1 Ariha naali sun le lau nagu,

aganba naali lau narigei.

2 Le hasubudirubei, subudi numuti giñe;

mǘnabuntina huéi lidan ni kata.

3 Gama lumoun himei numuti nadimurehan luma Bungiu,

himei numuti luma lan Suntigabafu nasigeneha.

4 Huguya darugua humuti inarüni lau iyeeni;

surusia ha magaranihantiña ni ka un huguya.

5 Lúndügü hamuga hámanichun,

hásügürüña hamuga kei gürigia chu tau!

6 Fuleseihabu humá nun,

aganba huméi le lunbei nariñaguni.

7 Haritaguatün funagia luagu lúmagiñebadün lan Bungiu lau hiyeeni,

ani luagu seriwi humá lun lau burí dimurei le lánina iyeeni?

8 Rúguaadün hungua luéigiñe lóubadina,

ani busentün hageindaguni likesin,

9 gama lumoun kábagia asusereda

anhein lariha Bungiu ida hiña lan?

Gayaraabei funagia heyeeduni kei leyeedun aban gürigia?

10 Anhaün íchaagua hungua luéigiñe lóubadina,

lúnrügü hariñagun lúmagiñeñadün lan, hanarimebei lébechunün.

11 Labuinchagüdübadün luéirigun Bungiu

lau lueirin-agei anufudei.

12 Ítara liña dimurei le ídanbei hachoururagua hungua kei kaliki;

kéigubeirügü hamuga habusenrun haramudagun lidan baríeiru lauti múa.

13 Guentoti, maní humá, nadimureha,

meberesegúnga kaba lan asusereda nun!

14 Meberesegúntina anhein neferidira nibagari,

ni ánhana agagibudagua luma óunweni.

15 Íbini láfarunina Bungiu,

deregüdagu luba nafiñen luagu,

lúnrügü narufuduni niricha ligibugiñe.

16 Gayaraati lídanñein lan katei le nesefurun,

ladüga mebelubei hamuga aban gürigia wuribati liñúarürugun.

17 Teni humá lubeiti nun,

aganba humaamugei le lunbei nariñaguni.

18 Nadimureha nuéigiñegua,

ani subudi numuti luagu lídanñadina lan niricha.

19 Anhein anihein lubéi lunti líchugun nidurun,

nerederuba maniñu, ábame nounwen.

20 Ruba biánrügü katei nun, Bungiu,

ani maramudagunbadina buéi.

21 Hebé babeichunina,

ani masandiragüdabana saragu anufudei.

22 Waba nun, ábame nóunabunibu:

Nadimureha furumiñe,

lárigiñe ábame bóunabunina.

23 Ariñagabéi nun, ka lan nifigounbei

luma ka lan nidurunbei?

24 Ka uagu baramudagua nuéi?

Ka uagu bóuserana kei aban ágani?

25 Ítara niña kei aban ubanaü áhamaha garabalirugu,

ka uagu babusenra bagünrinchagunina?

Ítara niña kei sagadi sáühali,

ka uagu béibaahana?

26 Barüina biña nidurun búmagua,

busentibu nafayeihan luagu figóu

le nadügübei lidan nibureingidina.

27 Gürá bumuti nugudi lau güringüri,

aríagua bumuti sun némeri,

aríaahabei giñe sun nugudárigi.

28 Agumuchagueina liña núgubu

kei aban katei le ñalaali,

kei daüguaü to heigin hamutiri.