1 Ñeinñein aban Lewita ladügawagun Keatü gíriti Koré, le liráü Isarü, hámaya ǘrüwa wügüriña hádangiñe lani Rubén türibu, gíritiña Datán, Abirán, ha lirahüñü Eliabü, luma On le liráü Péletü, 2 aba hiñuragun houngua luagun Moisesi. Aba hóundarun bián-san-dimí Ísüraelina hamoun, wügüriña ha agumadihatiña fulasurugu, hádangiñetiña ha eweridihabaña ani buiti ladimurehoun hawagu. 3 Aba hóundaragun sun hagía, aba hagagibudagun luma Moisesi luma Aarón, aba hariñagun houn:

—Hebé hagumadiruniwa! Sun wagía anúadira láadiwa Wabungiute ani anihein Wabureme wama. Ka san uagu habusenra lun huguyaba lan hábutigu lumutuniña Wabureme?

4 Dan laganbunbalin Moisesi katei le, aba labuluchagun darí ladagarun lerebe múarugu, 5 aba lariñagun lun Koré luma houn ha úaradubaña luma:

—Haruga binaafin lasubudirágüdübei Wabureme ka lan lánigubei luma ka lan anuadirúañubei lun, ábame líchuguni idewesei lun. Lérügübei lanúadirun Wabureme gayara lanügün idewesei lun. 6 Anihán le lunbei hadügüni: Barǘ huméi lagei kupali le lani Koré luma le hani lupaanágu, 7 híchigame leñegura watu luma kupali lidoun, ábame hadagaragüdüni ligibugiñe Wabureme haruga. Wügürimeti le lasuesirun Wabureme, ligía anuadirúañubei lun. Ani redei huméi katei le, Lewitagu!

8 Lárigiñe aba lariñagun Moisesi lun Koré:

—Aganba humana Lewitagu: 9 Ni kata san katei le hun, lanúadirunün Wabungiute hádangiñe lílana Ísüraeli luma lun lurugabubadün lan, adaagua humeime kultu lisanduariunrugu Wabureme, ani seriwi huguya houn lílana fulasu? 10 Ánhaali Wabureme lun lurugabubadün lan buguya hama ha híbiri lílana bani türibu, ani guentó busentün giñe san lun fádirigu humá? 11 Lidan linarün katei ni kata Aarón lun hadimurehaba lan wuriba luagu; luagun Wabureme biñuragua bungua buguya hama bánigu.

12 Lárigiñe aba lóunahan Moisesi luagu Datán luma Abirán ha lirahüñü Eliabü, aba hóunahan ariñaga lun:

—Mabusenruntiwa lun woudin. 13 Lóuguagili san basagaruniwa lídangiñe aban fulasu le rísibei ani buidu ligía lun ábunaguni, lun wóunwegun lidan fulasu mageirawati, ani bóugudin luéi lira busentibu wábutibadibu lan? 14 Buguya manügün bumutiwa lidoun ni aban fulasu le rísiti ani buidu ligía lun ábunaguni, míchugun buguya ichari ni inadürigu woun. Busentibu san lun wígiraguagüdün woungua bun lun badundehaniwa kamá hamuga marihintiwa? Uá, mídinbadiwa arihabu.

15 Ábati lagañidun Moisesi saragu, aba lariñagun lun Wabureme:

—Meresibirabéi hadewese! Au magidarungidina ni aban burigü luéi ni aban hádangiñe, madügün au wuribati lun ni aban hádangiñe.

16 Lárigiñe aba lariñagun Moisesi lun Koré:

—Harufudaguame hungua nun, haruga, ligibugiñe Wabureme, buguya habu bupanaagu. Ñeinbei giñe Aarón. 17 Lanügeime kada aban lagei lani kupali ábame líchugun kupali lidoun. Buguya luma Aarón, hanügübei giñe lagei hani kupali, ábame híchuguni lumoun le líbiri bián-san-dimí, ligibugiñe Wabureme.

18 Ábati lanügüni kada aban lagei lani kupali, aba líchugun leñegura watu luma kupali lidoun, aba lidin lurugabun Moisesi luma Aarón tigibugiñe kianpu lánina óundaruni. 19 Óundaragua láañati buga Koré sun lílana fulasu kóntüra hagía tigibugiñe kianpu lánina óundaruni. Ábati lasaliragun luéirigun Wabureme hagibugiñe sun lílana fulasu, 20 ábati lariñagun Wabureme lun Moisesi luma Aarón:

21 —Direi humá hawéi gürigia ha, lugundun nagünrinchaguaaña!

22 Gama lumoun hagía, aba habuluchagun darí ladagarun herebe múarugu, aba hariñagun:

—Bungiu Baba, buguya le íchugubalin ibagari houn sun gürigia, bagañida san houn sun lílana fulasu ladüga lifigoun aban wügüri?

23 Aba lariñagun Wabureme lun Moisesi:

24 —Ariñagabá houn sun Ísüraelina lun hadisedun tuéi muna to ñein habéi Koré, Datán luma Abirámü.

25 Aba lásaarun Moisesi hama ábutigu Ísüraelina lárigiñe aba houdin le ñein habéi Datán luma Abirán. 26 Ábati lariñagun houn lílana fulasu:

—Dise humá tuéi haban wügüriña wuribatiña ha, maguura humá luagu ni kata le hemegen luéi giñe hóunwegun luéigiñe hafigoun.

27 Aba hadireirun gürigia le ñéingiñe habéi Koré, Datán luma Abirán. Datán luma Abirán tubenariñanu haban hau hámarigu hama hasaanigu. 28 Aba lasigirun Moisesi, lariñaga:

—Lauba katei le narufudei hun luagu Wabureme lan óunahabalina adügei sun le nadügübei, luagu mama lan lau nani nungua nadügei. 29 Ánhaña óunwegua wügüriña ha kei hóunwegun sun wügüriña, mámarügüliña Wabureme óunahabalina; 30 gama lumoun anhein adüga Wabureme somu katei le iseri; lun lánhunrenchun múa lun láhuluchuniña lau sun hamegen, hadagarame guribini libiti múa wínwanñu, hasubudirubei luagu wügüriña lan hagía íchugubaña mebereseni luagu Wabureme.

31 Dan lásurunbei ladimurehan Moisesi, aba ladaaragun múa hábugiñe, 32 aba láhuluchuniña sun wügüriña ha óundaragubaña lumoun Koré hau sun haduheñu luma sun hamegen. 33 Aba hábürühan wínwanñu guribinin libiti múa lau sun hálagu, lárigiñe ábaya ladouragun múa. Ítara liña hagumuchagun hádangiñe Ísüraelina. 34 Dan le haganbunbalin sun Ísüraelina ha guririgubaña ñein hagúaragun, aba héibaagun ariñageina:

—Máhulucha láamugawa giñe múa!

35 Óunahati giñe Wabureme aban watu gemeti le áfaragubaliña bián-san-dimí ha águdahabaña kupali.

36 Aba líchuguni Wabureme uganu le lun Moisesi lun lariñaguni lun Eleasárü le liráü Aarón:

37 —Sagabei lagei burí kupali lídangiñe lárigirugu gudáü, ábame lachagaruni leñegura watu le erederubei lidan diseun. 38 Lagei burí kupali le hani wügüriña ha, ha óunwegubaña ladüga hafigouhan, rédeiti anuadirúañu ladüga yúsuati lun lágudahoun kupali nigibugiñe. Adüga humá singi lau lagei kupali ligía lun lafurarúniwa latarü, luma lun leseriwidun keisi eweridihani houn Ísüraelina.

39 Aba labudahani fádiri Eleasárü lagei kupali lauti buronse le buga hámabei wügüriña ha óunwegubaña lidan gudáü, aba lariñagun lun ladügǘn singi lau lun lafurarúniwa latarü. 40 Aban bugaha eweridihani le houn Ísüraelina luagu ua lan ni aban haweidigia ladügawagun Aarón, lun gayara lan layarafadun luagun latarü lun lágudahan kupali lun Wabureme, luéi lasuseredun libe le asuseredubei lun Koré hama lupaanágu lun. Aba ladügǘn súngubei ítara kei buga lariñaguni Wabureme lun Eleasárü lídangiñe Moisesi.

41 Larugan, aba hadimurehan sun lílana Ísüraeli wuriba luagu Moisesi luma Aarón. Hariñaga:

—Huguya háfaraguñanu lumutuniña Wabureme hilagubei!

42 Aba haguriridágun sun hagía geyegua lau Moisesi luma Aarón; gama lumoun hagía aba houdin tidoun kianpu lánina óundaruni. Lidan oura ligía, aba ladouragun dúeri tau, aba lasaliragun luéirigun Wabureme. 43 Ábati lidin Moisesi luma Aarón tigibugiñoun kianpu lánina óundaruni, 44 aba lariñagun Wabureme lun Moisesi:

45 —Direi humá hawéi sun gürigia ha, lugundun nagünrinchaguaaña!

Aba labuluchagun Moisesi luma Aarón darí ladagarun herebe múarugu, 46 aba lariñagun Moisesi lun Aarón:

—Barübei lagei bani kupali, ruba leñegura watu luéigiñe latarü lidoun luma kupali; ábame bidin le ñein habéi lílana fulasu, ábame bamuriahan ferudun luma Wabungiute hawagu, lugundun durungua ligañi Wabureme ani gumeseeli igei.

47 Aba ladügüni Aarón le lubeibei Moisesi lun, aba lidin éibaagueina le ñein habéi lílana fulasu óundaragu. Oura ligía gumeseeli igei le lóunahabei Wabungiute adüga damichi fulasurugu. Ábati ladagaragüdün Aarón kupali, aba lamuriahan ferudun luma Wabungiute luagu hafigoun lílana fulasu. 48 Lárigiñe aba lararamun hamidangua ha hilaguaañabaña hama ha wínwangiñabaña, aba lerederun igei, 49 lau sun lumoun lan oura ligía hilaguaaña katorusu-milu-sedü-san gürigia, mabahüdünga ha óunwegubaña furumiñe lidan lawügürihóun Koré. 50 Dan lagumuchunbei igei, aba lagiribudun Aarón tubenarin kianpu lánina óundaruni lun lóundarun lumoun Moisesi.