1 Ka gayaraabei líchaagun lungua lóubawagu chu tau? Ka gayaraabei lasubudiruni lébuna burí katei? Harugoungadagüda lumuti lichú aau ligibu gürigia, adüga ligía lun lasansirun lihürü ligibu.

2 Gúnfulibei le lubeibei urúei, lugundun ítara liña báfiñuruni ligibugiñe Bungiu. 3 Máfuridaba ligibugiñegiñe lau saragu furesei, madan labu burí katei wuribati, lugundun, gayaraati ladügüni le labusenrun. 4 Lúmañein urúei lagumuhóun dimurei, ani úati ni aban lun lálügüdaguni luagu sun le adüga láalibei.

5 Le agunfuliruti aban lúrudu, masuseredunbei ni kata wuribati lun, ani le chubei au gunfuranda lumuti ídaame lan ani ida luba lan lagunfuliruni. 6 Le linarün aban katei, anihein dan luma igaburi lun ladügǘn sun le adügǘbei, gama lumoun le lánibei gürigia turobuli 7 ibidiñe lan lun kaba lan asusereda, ua ligía kaba lan asubudiragüdei lun.

8 Úati gürigia gabafuti lun leredehani ibagari, ua ligía gabafuti luagu óunweni. Úati lunti lesefurun lídangiñe wuribu le. Gürigia le wuribabei, mesefurun lubéi luriban.

9 Anihán sun katei le narihibei, dan le níchaagunbei nungua sunsuinagubei lun nasubudiruni ka lan adügǘbei ligibuagu ubóu le, luma ubafu le luágubei gürigia lun ladügün damichi lun gürigia líledi.

10 Arihaadina giñe luagu gürigia lan ha wuribabaña, ha mídindadibaña lidan fulasu sánduti, adimurehóua lan buidu hawagu dan le hábunahoun; ani maritawagúnti wuribani le bugaha hadügübei lidan uburugu le ñein lubéi hadügei. Málati giñe katei lira. 11 Lugundun, anhein masiadirún gürigia lárigiñe ladügün wuribani, lerederamémeba aritagua ladügün wuribani. 12 Ítarati, le abagaridubei lidan figóu, migifeti libagari! Le nasubudirubei luagu buidu lan lidin houn ha inebehabubaña lun Bungiu; 13 ánhaña ha wuribabaña, wuribabei lidin houn, sügüti habagari kei lásügürün aban lamuñounga, ladüga marufudun hamá inebehabu ligibugiñe Bungiu. 14 Ya lubeiti ligibuagu ubóu le, susereti katei málati, hasufurirun gürigia buítiña kamá hamuga wuribatiña, luma giñe hagundaarun gürigia wuribatiña kamá hamuga buítiña. Nariñahare luagu katei lan giñe málati sun lira!

15 Ligía lúmagiñeñadina lubéi ugundani. Ani lubuidun-agei katei le lunbei ladügüni gürigia ya ligibuagu ubóu le, lun leigin, latun luma lefeduhan, lugundun ligíarügüñein eredera lun lídangiñe luadigimari lidan ibagari le líchugubei Bungiu lun ligibuagu ubóu le.

16 Gíchaagun áutima nungua lun nafurendeiruni, lun nasubudiruni luma lun narihini —sun le adügǘbei ligibuagu ubóu le chülüti dan lun siñá lan larumugun gürigia ni murusun—, 17 arihatima numuti luagu siñá lan gunfurandalani gürigia le ladügübei Bungiu ni le asuseredubei ya ubouagu. Ida lan yebe láfaagun lidan sun luwuyeri áluahei lóunabagüle, madari lubéi; lau sun ariñaga lan chu tau luagu subudi lani, lidan linarün katei siñá lágili adarira.