1 Deregeguaadina nungua sunsuinagubei lun burí katei le, lúnrügü nadariruni luagu lúhaburuguñein lan Bungiu hawadigimari gürigia buítiña hama gürigia chu tau. Ibidiñeti luáguti ínsiñehabuni luma iyereehabúni lun gürigia, ni íbini danme lábugiñeñein lan larihin. 2 Ábanmeme katei agurabubaliña súngubei: Le úaraguabei luma le múaranbei, le buídubei luma le wuribabei, le harumabei luma le wíyebei; le adagaragüdübei luma le madagaragüdünbei, dandu le buídubei kei le gafigounbei le áfiñurubei kei le máfiñurunbei.

3 Anihán katei le wuribabei lídangiñe sun le asuseredubei ya ubouagu: Ábanmeme lan katei agurabubaliña súngubei. Luéigiñe aban oubaü, buin liña lisaminan gürigia lau wuribani, lau libidiounigan aau lidan sun libagari; lárigiñe sun lira, ganbusandun!

4 Hemenigitimati le gabagarigilibei, ladüga buítimati ounli wínwangili sügǘ lau liñún hilaali. 5 Ha giñe wínwangiñabaña subudi hamuti luagu hóunweguba lan, ánhaña ha hilaañabaña ibidiñeti ni kata houn, magañeirun hagía ni kata, lugundun rúaña lidoun bulíeiguaü. 6 Ñein lagumucha hínsiñehabu, hayereehabu luma hayumahan, mafanrandigiaaña lidan ni kata lídangiñe le adügǘbei ya ubouagu.

7 Ítara liña lubeiti! Houboun beigan fein gurabóunme buniñe diwéin lau ugundani, ladüga gúndaahali Bungiu lau le badügübei. 8 Dáüguaba daüguaü harutu súnwandan; ru buguyame ibiñein bábulugu. 9 Efeduhabéi bibagari tuma würi to hínsiñeboun bun, lídanmeme ibagari le líchugubei Bungiu bun ya ubouagu. Ligíarügüba basagara lídangiñe saragu buadigimari ya ligibuagu ubóu le. 10 Sun le gayaraabei badügüni, adügabéi lau sun biyaraati; lugundun lidan umúahaü, le lunbei ñéinhinba lan badagara, madügǘnti ni kata ñein maritawagún ni kata, úati subudi ni lichú aau ñein.

11 Anihein giñe aban katei narihin ligibuagu ubóu le: Luagu mama lan ha furesebaña agañeirubalin éibaaguni, ni ha ganigibaña agañeirei wuribu; luagu mama lan súnwandan geigan hamá chu tau fein, marisin hagía huali tichügü, meresibirúniwa hagía furendeitiña buidu súnwandan, sun hagía agurabarügütiña murusun lidaani ubunuruni: 12 Luéigiñe le aban oubaü, ibidiñeti lun ni aban ídaba lan lachülüra lidaani lun: Ítara kei tanügüniña seni úduraü, ítara kei hábürühan dunuru tidoun sádara, ítara liña giñe gürigia lidan magaradahan lan, ligía lábürühan.

13 Anihein giñe aban katei narihin ya ubouagu le ídanbei nariha aban óunwenbu arufudahani: 14 Aban liraüraü uburugu, hau fiuraü gürigia aganóutiña lidan, ábürühati aban urúei gabafuti luagun, aba legeyedaguni lun lageindagun luma. 15 Lidan uburugu ligía anihein aban wügüri gudemeti aganóua ñein, gama lumoun chuti lau ani gayaraabei hamuga lesefuruni uburugu lau lichú lau, ani úati aritaguti luagun!

16 Gama lumoun chouru numuti luagu buítima lan chu lan lau gürigia sügǘ lau ganigi lan, íbini anhein mabahüdǘn lubéi lichú lau gürigia gudemeti meberesenwa ligía lau le lariñagubei.

17 Aganbúatimati hererun chu tau lau darangilaü

sügǘ lau lagúarahan harúeite ibidiougua tau.

18 Buítimati lichú aau sügǘ tau áruma to lánina wuribu.

Ábanrügü bulíeiguaü barüti óunwenbu günringuaü.