1 Ábati lariñagun Balaamü lun Balakü:

—Adügabá sedü latarü nun ya, aranse buguyame sedü bágasu ñǘbürigiña ha wügüriña hama sedü mudún.

2 Aba ladügüni Balakü le lubeibei Balaamü lun, aba ladagaragüdün aban bágasu luma aban mudún luagu kada latarü. 3 Lárigiñe aba lariñagun Balaamü lun Balakü:

—Rédeiba lurugabu adagaragüdüni lubarügü nidin ariha anhein ñübuin Wabureme adunragua numa. Ábame nasubudiragüdüni bun ka lan lariñagubei nun.

Aba lidin Balaamü luagun aban wübü le ñein lubéi málouga lan, 4 le ñein lubéi larufudagua Wabungiute lungua lun. Aba lariñagun Balaamü lun:

—Aransedina sedü latarü, dagagüda au aban bágasu wügüri le ñǘraügili luma aban mudún luagu kada aban.

5 Ábati líchuguni Wabureme le lunbei lariñaguni Balaamü liyumulugun, lariñaga lun:

—Giribubá le ñeinhin lubéi Balakü, bariñageime lememe nariñagubei bun lun.

6 Aba lagiribudun Balaamü, aba ladariruni Balakü rara lurugabu adagaragüdüni hama sun ábutigu Moábüna. 7 Ábati lariñaguni Balaamü profesía le:

«Lúmagiñe burí áraabu

le luéigiñebei oubaü le ñéingiñe lubéi laboucha weyu,

lúmagiñe Aramügiñe liábingüdana urúei Balakü, lurúeite Moabü.

"Higabu —liña lariñagun nun—, íñaraguabaña Ísüraelina nun,

bayumaha wuribati houn lumutuniña Hakobu".

8 Gama lumoun, ida lubagia níñaraguniña ha míñaragun lubaña Wabungiute?

Ida luba nabusenrun wuribati houn anhein madügün lubalin Wabureme?

9 Aríagu niña houn luéigiñe liñun burí wübü le,

luéigiñe burí wübü le narihaña:

Hóunguañanu gürigia ha,

mítarantiña kei ha híbiri gürigia.

10 Gíbetiña kei kaliki;

saragu haña darí lun siñá lan habahüdǘniwa.

Gúndaatina hamuga lun nounwen kei lirahüñü Bungiu,

lun hamuga ítara lan nagumuchun kei gürigia richaguatiña!»

11 Ábati lariñagun Balakü lun Balaamü:

—Ka san badügübei? Luntia bíñaraguniña náganiñu nanügabu, abunha lubéi abiniraña!

12 Aba lóunabun Balaamü:

—Ariñagatinatia bun luagu lérügüba lan líchugun Wabureme niyumulugun lun nariñaguni nariñaga.

13 Gama lumoun aba lariñagun Balakü lun:

—Keimoun numa lidoun amu fulasu, le ñéingiñe lubéi marihin bubóun lan kianpu-agei luéidigia tibürürün. Bíñaraguañame nun ñéingiñe.

14 Aba lanügüni Balakü Balaamü áraabun Sofimü, lábulugu wübü Pisügá, le ñein lubéi ladüga sedü latarü aba ladagaragüdün aban bágasu wügüri le ñǘraügili luma aban mudún luagu kada latarü. 15 Aba lariñagun Balaamü lun Balakü ñein:

—Rédeiba ya lubadu adagaragüdüni, néibuga adunragua luma Bungiu.

16 Aba liabin Wabureme lubaroun Balaamü, aba líchuguni le lunbei lariñaguni liyumulugun. Aba giñe lariñagun lun:

—Giribubá le ñeinhin lubéi Balakü, bariñageime lememe nariñagubei bun lun.

17 Aba lagiribudun Balaamü aba ladariruni Balakü rara lubadu adagaragüdüni, hau sun ábutigu Moábüna. Aba lálügüdüni Balakü, lariñaga lun:

—Kagia lariñagubei Bungiu bun?

18 Ábati lariñaguni Balaamü profesía le:

«Balakü, liráü Siporu, aganbabána buidu.

19 Mítaranti Bungiu kei ha góunwedadibaña:

Meyeehan liña masansiragun laritagun.

Dan le lariñagun aban katei, adüga lumuti.

Dan le ladügün aban füramasei, gúnfuli lumuti.

20 Ariñagaali Bungiu nun lun nabinihan;

anhein abiniha Wabureme siñati nadüraaguni.

21 Úagili ni aban arihiti marasualugu ni wuribani

hadan Ísüraelina lumutuniña Hakobu.

Anihein Aburemei le Habungiute hama,

ani agúarahatiña luagu keisi urúei.

22 Habungiute le asagarubaliña Ehiptugiñe,

ítara liña houn kéisigubeirügü liganchun bulu bágasu lun lúgubu.

23 Mabaleti abiñarawaguni luagu Hakobu,

meseriwínti abiñarahani luagu Ísüraeli.

Guentoti lunti wariñagun houn Ísüraelina:

"Saraguhali katei buíduburiti ladügün Wabungiute hau!"

24 Liñuraguña ageiraü le lungua keisi aban liñun gáñiti,

ani memeraagunbei darime lagünrinchaguni líliru

guraléime hata ha láfaragun».

25 Ábati lariñagun Balakü lun Balaamü:

—Kei siñá lubéi bíñaraguniña gürigia ha, mabinirabaña giñe!

26 Lariñaga Balaamü lun:

—Ma san ariñagaadina buga bun, luagu lérügüba lan líchugun Wabureme niyumulugu nariñaga?

27 Ábati lariñagun Balakü lun:

—Higabu, nanügaadibu lidoun amu fulasu. Háfuga gúndaabei Wabungiute lun bíñaraguniña Ísüraelina lúmagiñe ñéingiñe.

28 Ábati lanügüni Balakü Balaamü lábulugun wübü Peoru, le ñéingiñe lubéi larihúa sun fulasu mageirawati. 29 Ñein lariñaga Balaamü lun Balakü:

—Adügabá sedü latarü nun ya, aranse buguyame sedü bágasu wügüriña ha ñǘbürigiña hama sedü mudún.

30 Aba ladügüni Balakü le lubeibei Balaamü lun, aba ladagaragüdün aban bágasu luma aban mudún luagu kada latarü.