1 Aba lariñagun Wabureme lun Moisesi:

2 —Fáyeigüdabaña Madianna lidan hiri Ísüraelina luagu wuribati le hadügübei, lárigiñeme lira ligíaba bounwen.

3 Ábati lariñagun Moisesi houn Ísüraelina:

—Aranse hamá fiu hídangiñe lun wuribu, belú humá Madiaun lun hafayeiragüdüniña luagu hadüga lidan liri Wabureme. 4 Kada türibu gasu hóunahan milu wügüriña wuriburugun.

5 Aba lubeiti hanúadirun milu wügüriña lídangiñe kada türibu, hadan súngubei duusu-míluñanu wügüriña aranseñu lun wuribu. 6 Aba lóunahaniña Moisesi ageindagua úara luma Finesi, le liráü fádiri Eleasárü, ligía anügübarun ílagu sagüráuti tuma burí fidu to lunboun tinwinrúniwa awisaha lun lagumeserun wuribu. 7 Aba hageindagun hama Madianna, áfaragua hamutiña súngubei hilagubei kei lariñaguni Wabureme lun Moisesi. 8 Áfara hamuti Ewí, Rékemü, Suru, Uru luma Reba, seingü urúeigu Madianna, áfara hamuti giñe Balaamü le liráü Beoru. 9 Aba hanügüniña Ísüraelina würiña Madianna adaürǘwa hama sun hasaanigu ha ñǘbürigiña, gidá hamaña habiñanigu hawéi, luma burí katei le gebegibei hama, 10 gudá haméi sun haburugute tuma burí hakianpun-agei. 11 Sun le hagidarubei hawéi, dandu gürigia kei animaalugu, 12 aba hanügüniña lun Moisesi luma lun fádiri Eleasárü, luma houn lílana Ísüraeli, ha agurabahabaliña luagu fulasu mawübüriti Moabü, lubadu Hordán ligibugiñe Herikó.

13 Aba láfuridun Moisesi, fádiri Eleasárü hama ábutigu fulasurugu eresibiraña bóugudi tuéi kianpu-agei. 14 Gama lumoun aba lagañidun Moisesi hama hábutigu súdaragu ha ñǘbuinbaña wuriburugugiñe, 15 aba lariñagun houn:

—Ka san uagu máfaragun hubaliña würiña? 16 Hagía ínchahabaliña Ísüraelina lun hawügürihóun lun Wabureme luma lun háhuduragun lun Baali-peoru lidan lidaani Balaamü, ligía lébubei labeichaguniña Wabureme lau aban igei. 17 Reiti guentó áfaragua humaña sun wügüriña irahüñü hama sun würiña ha furihaña. 18 Würiña ha máfuridungiñabaña, ígira humaña wínwanñu lun herederun habu. 19 Sun ha áfarubaña somu gürigia o ha guruhañabaña hilaali, redei hamá bóugudi tuéi kianpu-agei luagu sedü weyu. Dandu huguya keisi ha adaürǘbaña gasu hachibagun hungua luagu lǘrüwan luma lisedün weyu. 20 Harumagüda humóun giñe sun hadaüragun luma sun ílagu le lauti gueru, le lauti tiyu gábara o le lauti wewe.

21 Aba lariñagun fádiri Eleasárü houn sun súdara ha ñǘdünbaña wuriburugu:

—Aban lúrudu le, le líchugubei Wabureme lun Moisesi: 22 Ílagu burí le golu, pülata, buronse, gürabu, esütáñu o balu. 23 —Sun katei le mágudaditi gasu híchuguni lidoun watu gemeti—, ábame hachibuni lau duna le lánina arumaduni lun larumadun. Katei le burí gágudaditi, gasu harumadagüdüni láurügü duna. 24 Lidan lisedün weyu gasu hachibunu hadaüragun, ábame harumadun lárigiñe gayaraahalime hebelurun tidoun kianpu-agei.

25 Aba lariñagun Wabureme lun Moisesi:

26 —Lau lídehan fádiri Eleasárü hama hábutigu iduheñu, abahüda humaña gürigia hama animaalugu ha hagidarubaña hawéi Madianna, 27 adügabá bián fánreinti hau, bíchigame aban fánreinti houn ha ñǘdünbaña ageindagua, aban houn híbiri gürigia. 28 Adügabá giñe aban fánreinti nun: Lídangiñe le hafanran súdara, dandu gürigia kei bágasu wügüriña, burigü hama mudún, banügame aban hádangiñe kada seingü-san, 29 bíchigeime lun fádiri Eleasárü keisi ídemuei nun. 30 Lídangiñe hamidan ha yúubaña houn híbiri Ísüraelina, dandu gürigia kei bágasu wügüriña, burigü, hama mudún, banügame aban hádangiñe kada dimí-san, bíchigeime houn Lewitagu ha nadagimeinbaña nisanduariunrugu.

31 Aba ladügüni Moisesi luma Eleasárü ítara kei lariñaguni Wabureme lun. 32 Sun le agidarúbei hawéi áganiñu mabahüdünga le hárügüdübei súdara houngua: Sisi-san-ǘrüwa-wein-keinsi-míluñanu mudún, 33 ǘrüwa-wein-duusu-milu bágasu wügüriña, 34 ǘrüwa-wein-aban-milu burigü, 35 hama darandi-bián-milu würiña irahüñü ha máfuridungiña. 36 Lamidan lubeiti le atokarubei houn súdaragu: Ǘrüwa-san-darandi-sedü-milu-seingü-sánñanu mudún, 37 ha ídangiñebaña hichugúa sisi-san-ǘrüwa-wein-keinsi lun Wabureme keisi ídemuei; 38 hádangiñe darandi-sisi-milu bágasu wügüriña, rúatiña ǘrüwa-wein-biama keisi ídemuei lun Wabureme, 39 hádangiñe darandi-milu-seingü-san burigü, rúatiña ǘrüwa-wein-aban keisi ídemuei lun Wabureme; 40 hádangiñe disisi-milu würiña irahüñü, rúatiña darandi-biama keisi ídemuei lun Wabureme. 41 Aba lederegeruni Moisesi ídemuei le yuubei lun Wabureme lun fádiri Eleasárü, ítara kei lariñaguni Wabureme lun.

42 Le aban amidani, le fánreinti le yuubei houn ha híbiri Ísüraelina, le ladireirubei Moisesi lídangiñe hafanreintin súdaragu; 43 ligiaméme hiibe, ǘrüwa-san-darandi-sedü-milu-seingü-sánñanu mudún, 44 darandi-sisi-milu bágasu wügüriña, 45 darandi-milu-seingü-san burigü, 46 hama disisi-milu würiña irahüñü. 47 Lídangiñe amidani ligía lasagara Moisesi aban hádangiñe kada dimí-san, dandu gürigia kei animaalugu, aba líchuguniña houn Lewitagu ha eseriwidubaña lisanduariunrugu Wabureme, ítara kei lariñaguni Wabureme lun.

48 Ábati hayabin ábutigu ha buga háubaña súdaragu lumoun Moisesi, 49 aba hariñagun lun:

—Abahüda wamaaña súdaragu ha buga lábugiñebaña waríaahan, úati ni aban mégeiti. 50 Anihán burí katei lauti golu le ladarirubei kada aban: Bángüli, bagü, arigeilaü luma burí amu uéndeni, lun wíchuguni lun Wabureme keisi esefuruni wawagu guánarügü.

51 Aba heresibiruni Moisesi luma Eleasárü sun katei golu ligía hámagiñe. 52 Hǘrüti sun golu ligía lóugiñe ǘrüwa-san-ǘrüwa-wein-gádürü líburu, 53 lugundun kada súdara barüti somu katei lídangiñe le agidarúbei hawéi áganiñu. 54 Aba lubeiti heresibiruni Moisesi luma Eleasárü golu le hanügübei ábutigu, aba hanügüni tidoun kianpu lánina óundaruni lun laritaguba lan Wabureme hawagun Ísüraelina.