1 Aganbabéi lubeiti nererun Hobu,

tenibá lun le lunbei nariñaguni bun.

2 Aniheinhali nóunabagüle luagu niyumaaru:

3 Nadimureha lau inarüni

nariñagaali le naritagubei furangu.

4 Bungiu Suntigabafu adügübalina,

aba líchugun ibagari nidoun.

5 Óunababana ánhabu gayara;

aransebá lun bagagibudagun numa.

6 Wagía biángubei,

aban wabu ligibugiñe Bungiu;

lídangiñe giñe múa nadügǘwa.

7 Moun lumuti lubeiti banufudedun nuéi,

ladüga mafosurun nubadibu lau nubafu.

8 Laganóun nun aganba nan bariñagun

(según dimurei le burí naganbubei):

9 «Harumatina ani maduruntina,

úati duru nuagu ni figóu.

10 Gama lumoun áluahati Bungiu líchugun nidurun,

óuseralana kei lágani;

11 rúhali güringüri luagu nugudi,

ani aríaaha lumuti kada aban lídangiñe némeri»

12 gama lumoun marichati katei le bariñagubei,

lugundun wéiriguti Bungiu sügǘ hau gürigia.

13 Ka uagu bíchiga lidurun Bungiu

ariñageina meteni lan lun wekeharun?

14 Adimurehati Bungiu lau saragu luwuyeri

gama lumoun úati gunfuranda wamani.

15 Anihein dan adimurehati áriebu lidan uénedü

dan le arumugaaña gürigia,

lidan hulilihali hadabagu.

16 Adimurehati Bungiu harigeirugun gürigia;

adeinhati houn, buíngüdalaña lau anufudei,

17 lun ladireiruniña luéi luriban housan

luma lun leweridiruniña luéi anaaguni unguaü.

18 Ítara liña lesefuruniña luéi umúahaü,

mígirunti lun hábürühan lidoun óunweni.

19 Anihein dan arufudahati Bungiu houn gürigia lau sandi,

lau burí lanarime gáriti luagu sun hágubu.

20 Ha gagarigubaña malamatiña,

íbini éigini le semeetimabei mínsiñeti houn.

21 Aba agumuchagueina lan hágürügü,

darí lun larihíniwa habu.

22 Láruruguñein umúahaü habagari,

luagu lubenari óunweni.

23 Gama lumoun anhein anihein lubéi aban ánheli harugabu,

aban hadan milu ha adimurehatiña luagu hafulesein,

adimureha ligía luagu húaragun,

24 ha gudemehabutiña houn, ariñaga hagía lun Bungiu:

«Sefubáña lídangiñe óunweni,

darihadina lébuna hesefurun»,

25 ábameti lareidagun hágubu,

ábame ítara hamá kei dan meha nibureingiña.

26 Hayumuraguba lun Bungiu, ábame laganbuniña;

harihubei gürigia hagía ligibu Bungiu,

ábame heremuhan houn gürigia luagu lareini Bungiu.

27 Hariñagame: «Adügatina figóu,

adügatina katei le mabuidunti

gama lumoun máhati Bungiu labeichunina,

28 lubaragiñe lira, séfurügü lumutina luéi óunweni,

ani gayaraagili narihini larugounga».

29 Ítara liña lóuseruniña Bungiu

gürigia saragu wéiyaasu;

30 sefu lumutiña luéi óunweni,

aba lígiruniña lun harihini larugounga le lánina ibagari.

31 Aganbabána, Hobu, tenibá nun;

maniba dan le nadimurehaña lan.

32 Anhein anihein lubéi lunti bariñaguni, óunababana;

anhein richá bubéi, nánharuba lun lau sun nugundan;

33 gama lumoun anhein maricha lubéi le lunbei bariñaguni, maniba,

aganbabána, ábame narufudahan bun lun lachuudun bau.