1 Aba líchuguni Wabureme uganu le lun Moisesi, lun lariñaguni houn Ísüraelina:

2 —Málühadün anhaün belú lidoun ageiraü le Kanán. Anihán ageiraü le lunbei hageirabei lan, anihán burí láfadaragun. 3 Fadaguaü le luéigiñebei suru, láfadaraguba luma fulasu mageirawati le Sin luma lumúan Edomu. Luéigiñe oubaü le ñéingiñe lubéi laboucha weyu, lagumeseruba fadaguaü luéigiñe suru libiti Barana Hilaali, 4 lasigirame luagun suru darí luagun luwübüri Akürabímü, lásügürame Síngiñe, lachülürame darí Kadesi-barünéa. Lasigirame Asarü-adarügiñe darí Asümón, 5 lasigirame Asümóngiñe darí luagun liraüraü duna le fadagubei luma Ehiptu, lagumuchame luagu Barana Mediteraniu.

6 —Fadaguaü le luéigiñebei oubaü le ñéingiñe lubéi lálüda weyu, láfadaraguba luma laru Barana Mediteraniu.

7 —Lun fadaguaü le luéigiñebei nórute, chü humá aban laini lúmagiñe luéigiñe barana Mediteraniu darí luagun wübü Oru, 8 luma lúmagiñe wübü Oru darí luagun lebelaagüle Amatü, lárigiñe darí Sedadü. 9 Lúmagiñe Sedadügiñe, lasigiruba igibu nórute le darí Sifürón lagumuchame luagu Asarü-enán.

10 —Lun fadaguaü le luéigiñebei oubaü le ñéingiñe lubéi laboucha weyu, hadügüba aban laini lúmagiñe Asarü-enangiñe darí Sefamü, 11 Sefamügiñe lun luagun Ribülá, luéigiñe oubaü le ñéingiñe lubéi laboucha weyu libiti Ain; laragachame fadaguaü ligía ñéingiñe, lun luagun oubaü le ñéingiñe lubéi laboucha weyu libiti lagunu le Kineretü, 12 lasigirame luéigiñe duna Hordán lagumuchame luagu Barana Hilaali.

—Anihánba burí le, láfadaragun hageira.

13 Aba líchuguni Moisesi arufudahani burí le houn Ísüraelina:

—Anihán ageiraü le lunbei hafanreinhani hídangua lau ubunuruni; ligía ageiraü le uágubei lariñaga Wabureme lun lichugún houn nefu türibu dimí ha erederubaña, 14,15 kei ibiha hamaali lubéi lánigu Rubén, lánigu Gadü hama hamidan lánigu Manasési le yuubei houn luéigiñe oubaü le ñéingiñe lubéi laboucha weyu libiti duna Hordán ligibugiñe Herikó.

16 Aba ladimurehan Wabureme lun Moisesi, lariñaga lun:

17 —Fádiriba Eleasárü luma Hosué le liráü Nun, afanreinhei fulasu hidan. 18 Gama lumoun wa humá giñe lun aban ábuti hawagu kada türibu lun hafanreinhani fulasu. 19 Añahán wügüriña ha lúnbaña hagúarun hawagu:

«Hawagu lánigu Hudá: Kalebü, le liráü Hefuné.

20 Hawagu lánigu Simeón: Samueli le liráü Amiudu.

21 Hawagu lánigu Benhamín: Elidádü le liráü Kisülón.

22 Hawagu lánigu Dan: Bukí le liráü Hogülí.

23 Hawagu hánigu lirahüñü Hosé: Anieli le liráü Efodu haweigiñe lánigu Manasési, 24 Kemueli le liráü Sifütán haweigiñe lánigu Éfürain.

25 Hawagu lánigu Sabulón: Elisafán le liráü Parünákü.

26 Hawagu lánigu Isakárü: Palütiéli le liráü Asán.

27 Hawagu lánigu Aserü: Aiudu le liráü Selomí.

28 Hawagu lánigu Nefütalí: Pedaeli, le liráü Amiudu».

29 Hagía wügüriña ha líchugubaña Wabureme lun hafanreinhani Kanán hadan Ísüraelina.