1 Buítimati buidu lan ladimurehóuniwa luagu gürigia

sügǘ lau ibiñein buiti.

Buítimati luéyuri óunweni

sügǘ lau luéyuri águrahouni.

2 Buítimati lidiniwa ábunaha sügǘ lau lidiniwa efeduha,

lugundun óunweni hagumuchagülebei sun gürigia,

lunti hamugati haritagun ha wínwangiñabaña luagun.

3 Buítimati ayahuni sügǘ lau éherahani,

lugundun wuribati ladüga ayahuni lun igibu

gama lumoun buiti ladüga tun anigi.

4 Saminati chu tau luagun óunweni,

ánheinti ibidiougua tau,

sun lisaminan luagun lefeduhan.

5 Buítimati laganbún leweridihan chu tau

sügǘ lau habimehan ibidiougua tau.

6 Lugundun ítara liña léherahan ibidiougua tau

kei láhurahan hiiyu wáturugu,

ani katei giñe málati lira.

7 Ibidiouguagüda lumuti anarimeni lau chu tau,

günringua lumuti giñe idewesei lóuserun.

8 Buítimati lagumuchun aban katei

sügǘ lau lagumeserun.

Buítimati gaguraasun ban

sügǘ lau ganigi ban.

9 Mígiraguagüdaba bungua lun igañi, lugundun gürigia ibidiougua tau agañidubaña.

10 Málügüdaguaba bungua ka lan uagu buídutima lubéi sun dan le sügühalibei, lugundun mama álügüdahani lánina lichú aau lira.

11 Buítimati lichú aau houn ha awinwandubaña ya ubouagu, anhein anihein lubéi aban alagan úara luma lichú aau ligía. 12 Lugundun ounigihati lichú aau kéigubeirügü seinsu, gama lumoun buítimati lichú aau ladüga ruti ibagari lun chu tau.

13 Arihabá buidu lun katei le ladügübei Bungiu: Kábagia gayara lásuuragüdüni le segé laalibei Bungiu? 14 Dan le buidu lan lidin bun, efeduhabéi lubuidun dan ligía, gama lumoun dan le wuriba lan lidin bun, haritaguabá luagu Bungiu lan íchugubalin biángubei katei ligía, ani ibidiñeti giñe lun gürigia kaba lan lanüga dan le machülügilibei lun.

15 Ariha naali sun le, lidan katei málati le nibagaribei: Hóunwegun gürigia buítiña lau sun hareidun, ánheinti wuribatiña nibagaritiña saragu dan lau sun hariban.

16 Moun lumuti lásügürün lueirin bubuidun,

ni lun lásügüragun lueirin lichú bau,

kábagia uagu lagadeiragúa gürigia lungua?

17 Másügüraguala buriban,

ni libidiounigan bau,

kábagia uagu wóunwegua lubaragiñe dan?

18 Le buídubei lun ladügǘn,

lun lárügüdüniwa aban katei buidu mígiragüdünga le aban.

Le íchugubei inebesei lun Bungiu

buídubei láfuridun lídangiñe sun katei le.

19 Rútimati lichú aau erei lun chu tau

sügǘ lau híchugun diisi agumadihatiña erei lun aban uburugu.

20 Lau sun lira, úati ni aban gürigia úaraguati ubouagu le adügüti buiti súnwandan lun mafigouhanbei lan.

21 Madügabá gasu lau sun le ariñawagúbei, ítara luba maganbunbani danme ladimurehan bumusun wuriba buagu. 22 Íbini buguya, subudi bumuti giñe buidu luagu adimureha ban wuriba hawagu amu saragu wéiyaasu.

23 Houcha numuti sun le lau lichú aau, nariñaga: Náluga lachuurun nau; gama lumoun díseti buga lichú aau nuéi. 24 Sun le aniheinbei, díseti nuéi! Huliliyati ani siñati gunfurandawa lan!

25 Ábati níchaagun nungua lun nárügüdün subudi, lun naturiahan áluaha lóunabaha nálügüdahan. Aba narihini luagu mabuidun lan libidiounigan aau, lílülün lan aau lidere ichügü.

26 Darihadina aban katei gífitimati sügǘ lau óunweni: Würi to gasadaranboun tidan tanigi, to muruboun óuburahan lau tarüna. Ani le unbei hínsiñehabu lan Bungiu lesefuruba tuéi, ánheinti le gafigounbei lábürühaba tidoun tisadaran.

27 Lidan náluahan nadariruni lébuna burí katei, au, le apurichihati, anihán burí katei le nadarirubei: 28 Luagu madari nágili lan le náluahabei! Darihadina aban wügüri haganagua milu, gama lumoun madaritina ni aban würi hadan sun würiña. 29 Ábanrügüñein katei nadarirun, anihán katei ligía: Luagu úaragua lan ladügüni Bungiu wügüri, gama lumoun añawariguaali wügüri lungua.