1,2 Lubuidun-agei dǘgüdaguaü le gayaraabei híchugun nun,

lun haganbuni nererun.

3 Gaguraasun humá danme le nadimurehan,

lárigiñeme ábame héherahan anhaün busén.

4 Mama luma ni aban gürigia nawuribuha,

ligía luéirinbei maguraasun nan.

5 Ánhana haganba,

herederuba maniñu lau anufudei.

6 Au guánarügü, dan le nasaminarun luagu,

beluti anufudei nun, aba ladadagarun núgubu.

7 Ka san uagu gabagarimeme habéi gürigia wuribatiña,

chülǘ hagía aweiyada buin lau ubafu?

8 Ariha hamuti haweinamudun hasaanigu hama habañanigu,

ani chóuruti hasandiragun houngua hóubawagu.

9 Séfuñutiña haban luéi anufudei;

mabeichun lumutiña Bungiu.

10 Súnwandan hemeilihan habiñanigu,

ani gaweinamudaditiña ha emeilihóubaña.

11 Éibaaguañaha haña hasaanigu

áhurera hagía kei harahüñü mudún;

12 Abinahatiña, achubaha hagía lau ugundani

dan le haganbun tafarún árüpa, garanwoun tuma fidu.

13 Lidan lubuidun dan hagumuchei habagari;

darangilañu hararira lidoun hamúaha.

14 Ariñagatiña lun Bungiu:

«Ígirabawa woungua,

mabusenrúntiwa wasubudiruni bilurudun!

15 Káteiñeigia Suntigabafu lun weseriwidun lun?

Kagia wagañeiruña lau wafurieidún lun?»

16 (Gama lumoun gürigia wuribatiña,

mama hagía laburiñabaña lubuidun hadaani.

Mabusenruntina nasaminarun kei hagía!)

17 Ídabugañahagia léñegucha hagemeri wuribatiña?

Ídabugañahagia hábürüha lidoun lamiselu?

Ídabugañahagia lagañida Bungiu hama

ani aba lasufuriragüdüniña?

18 Ídabugañaha hachagarawagua kei sagadi

sáühali le lanügün garabali?

19 Ariñawagúati luagu fáyeigüda lániña

Bungiu isaanigu luagu hadurun hagübürigu.

Gama lumoun ha wuribabaña hagía guánarügü

lunbei hafayeihan luagu hadurun lun hafurendeirun.

20 Hagía lúnbaña habihini abeichúni

le lánina ligañi Suntigabafu.

21 Hilaaña ligía,

kámegia hama ánhaña asufurira tílana haban?

22 (Gama lumoun, Kagia gayaraabei larufudahan lun Bungiu,

le aguseragüdübaliña íbini ha aganóubaña sielu?)

23 Añahein gürigia óunwegutiña buin lau erei,

gúndaañu ani darangilu,

24 buin lau lubuidun dan luma lubuidun átuadi.

25 Gama lumoun añahein amu lidan magundani habagarida,

hilaguatiña móuchunga haméi ugundani luma lubuidun dan.

26 Lau sun lira, aban habu súngubei lidan umúahaü,

sun hagía hou hamutiña héweraü.

27 Subudi numuti ka lan haritagubei nuagu,

luma burí luriban aritaguni le hídanbei.

28 Ariñagatün húnguarügü:

«Angia funa san luban wuribati lügüra hagóun funa san?»

29 Madimurehangidün san hama gürigia ha adügütiña wéiyaasu?

Maganbun humagili san katei le burí habahüdagubei:

30 Luagu dan lan le lagañidun Bungiu,

óunaha lan aban lamiselu

ani masuseredunti ni kata houn ha wuribabaña?

31 Madimurehanti ni aban houn hagibuagun luagu hóuserun,

mafayeirúntiña luagu le hadügübei.

32,33 Danti le hanügǘn abunúa,

mama hibe ábunahatiña,

híbiri habá habá, híbiri hárigi hárigi,

añahein giñe erederutiña óunigirei hamúaha,

íbini múa, ñuluti houn.

34 Málati habusenrun híchugun dǘgüdaguaü nun!

Marasualugu sun le hariñagubei!