña lun Wabureme. Ladüga lifigoun guánarügü lounwe, ani marahüñüti eyeriñu. 4 Gama lumoun marichati lun lagumuchagun liri wáguchi lídangiñe lani türibu ladügarügü maráü lan aban eyeri irahü. Ruba murusun múa woun lidan hafulasun líbirigu wáguchi.

5 Aba líchuguni Moisesi hakesin würiña ha ligibugiñoun Wabureme, 6 aba lóunabuni Wabureme:

7 —Garichatiña lirahüñü Selofádü. Ruba murusun múa houn lidan hafulasun líbirigu háguchi, sügüla lalagante háguchi houn. 8 Ariñagabá giñe houn híbiri Ísüraelina luagu anhein lan ounwe aban hádangiñe marahüñüga wügüriña, lásügürüba lan lalagante tun liráü; 9 gama lumoun anhein maráü lubéi ni würi, lerederuba lalagante houn líbirigu, 10 anhein mábirigu lubéi, lerederuba lalagante houn líbirigu lúguchi. 11 Ánheinti mábirigu lubéi lúguchi, lerederuba lalagante lun liduhe le yarafaguatimagilibei luma. Ábanbei lúrudu le houn Ísüraelina ítara kei nariñaguni bun.

12 Aba lariñagun Wabureme lun Moisesi:

—Wariba luagun wübü Abarímü, arihabéi múa le níchugubei houn Ísüraelina. 13 Lárigiñeme barihini, ligíaba bounwen, ábame bóundarun hamoun bagüchagu, kei Aarón le bíbugaña, 14 ladüga biángubei huguya, dürügua humuti nilurudun, lidan fulasu mageirawati Sin, dan le hekeharunbei Ísüraelina nun, ani míchutün uéiriguni nun hagibugiñe dan le hamuriahanbei duna.

(Luagu le asuseredubei lidan lísensen duna le Meribá, uburugu Kadesi, lidan fulasu mageirawati yágüta Sin.)

15 Aba lariñagun Moisesi lun Wabureme:

16,17 —Wabungiute le Wabureme, buguya le íchugubei ibagari houn sun gürigia íridaba aban ábuti lun ligíaba lan adundehei bageira le ñeinhin lumuti houdin, meredera hamaamuga kei mudún móuniritiña.

18 Lariñaga Wabureme lun Moisesi:

—Hosué, le liráü Nun, aban wügüri lauti sífiri. Barübei, rubei búhabu lábulugu. 19 Ábame banügüni ligibugiñoun Eleasárü le fádiri luma hagibugiñoun lílana fulasu, ábame bíchuguni agumadihani lun hagibugiñe sun hagía; 20 ruba lídangiñe bubafu luagu lun haganbubei lan sun Ísüraelina le lubeibei. 21 Gama lumoun gasu larufudagun Hosué lungua ligibugiñe fádiri Eleasárü, ábame lálügüdahan Eleasárü numa lau liri, lau Urimü le tuágubei ladaüragun. Hosué ligíaba ariñagei sun le lunbei hadügüni Ísüraelina houn.

22 Aba ladügüni Moisesi sun le lariñagubei Wabureme lun kei lubudubu. Aba lanügüni Hosué ligibugiñoun fádiri Eleasárü luma hagibugiñoun sun lílana fulasu. 23 Aba líchuguni lúhabu lábulugu, aba líchuguni gumadi lun, ítara kei buga lariñagagüdüni Wabureme lun Moisesi.