1 Aba lóunabun Hobu lariñaga:

2 Chóuruti luagu huguya lan adimurehabei

luéigiñe hóubadina lílana fulasu,

ani dan lanme hóunwegun, úaalime lichú aau!

3 Gama lumoun, au, anihein giñe gunfurandaü nidan

ani mǘnabuntina huéi lidan ni kata.

Kagia ibidiñehabubei lun sun le?

4 Lau sun madurun nan,

ani aganbaléi meha Bungiu nayumuragun lidan amu dan,

éherahatiña numadagu nau.

5 Ha chóuruguabaña houngua,

barǘ hamutiña ha gudemebaña kei ni kata,

da hamutiña giñe ha héiguamemeeñabaña.

6 Buiti dan houn híwerutiña hábiñe,

darangilati habagaridun ha anabagubalin Bungiu,

haritaguatiña luagu háhaburuguñein lan.

7 Álügüdabaña animaalugu hama dunuru,

gayaraabei harufudahan bun.

8 Gayaraati giñe bariñagun lun múa

luma houn úduraü ha baranahabaña lun harufudahan bun.

9 Aniheingua funagia gürigia le ibidiñeti lun

luagu ladüga lan Bungiu sun katei lau lúhabu?

10 Lúhaburuguñein habagari sun ha wínwanbaña.

11 Arigeirugu aganbubalin dimurei,

ítara kei iyumulugu lan asandirubalin liguini éigini.

12 Hámañein wéiyaaña mutu lichú aau;

rúhali harumudiri gunfurandaü houn.

13 Gama lumoun chuti lau Bungiu, ani gabafuti,

saminati kaba lan ladüga, lárigiñe aba ladügüni.

14 Katei le lagünrinchagubei Bungiu,

úati ni aban lunya laranseruni;

le ladaüragüdün Bungiu,

úati ni aban lun lesefuruni.

15 Anhein leredera Bungiu huya,

lamabeiduba sun katei;

anhein láhuyagüda labuinchuba ubóu.

16 Ru lumuti lubafu agañeiruni lun.

Súnwandan lábugiñeñanu lan lubafu Bungiu

dandu ha eyeedúabaña kei ha eyeehabaña.

17 Adügati lun heferidiruni chu tau lichú hau

lǘlügüda ligía hau aguseragüdütiña.

18 Ígira lumutiña urúeigu mabafuga,

aba ladügün lun houdin adaürawagúa surusu.

19 Gidá lumutiña fádirigu luéi hafisiute,

ábürügüdalaña ha lídanbaña ubafu.

20 Ígira lumutiña eweridihatiña

ha uágubaña lemenigidúa mererunga,

gidaléi lubuidun ichügü hawéi wéiyaaña mutu.

21 Ruti mebereseni hau lúrudugu,

féridigüdalei here gabafutiña houn.

22 Subudigüda lumuti katei létima aramudaguabei,

sagaléi katei le lídanbei luburiga lábugiñoun larugounga.

23 Gánwoungüda lumutiña lílana fulasu,

aba lagünrinchaguniña:

Chagagua lumutiña gürigia, ábaya lóundaruniña.

24 Gidá lumuti lichú aau hawéi lábutigu aban ageiraü,

aba leferidiragüdüniña lidan aban fulasu mageirawati le mémeriti,

25 le ñein lubéi héibuga lidan luburiga,

atuituiheina kei bacharuatiña.