1,2 Lun hamuga gayara lan lamisurahóun lihürü

sun násügürün lidan aban balansu,

3 hǘrüti hamuga sügǘ lau lisagounte barana.

Ligía lébubei nadimurehan lau anarimeni.

4 Charú laaru Suntigabafu ligimaran nuagu,

ani éibuga lumuti tupeisinin sun núgubu.

Buíngüda láadina Bungiu lau

anufudei lau le ladügübei nun.

5 Agúarahati funagia burigü,

anhein geigin lubéi?

Odi amuuhati bágasu dan le geigin lan?

6 Kagia éigibei aban éigini

hamuñati míchuga salu lidoun?

Kagia luguinibei aban katei mesemeeti?

7 Gama lumoun le meha katei le maha nubéi neigin,

ligía néigibei guentó.

8 Líchigeidügü hamuga Bungiu le namuriahabei luma nun;

lagunfulireidügü hamuga le nayumahabei nun!

9 Busentina hamuga lun lagumuchaguagüdüni

Bungiu nibagari!

10 Lau hamuga sun lanarime igarigu lira,

ábanbei hamuga óunwenbu gurasu nun,

lugundun súnwandan inebe lan lilurudun

Bungiu le sándubei nun.

11 Úaali erei nuagu lun nawandun,

mébunaali giñe nasigirun abagarida.

12 Héretina funagia kei dübü?

Odi lauti buronse núgubu?

13 Siñaguaadina nungua,

ani úati kaba lan íderaguana.

14 Umadaü le asufuriruti, hínsiñewati,

íbini lidan múaran lan ligaburi ligibugiñe Suntigabafu.

15 Gama lumoun huguya numadagu,

charaadün nun, kei duna amabeiduti.

16 Dagumeti laragachun duna

mígisiguañu lau yelu luma niewe;

17 gama lumoun lásügürün yelu

aba lamabeidun lísensen duna,

liabin lárouga aba lagumuchun duna.

18 Adügatiña lun hadireirun saragu gürigia luéi hémeri,

lun hawanserun lídangiñe fulasu mageirawati lun hóunwegun.

19 Áluaha hamuti burí saragu gürigia ha Temaagiñetiña

hama ha Sebaagiñetiña duna ligía lau emenigini,

20 gama lumoun dan le hachülürün lumoun madaritiña ni kata

aba herederun lau saragu magundani.

21 Ítara hiña giñe nun:

Ariha humuti lanarime gádantina

aba hasandirun anufudei.

22 Gama lumoun au, mamuriahantina ni kata huma,

ni lun hafayeihan seinsu lun hesefurunina,

23 ni lun hesefurunina hawéi áganiñu,

ni lun hesefurunina háhaburugugiñe wuribatiña.

24 Harufudaha nun,

ábame nerederun maniñu:

Arufuda huméi nun ka lan bulíeiguaü le nadügübei.

25 Úati amaharuti lun aban katei le richabei;

gama lumoun huguya, rúhadün nidurun mébunouga.

26 Adimurehatün luagu nererun,

dimurei málati le lanügün garabali.

27 Ganigitün lun háhurerun lau libagari aban méteñuhali,

alugura humeime giñe humada guánarügü!

28 Ariha humá nigibuagun guentó;

hariñageime nun anhein neyeehaña lubéi.

29 Ariñaga humá hiyeeni lan le hariñagubei

mítaranla múaragun humá,

anha humá luagu lídanñadina lan niricha.

30 Haritaguatün funagia luagu aban lan yeeti

le mefenbei luagu le lariñagubei au?