1,2 Anihán lererun apurichihati, le liráü Dawidi, le meha arúeihabei Herusalén.

Málati sun katei! Sun katei málati!

3 Ka lagañeirubei gürigia lau luadigimari saragu ya ubouagu?

4 Híbiri águrahoua, híbiri óunwegua,

gama lumoun masansiragunti ubóu.

5 Furiti weyu, dubú ligía,

ábaya lagiribudun lidoun lubara lunya láfuridun.

6 Futi garabali luagun suru,

lárigiñe aba lagararaagun luagun nórute.

Agararahati garabali!

Gararaguati ani gararaguaya ligía!

7 Sun duna baranahoun léibaagua

gama lumoun mabuinchunti barana;

sun duna giribuyati lárigoun lidoun fulasu le ñéingiñe lubéi láhücha

lunya léibaaguni ümaméme ligía.

8 Úati ni aban gayaraati lariñaguni furangu

ida liña lan labuchadun hawagu gürigia lubá sun katei;

úati giñe arihiti ni aganbuti le gumuti lun gufurumabei lan.

9 Úabei ni kata lun úagili lan meha;

madügǘnwabei ni kata le madügǘnwañahagili.

Úati ni kata iseri ligibuagu ubóu le!

10 Súnwandan ñeinbei lan ariñaguti:

«Anati le, iseri!»

Gama lumoun aniheinhali meha saragu dan wabaragiñe.

11 Katei burí le sügühali, bulíeiwaali,

labulieidúaba giñe le lunbei liabin

hadan ha lúnbaña hayabin lárigiñe.

12 Au, le apurichihati, lurúeite meha Ísüraeli au Herusalén.

13 Rúguatina meha nungua sunsuinagubei lun naturiahani luma lun nasubudiruni lau lichú aau sun le adügǘbei ligibuagu ubóu le. Hǘrüti anügüni le líchugubei Bungiu hawagun gürigia lun lǘnabudagüdüniña lau!

14 Aba nasubudiruni luagu málati lan sun katei le adügǘbei ligibuagu ubóu le, kéigubeirügü hamuga wabusenrun wárügüdüni garabali.

15 Siñati lásuurawagüdüniwa le segebei,

ni lun babahüdüni le úabei buma!

16,17 Ábati nariñagun núniwagua: «Anahán, aban gürigia wéiriguti, chuti nau sügǘ hau sun ha arúeihabaña Herusalén nubaragiñe, deregeguatina nungua sunsuinagubei lun nahulilidun lidan lichú aau luma subudi, luma giñe lidan libidiounigan aau luma lilouguan ichügü, lúnrügü nasubudiruni luagu labusenrúniwa lan lárügüdün garabali lira». 18 Lidan linarün aban katei, gaweiridun ligía lichú aau, gaweiridun asufuriruni; gagibedun ligía lisubudin gürigia, gagibedun ligarigu.