1 Aban irumu lárigiñe háfuridun Ísüraelina Ehiptugiñe, lidan furumiñeti lihatiri irumu, aba ladimurehan Wabureme lun Moisesi lidan fulasu mageirawati Sinaí, lariñaga lun:

2 —Lunti hefeduhani Ísüraelina Luéyuri Esefuruni lidan dan le arufudúbei, 3 weyu katorusu rábounweyu lidan hati ligía, adügeina hameime sun katei le narufudahabei houn ida luba lan hefeduhani Luéyuri Esefuruni.

4 Ábati lariñagun Moisesi houn Ísüraelina lun hefeduhani Luéyuri Esefuruni, 5 aba hadügüni ítara weyu katorusu rábounweyu lidan hati ligía, lidan fulasu mageirawati Sinaí, adügeina haméi sun katei ítara kei lariñaguni Wabureme lun Moisesi.

6 Gama lumoun ñéinñanu fiu wügüriña wíyeeña lárigi haguurun hilaali, ligía lébubei lásiñarun hefeduhani Luéyuri Esefuruni weyu ligía. Aba houdin wügüriña hagía lumoun Moisesi luma Aarón weyuméme ligía, 7 hariñaga lun Moisesi:

—Guruhadiwa aban hilaali, wíyeñadiwa. Mígirunbadiwa lubeiti lun wíchuguni idewesei lun Wabureme lidan dan le lunbei lichugún úara hama híbiri Ísüraelina.

8 Lariñaga Moisesi houn:

—Aguraba humá kaba lan lariñaga Wabureme nun hibügürü.

9 Aba líchuguni Wabureme uganu le lun Moisesi lun lariñaguni houn Ísüraelina:

10 —Sun huguya hau sun hadügawagun, lunti hefeduhani Luéyuri Esefuruni lun nuéirigun. Ha wíyebaña ladüga haguurun hilaali, ha dísebaña, ha lídanbaña wéiyaasu, 11 hefeduhabei weyu katorusu rábounweyu lidan libiaman hati. Lunti héigini mudún ñǘraügili lau híduru gífiti tuma fein maganatu lébini, 12 mígirunga lídangiñe luba le aban weyu, máhalachun hagíame ni aban abun luagu. Efeduha huméi Luéyuri Esefuruni afalareinei sun arufudahani le níchugubei hun ida lubá lan hadügüni. 13 Gama lumoun le mefeduhan lumuti Luéyuri Esefuruni lau sun harumañu lan, ani mama lídanñein wéiyaasu, lagidarúba hádangiñe gürigia. Ladüga michuláni idewesei lun Wabureme lidan lidaani, leresibirubei abeichúni luagu lifigoun.

14 —Terencha ha aganóubaña haganagua gasu hefeduhani Luéyuri Esefuruni luagu nuéirigun úaragua luma arufudahani le ru naalibei. Ligiamémeba lúrudu houn terencha kei houn lílana fulasu.

15 Weyu le tararamunbei sanduariu, tomeme lúbaana daradu, aba ladouragun dúeri tau. Lúmagiñeha rábounweyu ábaha lasaliragun aban katei kamá watu gemeti tigibuagugiñe le adurarubei darí lumoun larugadun. 16 Ítara liña meha lasuseredun súnwandan: Wéyuagu aba ladouragun aban dúeri tau sanduariu, gúñounha aba larihín aban katei kamá watu gemeti. 17 Danha le liñuragun dúeri ligía tigibuagugiñe kianpu, ábaha hagumeserun Ísüraelina awansera, létiha ñein lumuti lararamagua dúeri ligía, ñein hararamagua. 18 Lídanha líchugun Wabureme lúrudu houn Ísüraelina lun hawanserun, ábaha hawanserun o lun hararamagun, ábaha hararamagun, ábatiha herederun ñein sun dan le lerederun dúeri tóugiñe sanduariu. 19 Ánheinha eredera dúeri tóugiñe sanduariu lüti dan, ábaha hararamuni Ísüraelina héibugun lun hetenirun lun heseriwidun lun Wabureme. 20 Ánheinha eredera dúeri tóugiñe sanduariu luágurügü fiu weyu, lariñagunha Wabureme houn lun hawanserun, hawanserun, lariñagun houn lun hararamagun, hararamagun. 21 Aniheinha dan árieburügüñein leredera dúeri, larugan binaafin aba liñuragun lungua; ábatiha hagumeserun éibuga. Wéyuagu kéigubeirügü áriebu, sagü liñuragun dúeri lungua, hagumeserun éibuga. 22 Ánheinha erederagua dúeri bián weyu, o aban hati o aban irumu tóugiñe sanduariu, ábaha hararamagun Ísüraelina, masigihaña habaruaguóun. Gama lumoun keiha liñuragun dúeri lungua ítara hasigiruni haweiyasun. 23 Lídanha lagumadiruniña Wabureme lun hemeraagun, hemeraagun, lidan lagumadiruniña lun héibugun, héibugun. Añahalu eseriwidei Wabureme, ítara kei lariñaguni Moisesi ida luba lan hadügüni.