1,2 Gaguraasunbá murusun, narufudaha bun,

ladüga aniheingua lubuidun-agei dimurei numa

luagu lufulesein Bungiu.

3 Nayusuraali lueirin nisubudin lun

narufuduni luagu richá lan Nubungiute.

4 Chouru numuti bun luagu mariñagunbádina lan

ni kata le mama ligia;

anihán aban chu tau buiti bigibugiñe.

5 Gabafuti Bungiu, wéiriti lichú lau,

ani manügün lumutiña ha madurunbaña kei ni kata.

6 Úati feruduna lani habagari wuribatiña,

gama lumoun ru lumuti haricha gudemetiña houn.

7 Góunigi lumutiña gürigia úaraguatiña súnwandan;

derebugugüda lumutiña urúeigu luagu lálana harúeihan,

ágüdahalaña lidan ubaraü íñuti.

8 Gama lumoun ánhaña agürawagúa lau güringüri

ani aba lasufuriragüdüniña gáriti,

9 arufuda lumuti Bungiu wuribati le hadügübei houn

luma ida liña lan hígiraguagüdün houngua lun anaaguni unguaü.

10 Adimurehati houn lun larufudahan houn

amuriaha ligía hama lun hígiruni hariban.

11 Ánhaña adüga gasu lau,

buídubei lidin houn lidan sun habagari.

12 Gama lumoun ánhaña madügün gasu,

ábürühatiña lidoun umúahaü

ani aba hóunwegun lidan libidiounigan aau.

13 Buíntiña wuribatiña lau igañi,

ani ni anhein hadaürǘña lubéi mamuriahantiña híderawagun.

14 Hilaguatiña nibureinñu hagía,

lau aban igaburi nibusigarídünati lagumucha habagari.

15 Gama lumoun arufudahati Bungiu woun lau asufuriruni,

yusuléi idiheri lun gunfurandagüda lániwa.

16 Sefu lumutibu giñe Bungiu lídangiñe denchaü,

aba líchugun saragu katei bun luma esefuruni;

buíngüda lumuti bidabulan lau éigini semeeti.

17 Buagu lagunfulira lasiadirun le wuribabei,

ani siñabei bagidaragun bungua

luéi baguserawagüdün luma basiadirúniwa.

18 Góunigibatia, márügüdabatia seinsu lun bésegeruni irichaü

mígiraba lun bagañeirúniwa lau liibe seinsu.

19 Lidan bidiheri, meseriwínbei bagúarahan bun,

ni sun bubafu.

20 Mayumahabá lachülürün áriebu

le ídanbei lagünrinchawagúa burí néchani.

21 Houchabá magiribudún ban lun wuribani,

buguya le hóuchagua láalibei súfuri.

22 Arihabá lun óunwenbu lubafu Bungiu!

Ka gayaraabei lagumadihan buidu kei ligía?

23 Siñati lariñagun ni aban lun Bungiu

ka lan lunbei ladügüni,

ni ladeinhan lun luagu ladügün wuribani.

24 Sun gürigia adimurehatiña buidu luagu le hadügübei,

haritaguabá giñe badimurehan buidu luagu le hadügübei.

25 Sun gürigia gayaraati harihini le

ladügübei Bungiu íbini dísegiñe.

26 Wéiriguti Bungiu darí lun siñá lan gunfuranda wamani;

siñati giñe wabahüdüni lirumudiri.

27 Iñuragüda lumuti lédedehan duna,

lárigiñe aba ladügüni húyame.

28 Ésehati huya lídangiñe dúeri,

aba lábürühan guran hawagun gürigia.

29 Ka gunfurandabalin ka lan uagu lánhingichunbei dúeri,

odi ka lan uagu ladürühanbei wayuhuru sielu?

30 Tulé lumuti Bungiu labirihaniga ligibuagu barana,

aba lerederun liluligan aramudañu.

31 Ítara liña léigagüdüniña lílana fulasu,

ru ligía saragu éigini houn.

32 Ragǘ lumuti labirihaniga lúhaburugu,

aba ladagarun le ñein lumuti lariñaga lun.

33 Adimurehati wayuhuru luagu Bungiu,

ayanuhati luriban dan luagu ligañi.