1 Badigibei funagia Lewiatán lau aban günwi?

Gayaraabei funagia bagüürünu liñeñe lau aban gúrudu?

2 Gayaraabei funagia básügüragüdün aban fítaru luéigiñe lígiri

odi báfuduraguni lan láribugu lau aban pini?

3 Layumuraguba funagia bun lun gudemehabu ban lun,

odi lamuriahaba buma lau dimurei bímeti?

4 Badügüba funagia lun füramase lan bun

luagu bidamunbei lan lun sun dan?

5 Báhureruba funagia luma kei luma aban liraüraü dunuru?

Bagüragubei funagia kei hadibiri birahüñü?

6 Lasigenehóuba funagia luagu mágidurugu?

Lapiisihóuba funagia lun lalugurahóuniwa?

7 Gayaraabei funagia bachülaaguagüdün gimara luéigiñe lura,

odi arufun lan lábulugugiñe?

8 Ánhabudügü hamuga íchiga búhabu luagu,

ladügüba aban ageindaguni buma le lunbei mabulieidunbani,

ani madügündigia báalime.

9 Furumiñeguarügü le arihiti Lewiatán,

lábürühaba le anufudei.

10 Ánhabu añawariha lun, lagañiduba;

úati ni aban gayaraati lagagibudagun luma.

11 Kábagia agagibudagua luma

lun láfuridun magadiñeñu ani séfuñu?

Úati ni aban ubouagu!

12 Magumubei níriduni lugudi

luma lere le móubawabei.

13 Kábagia gayara lagidaruni gueru le adouragubei lau

odi láfudurunu lan ladaüragun to dóbuliboun to ágüdahabalin?

14 Kaba gayara ladaaruni liyuma

le ñein lubéi lanarime burí lari?

15 Ítara liña lanagan kei lagürüga idáü

daruguati ani deré ligía kei dübü.

16 Wéiriti lámurudagun luougua

darí lun ni lan garabali siñati lásügürün labadinaguagiñe.

17 Wéiriti dungu liña lan darí

lun siñá lani ni aban afanreinragua.

18 Ítara liña látiñuhan kamá labirihaniga,

ámirihati lagu kei weyu dan le larugadun.

19 Furiti watu gemeti liyumulugugiñe,

achubaha ligía life life watu ñéingiñe.

20 Furiti gumuleli lígirugugiñe

kei lídangiñe aban sóudieru le áhurahati wáturugu.

21 Durunguati leñegura watu lau lawaragun,

furiti watu gemeti liyumulugugiñe.

22 Héreti ligiina

darí lun hanufudewa lan luéi.

23 Íbini fulasu le gágürügübei luagu lúgubu,

deregüdati ani deré ligía kei gürabu.

24 Deretu lanigi kei dübü wéinamuti,

kei dübü le amuligülei.

25 Dan le lásaarun, hanufudeguatiña búngiugu,

aba hanurahan lau anufudei.

26 Ni eféin, ni arufun, ni gimara,

meseriwíntu lun lageindawagun luma.

27 Ítara liña gürabu lun, kei sagadi sáühali,

liabin buronse, kei wewe ñalaali.

28 Méibaaguagüdün tumuti gimara,

lachüürawagun dübü luagun,

kéigubeirügü lachüürawagun sagadi sáühali luagun.

29 Lagayuahóun luagu lau galufa,

kéigubeirügü lagayuahóun luagu lau maburu.

Éherahati dan le laganbuni lamuri arufun.

30 Dan le laduruuhóun, awouha lumuti múa,

kamá hamuga lau reeka hamanati ladügei.

31 Áhuraagüda lumuti barana kei duna lidan sóudieru;

kei aban sóudieru lun lamigisirún ibiñein.

32 Ámirihati duna lárigi lásügürün,

kamá hamuga ídiburi garubaali.

33 Úati ni kata lenege ubouagu;

lun masandi lan anufudei ladügǘwa.

34 Ageindaguati íbini hama ha hanarimetimabaña,

ligía harúeitebei sun animaalugu gáñitiña.