1 Gíbetiña bugaha habiñanigu lani Rubén hama lani Gadü türibu. Dan harihinbei luagu buidu lan lumúan Haserü luma Galaadü lun hagüriahóun ibiñanigu, 2 aba houdin lumoun Moisesi, lumoun fádiri Eleasárü luma hamoun ábutigu fulasurugu, aba hariñagun houn:

3 —Ariha huméi: Lóubawagu Atarótu, Dibón, Haserü, Nimürá, Esübón, Elalé, Sebamü, Nebu luma Beón 4 fulasu burí le lagañeirubei Wabureme houn Ísüraelina, anihein saragu sagadi buiti ñein houn ibiñanigu, ani wagía, gíbetiña wabiñanigu. 5 Anhein mariban larihín bun, rubei fulasu le woun, mánhiñuraguagüdabei duna Hordán woun.

6 Aba lóunabuniña Moisesi:

—Busentün san herederun ya, sun añangüra lan hupaisanun wuriburugu? 7 Ka san uagu habusenra lun heferidiruni Ísüraelina haguraasun lun másügürün hamá lidoun ageiraü le líchugubei Wabureme houn? 8 Ligiaméme meha hadügübei hagübürigu dan le nóunahanbaliña Kadesi-barünéagiñe aríaahei fulasu ligía. 9 Chülütiña chülǘ liraüraü duna le Esükólubei aba haríaahani fulasu, lárigiñe aban heferidiragüdüni haguraasun Ísüraelina lun mebelurun hamá lidoun múa le ru laalibei Wabureme Houn. 10 Ligía lubeiti lagañidunbei Wabureme weyu ligía, aba láfiñurun 11 luagu gürigia lan ha áfuridubaña Ehiptugiñe, ha weinti irumu hau lun iñun, marihin habéi lan fulasu le füramase lubéi Wabureme lun Abüraámü, Isaakü luma Hakobu, ladüga mafalarun hamani lau úarani. 12 Kalebürügüñein, le liráü Hefuné le Keneséu, luma Hosué, liráü Nun afalarei Wabureme lau úaraguni. 13 Aba lagañidun Wabureme houn Ísüraelina aba léibugagüdüniña lidan fulasu mageirawati luagu bián-wein irumu, darí lun hóunwegun sun ha anabagubalin lau luriban hóuserun. 14 Guentoti, huguya harahüñü agübürigu gafigountiña, busentün hasigiruni hani hagübürigu hénpulu, áluahaya hagañidagüdüni Wabureme luma Ísüraeli. 15 Anhein mabusenrun hubéi hafalaruni Wabureme, lerederagüdübaña Ísüraelina gíbetima dan lidan fulasu mageirawati, ani huguyaba gadurun luagu hagumuchaguagüdüniwa.

16 Ábati hayarafadun lun Moisesi aba hariñagun lun:

—Le wabusenrubei lun wayaraagun ya houn walügüniña mudún hama bágasu, luma burí wábunagun uburugu houn waduheñu. 17 Lárigiñe ábame wárügüdünu wárumate lau lóufudagun ábame woudin habá habá híbiri Ísüraelina, darí wanügüniña hamúanrugun. Súnmeti dan le añahame waduheñu uburugu séfuñu hawéi ha aganóubaña lidan fulasu le. 18 Magiribudúnbadiwa wábiñoun darime aranseguaaña sun Ísüraelina houngua hamúanrugu. 19 Keiti le luéigiñebei lubéi oubaü le ñéingiñe lubéi laboucha libiti duna Hordán le lunbei wamúanbei lan, mamuriahanbadiwa múa loubafurugugiñe Hordán, ni yagürounmémeraü.

20 Lariñaga Moisesi houn:

—Anhein hagunfulira hererun lun hárügüdünu hárumate lun hageindagun lábugiñe lilurudun Wabureme, 21 anhein hánhiñuragua sun huguya duna Hordán tau hárumate lábugiñe lilurudun Wabureme, ani redei huguyame ñein darí labugaguniña Wabureme sun háganiñu 22 ani gáñeileime ubóu ligía, so gayaraahalime hagiribudun, súnhalime hidaradun luma Wabureme labu hama Ísüraelina. Hánibei múa le lau lugundan Wabureme. 23 Gama lumoun anhein madügün humá ítara, subudi huméi luagu hadügüña lan figóu ligibugiñe Wabureme, ani lachülürüba lan weyu lun habeichún luéigiñe figóu ligía. 24 Bunagua humá lubeiti uburugu habá hiduheñu luma ayarawaguni habá hilügüniña mudún, gama lumoun gúnfuli huméi hererun.

25 Aba hóunabuni:

—Wadügübei le bubeibei woun. 26 Herederuba wámarigu, wasaanigu ha ñǘbürigiña hama sun wabiñanigu ya lidan burí luburugute Galaadü, 27 wagíati, wárügüdaaru wárumate lun woudin wuriburugu lábugiñe lilurudun Wabureme, ítara kei bariñaguni woun.

28 Ábati lariñagun Moisesi lun fádiri Eleasárü, lun Hosué luma houn hábutigu haduheñu türibugu Ísüraelina:

29 —Anhein hánhiñuragua sun wügüriña ha lílana lani Gadü luma Rubén türibu duna Hordán huma, kada aban tau hárumate lánina wuribu lun hageindagun lábugiñe lilurudun Wabureme. Danme hagañeiruni fulasu, ábame híchuguni Galaadü houn hamúanme. 30 Gama lumoun ánhaña mánhiñuragun aranseñu, latokaruba aban fulasu houn haganagua, lidan hageira Kananna.

31 Aba hóunabun ladügawagun Gadü luma Rubén aba hariñagun:

—Wadügübei le lariñagubei Wabureme woun. 32 Wásügürüba aranseñu tau wárumate uburugun Kanán kei lariñaguni Wabureme woun, gama lumoun werederuba lau fulasu le luéigiñebei oubaü le ñéingiñe lubéi laboucha weyu libiti Hordán keisi wani.

33 Ítara liñati líchuguni Moisesi lumúan Sihón, urúei Amoruna, luma Ogu, le lurúeite Basán lau burí luburugute luma burí ichari le geyegubei lau houn lani Gadü luma lani Rubén türibu hama hamidan türibu ha lani Manasési. 34 Aba hararamagüdüni lánigu Gadü uburugu Dibón, Atarótu, Aroerü, 35 Atarótu-sofán, Haserü, Hogübeá, 36 Betü-nimürá luma Betü-arán aba habarieiruni hawéi áganiñu, adüga hagía burí ayarawaguni houn halügüniña mudún. 37 Ha lánigu Rubén, ábaya hararamagüdüni uburugu Esübón, Elalé, Kiriataimü, 38 Nebu, Baali-meón luma Sibümá, aba burí hasansiruni liri líbiri uburugu aba híchuguni hiri luagu le hararamagüdayabei.

39 Aba hebelurun ladügawagun Makirü le liráü Manasési fulasurugún Galaadü lau here, aba hanügüni fulasu, bugá hamaña Amoruna ha ñéinbaña. 40 Ábati líchuguni Moisesi lóubawagu Galaadü houn ladügawagun Makirü, aba hadügün hábiñe ñein. 41 Aba lanügünu Hairü le ladügawagun Manasési fiu hakianpun-agei Amoruna aba líchugun Awotu-hairü tírime. 42 Aba hárügüdüni lánigu Noba uburugu Kenatü luma sun burí fulasu le lábugiñebei laríaahan, aba líchugun Noba luagu, lememe liri guánarügü.