1,2 Buguya, le buga busenbei baguserun numa

au le Suntigabafu,

haritaguagidibu san bóunabunina?

3,4 Kábagia nóunaba au le ni kátabei?

Himei numuti nerederun maniñu.

5 Adimurehaadina saragu wéiyaasu,

ani úaali ni kata lun nariñaguni.

6 Ábaya ladimurehan Bungiu lun Hobu laganagua luriban dan, lariñaga lun:

7 Arufudabéi ganigi le buágubei nun guentó,

óunababei álügüdahani le nun.

8 Busentibu funagia bariñagun luagu maricha nan

ani gadurun au,

rédeirügaadibu ligía kei madurunti?

9 Héretibu funagia kei au?

Ítara liña funagia lere bumalali kei numalali?

10 Daruguabáti baugua lau uéiriguni luma inebesei,

daruguabá lau uéiriguni luma uéndeni.

11 Arihabá houn sun ha barüguabaña houngua:

Arufudabéi bigañi houn ani ǘnabugüdabaña.

12 Huchubaña láurügü barihin hawagun,

bureguabáña wuribatiña le ñein hamuti.

13 Bunabaña súngubei lábugiñe múa

dáguabaña tidoun hafurisun hilaaña.

14 Ábameti nánharun luagu bubafu lan

íchugubalin agañeiruni bun.

15 Arihabá lun óunwenbu animaalu Beemotu,

nadügün kéigubeirügü nadügün ban,

houti híduru kei bulu bágasu;

16 Arihabá lere lanagan,

arihabá luéinamun liyada.

17 Dereti lili kei hibúari,

anihein erei lidan liyada.

18 Ítara liña labu kei peipu lauti buronse,

ítara kei gürabu miginaguti.

19 Nadüga sun lira lau lichú nau,

áurügüñein le adügübalin, gayara náfarahani.

20 Luéigiñe wübü le ñein lubéi háhurera animaalu gáñitiña,

ñéingiñe hanüga híduru lun leigin.

21 Rounti lábugiñe híduru dúnaruguna,

aramudaguati labadinagua maburu le suánpurugubei

22 Ruti híduru dúnaruguna lamuñounga lun,

geyeguati lídibu wewe le láruti duna lau.

23 Anhein iñura duna, manufudedagunti;

íbini lachülürün duna luagun liyuma, darangilu liña.

24 Kagia gayaraabei lárügüdüni lun lasagaruni lagu

odi ladahirun lan aban gúrudu luéigiñe lígiri?