1 Aba ladimurehan Wabureme lun Moisesi lidan fulasu mawübüriti le lani Moabü, lubadu Hordán, ligibugiñe Herikó, lariñaga lun:

2 —Ruba lúrudu houn Ísüraelina luagu lídangiñe lan ageiraü le yuubei houn lun híchugun uburugu burí houn Lewitagu lun haganóun ñein, ru hameime giñe fulasu le geyegubei lau uburugu houn lun hagüriahan animaalugu. 3 Haganóuba Lewitagu lidan burí uburugu ligía, herederame habiñanigu áraabu. 4 Fulasu burí le lunbei híchuguni houn lun hábiñeme halügüniña, geyegu luba lau uburugu, gádürü-san-dimí méturu bóugudin libiti ayarawaguni. 5 Gádürübei larigei fulasu ligía, nefu-san méturu luagu kada louba, lememe limigifen luéigiñe oubaü le ñéingiñe lubéi laboucha weyu ligiamémeba limigifen luéigiñe oubaü le ñeinhin lubéi lálüda weyu, luéigiñe nórute luma luéigiñe suru. Lerederuba uburugu lamidangua, geyegu fulasu le ñeinba lubéi heredera animaalu lau.

6 —Lídangiñe uburugu burí le lunbei híchuguni houn Lewitagu, ñeinbei sisi uburugu le aramudaguagülei, le ñeinba lubéi haramudagua gürigia ha áfarahatiña. Bóugudin luéi burí uburugu ligía, híchigayaba bián-wein-biama uburugu houn; 7 lidan súngubei, gasu híchugun bián-wein-widü uburugu houn Lewitagu lau fulasu houn halügüniña geyegu lau. 8 Danme híchugun uburugu houn Lewitagu lídangiñe hafulasun Ísüraelina, gasu híchugun kada türibu según lueirin hafulasun: Gíbetimabei híchugun türibu ha wéinamutimati hafulasun, míbebei uburugu híchugun türibu ha ñǘraütimatiña ufulasun.

9 Aba líchuguni Wabureme uganu le lun Moisesi lun lariñaguni houn Ísüraelina:

10 —Danme hánhiñuraguni duna Hordán lun hebelurun fulasurugún Kanán, 11 gasu hanúadirun fiu uburugu lun aramudaguagüleime, le lunbei ñeinba lan haramudagua gürigia ha áfarahatiña mabusenrunga hagía. 12 Séfuñu haba ñein luéi liduhe gürigia le háfarubei, ani móunwenbaña darime hederegeragun houngua houn lílana fulasu lun haguserun. 13 Sísibei uburugu le aramudaguagülei: 14 Ǘrüwa luéigiñe oubaü le ñéingiñe lubéi laboucha weyu libiti duna Hordán, ǘrüwa Kanán. 15 Sisi uburugu aramudaguagülei le leseriwiduba dandu houn Ísüraelina kei houn terencha ha aganóutiña haganagua o ha lan ebeluhatiña hamoun. Gayaraabei laramudagun furumiñeguarügü le áfarahati mabusenrunga ñein.

16 —Anhein íbaagua o ímiragua aban gürigia amu tau furumiñeguarügü katoun lautu gürabu, aba lounwen le ímirawagubei, áfarahani lira, ani mosu lasiadirúniwa le áfarahabei lun lounwen.

17 —Anhein abuleseira aban gürigia amu lau dübü, aba lounwen le abuleseirúbei, áfarahani lira, ani mosu lasiadirúniwa le áfarahabei lun lounwen.

18 —Anhein abuleseira aban gürigia amu lau wewe, aba lounwen le abuleseirúbei, áfarahani lira, ani mosu lasiadirúniwa le áfarahabei lun lounwen. 19 Le liduhe le afarúbei le yarafatimagilibei liduhegua luma, ligíaba áfarei le áfarubalin liduhe danme ladariruni.

20 —Anhein ádara aban gürigia amu ladüga liyereegun lun, o lachamurun lan somu katei luagu lau luriban aritaguni, 21 o ladüga lan gáganiguaü lagayuaha luagu lau lúhabu, aba lounwen le uágubei lagayuaha, lasiadirúba le áfarahabei lun lounwen, lugundun áfarahani lira. Iduhei le yarafatimagilibei liduhegua luma le óunwebei, ligíaba áfarei le áfarahabei danme ladariruni.

22 —Anhein ládara aban gürigia amu gürigia mabusenrunga ligía yebe, ani mama luagu gáganiguaü, o anhein lan achamura somu katei luagun mama lau luriban aritaguni, 23 o marihinga aba lachüürün aban dübü le gayaraati láfaruni lau, ani lahitirei dübü ligía ani aba láfaruni, máganigua hagía, mabusenrun ligía ladügün wuribati lun, 24 lidan katei libe lira, lílanaba fulasu eseriwida keisi aguseragüdütiña lun le áfarahabei luma liduhe le óunwebei, le abusenrubei lafayeirun le áfarahabei luagu ladüga, según lúrudu burí le. 25 Gasu hóunigiruni lílana fulasu le áfarahabei luéi liduhe le afarúbei, gasu hagiribudagüdüni le áfarahabei lárigoun lidoun uburugu aramudaguagülei le ñein lubéi buga laramudagua. Gasu lerederun le áfarahabei ñein darí lounwen fádiri le íñutimabei. 26 Gama lumoun anhein áfurida bóugudin luéi uburugu aramudaguagülei, 27 aba ladariruni liduhe gürigia le láfarubei bóugudi luéi uburugu aramudaguagülei, ani aba láfaruni, madurunbei le áfarubalin. 28 Gasu lerederun le áfarahabei lidan uburugu le aramudaguagülei darí lounwen fádiri le íñutimabei. Lárigiñe gayaraahalime lagiribudun lageiroun.

29 —Ábanbei lúrudu le hun le lunbei lásügürün hámagiñe agübürigu hamoun isaanigu le ñein lumuti haganawa.

30 —Láurügübei hagufeserun saragu gefentiña gayara lan lasiadirúniwa aban áfarahati lun óunweni. Lóuguati lagufeserun ábanrügü gefenti lun lasiadirúniwa aban gürigia lun óunweni.

31 —Siñabei leresibirúniwa seinsu luagu lesefurun aban áfarahati le siádiwaali lun lounwen; gasu lounwen wügüri ligía.

32 —Siñabei leresibirúniwa seinsu lun gayaraabei lan lagiribudun aban áfarahati lageiroun, le aramudaguti lidan aban uburugu le aramudaguagülei lubaragiñe lounwen fádiri íñugutimati.

33 —Madaseira huméi ageiraü le ñeinba lubéi haganawa lau áfarahani, lugundun dasei lumuti áfarahani ubóu, ani úati amu esefuruni luagu áfarahani luéidigia lounwen le áfarahabei.

34 —Madaseira huméi múa le ñeinba lubéi haganawa, le giñe ñeinba lubéi naganawa, lugundun au, le Aburemei, haganagua Ísüraelina naganawa.