1,2 Le chubei aau, móunabunti lau dimurei burí málati,

mapantahan ligía lau burí irichaü le garabalirügüti;

3 madimurehanti lúnrügü ladimurehan,

mayusu ligía dimurei le málati.

4 Ánheinti buguya busentibu bagumuchun lau linebenwa Bungiu,

günringua bumuti eseriwiduni le surubei!

5 Luriban basandiragun bungua adimuregüdübadibu ítara,

lun bayusurun dimurei burí lánina marasualugu.

6 Memegeiruntina níchugun bidurun,

siadi lumutibu biyuma guánarügü.

7 Haritaguatibu san luagu buguya lan furumiñebei gürigia ubouagu

odi buguya lan ubouagubei lubaragiñe burí wübü?

8 Haritaguatibu san luagu buguya lan adundehabalin Bungiu,

odi buguyarügüñein lan chu tau ubouagu?

9 Kagia basubudirubei lun ibidiñe lan woun?

Odi gunfurandatima bumuti katei sügǘ wau?

10 Gürigia wéinamuhaña wagía

arufudahaali ibagari woun sügǘ lau lun búguchi!

11 Memeniti san bun lámalihanibu Bungiu guánarügü,

luma wadimurehan bun lau lámarun?

12 Ka uagu bígiraguagüda bungua lun bigarigu,

ani ámuruhabei bagu lau iyereehabúni?

13 Ka uagu bagañida luma Bungiu,

ka uagu básura erere luagu?

14 Úatiña gürigia harumatiña,

ua hagía maduruntiña.

15 Míchugun lumuti lafiñen ni íbini hawagu ánheligu,

íbini sielu wíyeti ligibugiñe lagu,

16 gúbumeti gürigia, ha mabuidunbaña,

ha adügübaña wuribani kéigubeirügü latuniwa duna.

17 Aganbabána, nariñaga aban katei bun

le nasubudirubei lau le winwan náalibei ubouagu,

18 aban katei le harufudahan chu tau woun.

Hámagiñe hagüchagu hafurendeirei,

19 ha meha únbaña lichugúa múa,

ha meha úabaña terencha hadan.

20 Chátiti habagari gürigia ha gáñibaña

ani hanarime hagía,

ani buin haña lau idiheri.

21 Aganbatiña areinchuni le alouchagüdütiña.

Dan le chóuruguatima hamá houngua,

ligía hábürühan híwerutiña hawagun.

22 Memenigintiña lesefuruniña lídangiñe luburiga,

anuhein aban gusiñu agurabaha táfaruniña hilagubei.

23 Héigibei wadubi hágubu;

subudi hamuti luagu máranina lan hagünrinchagun.

24 Lanufudedagüdübaña luburiga,

lábürühaba idiheri luma lamiselu hawagun,

ítara kei dan le lageindagun aban urúei wuriburugu!

25 Ligía asuseredubei houn ha iñurutiña háhabu luagun Bungiu,

ha álugutiña hawuribuhan luma Suntigabafu.

26 Mabuchahatiña, daruguatiña hougua lau aban idáü,

aba hachüüragun houngua luagun Bungiu.

27 Pántaburiti hagu,

gimuga tugía hanigi.

28 Lerederuba uburugu burí

le ñein lubéi meha haganóua lidan günringuaü;

terederuba giñe burí muna úouga aganóutiña tidan,

luéidigia tárigirugu ligíaba eredera.

29 Marisinbaña luagu saragu dan,

maweinamunme hafulasun ubouagu.

30 Siñabei hesefurun luéi luburiga,

ítara haba kei aban nadü to lágudun watu gemeti táhüchagun,

odi to lan láhulun garabali ufulurin.

31 Mafiñera hamá sunsuinagubei luagu eyeedúni,

lugundun eyeerawagunirügüba habiha.

32 Lásaürüba lilimun lubaragiñe dan,

ani máhüchagunhalime.

33 Ítara haba kei aban tídibu beibei le máfunadati lin,

kei aban oliwu le achagaruti lílewe.

34 Madügawagunbaña gürigia ha wuribabaña,

tagudúba haban to burí harisidagüdüboun lau igaburi wíyeti.

35 Dageinañanu lau wuribani,

mabunuruni hagaraüdübei;

eyeeraguni ñǘbuinbei hádangiñe.