1 Lárigiñe aba nadigiragun luagun marichaü le ligibuagubei ubóu le. Aba narihin saragu amudirawagutiña ani óuserawagua hagía. Ayahuahatiña ha óuserawagubaña, gama lumoun úatiña kaba lan íderaguaña. Úati íderagutiña ladüga hámañein lan ha éibaahabaliña ubafu. 2 Ligía naritagunbei luagu fuleseiwa hamá ha hilaguaañabaña sügǘ hau ha nibagarigiñabaña; 3 gama lumoun fuleseiwatimatiña ha mágurahoungiñabaña, lugundun marihin hamagili wuribani le adügǘbei ligibuagu ubóu le.

4 Ariha numuti giñe luagu barǘ lan wadagimanu gimugaü houn gürigia hádangua, ani katei giñe málati lira, kéigubeirügü hamuga habusenrun hárügüdüni garabali.

5 Hariñahare gürigia: «Chagua lumuti ibidiougua tau larüna, günringua ligía lúniwagua». 6 Gama lumoun nariñahare: «Buítimati aban úhabu buin lau emeraaguni sügǘ lau biama lau lubucha uagu ladügarügü labusenrun lárügüdüni garabali».

7 Dan le nadigiragun luagun ábanya oubaü, ábaya narihin aban katei málati ligibuagu ubóu le: 8 Aban wügüri lábuguarügüti, le mamadaguti, marahüñü, mábirigu, le márügüdünti ni murusun dan lun lemeraagun, mabuchadaditi luagu aríaguei lirisin, málügüdagunga ligía lungua ariñaga: «Ka san ubá nuadigimarida saragu? Ka uagu memeraagun nubéi?» Katei giñe málati lira, aban anügüni le hǘrüti.

9 Buítimatiña biama luéi aban, lugundun wéiritimati hafayeiruaha luagu hawadigimari. 10 Ani anhein éiguada aban hádangiñe, liñuragubei le aban. Gama lumoun fugiabu le éiguaduti ani lábuguarügüñein, ladüga úabei kaba lan iñuraguei! 11 Ani ánhaña giñe arounra biámagua lidan aban habacharaguba hawougua, ánheinti ábanrügü, ida lubagia labacharagun? 12 Ábanrügü lábugua ménrengubei láfarahoun, gama lumoun biámagua hénrengubei háfarahoun. Gúrudu le ǘrüwaguati, hénrenguti látumuragun.

13 Buítimati nibureingili le gudemeti ani chuti lau sügǘ lau urúei wéiyaali gama lumoun ibidiouguati lau, ladüga máhaali lun lererehóuniwa lun. 14,15 Íbini furisunrugúgiñe lan liabin nibureingili le lunbei larúeihan leweñegua urúei ligía o lídangiñe lan gudemei liabin lun larúeihan. Ariha numuti luagu lúmagiñeñanu lan sun gürigia ha lílana ubóu le. 16 Ani lau sun gibe hamá gürigia ha lúnbaña lábugiñebaña lan larúeihan, ni gürigia hagía, ni hadügawagun magundanbaña lau. Katei giñe málati lira, ítara liña kei labusenrúniwa lárügüdün garabali.