1 Aban werewere hilaali,

híngiti ani féridigüda lumuti lubuidun líhemen ibiñein.

Abahüdǘwatimati libidiounigan aau le furesebei

sügǘ lau lichú aau le inebewatimabei.

2 Luagun katei le buídubei

labalacha lisaminan gürigia le chubei au,

ánheinti ibidiougua tau

luagun katei le wuribabei labalacha lisaminan.

3 Le ibidiouguabei au,

arufuda lumuti lugudemen lisaminan lidan sun le ladügübei,

íbini lidan lariñagun luagu ha lan híbiri ibidiouguabaña au.

4 Anhein agañida le agumadihabei buma,

meferidirabéi bichügü;

ladüga lanügǘn katei lau gálumaü

láranibei bulíeiguaü le wéiriti.

5 Arihaadina aban bulíeiguaü adügǘti ligibuagu ubóu le, ani hádangiñe guánarügü agumadihatiña liabin: 6 Luagu rúa lan aban ubaraü íñuguti lun ibidiougua tau, lichugúati ubaraü ǘnabuti houn gürigia ha chúbaña au. 7 Arihaadina burí idamuni luagu gabayu, ánhaña burí harahüñü urúei eibu kamá hamuga idamuni hagía.

8 Le achigiti huyu, héiguati lidoun.

Le abouchaguti baríeiru gürǘ tumuti hewe.

9 Le abouchaguti dübü, buleseiti lau.

Le abouhati watu, ménrengubei láchuagun lungua.

10 Anhein agumucha tamana harawa lunya mayaradún tan,

mosu héretima lan lagayuahóun tau.

Buítimati ladügǘn katei buidu ani lau lichú aau.

11 Kagia un hu lan aban arumaagüdüti hewe,

anhoun ágürüha hewe lubaragiñe larumaagüdünu?

12 Hínsiñeguti lererun gürigia chu tau.

Ánheinti ibidiougua tau barüti lererun günringuaü lun guánarügü;

13 lagumesera adimureheina libidiounigan aau,

lagumucha ariñageina luriban-agei dimurei.

14 Memegeirunti dimurei lun ibidiougua tau!

Ka gayaraabei lariñaguni le lunbei lasuseredun,

ibidiñounga le lunbei liabin ni ka un?

15 Héreti láfaagun ibidiougua tau lungua nadagimein,

darí lun ibidiñe lan ni lémeri uburugu lun.

16 Fugiabu ageiraü le ñǘraügilibei lurúeite,

ageiraü le ñein lubéi harugadúa lirahüñü urúei lidan fedu!

17 Fuleseiwati aban ageiraü le garúeiteti aban urúei le inebewati,

le ñein lubéi heiga agumadihatiña lidan lidaani éheraaguni,

lun hárügüdüniya here, mama lun habacharuadun!

18 Ha magúalibaña, héiguati tábulugu haban;

ha madügünbaña ni kata, héiguatu haban sunsuinagubei.

19 Fein luntu teigín,

diwéin lun lefeduhóun ibagari;

gama lumoun lun sun lira mégeiwati seinsu.

20 Madimurehabá wuriba luagu urúei ni íbini lidan baritagun.

Madimurehabá wuriba luagu rísiti,

íbini bábuguarügüñadibu lan,

lugundun áhamahatiña dunuru

ani gayaraabei houdin ariñagei lun.