1,2 Ídaba san lásura hadimurehan gürigia ha?

Lun hamuga gayara lan haganbunina,

gayaraati hamuga wayanuhan.

3 Ka uagu wouserúa kei animaalu,

barüwa wagía kei ibidiougua tau?

4 Haritaguatibu san lerederuba lan múa málouga

luágurügü bélechuni bura lau bigañi,

odi lasansiruba lan lubara dübü?

5 Léñeguchuba hagemeri gürigia ha wuribabaña,

megemedigiaalime giñe háleme.

6 Léñeguchuba halanpun;

marugoungadunhalime hábiñe.

7 Mederebugubéi héibugun,

ábame hábürühan tidoun hasadaran guánarügü.

8 Tichugúba aban seni habá,

le ñéingiñe lubéi hásügüra,

ábame hadahiragun tidan.

9 Lesetirúba aban gúrudu lubá hagudi,

ábame lámurudagun geyegua lau hamurugute.

10 Aramudañu tuba sádara habá luagu üma

lun tárügüdüniña danme hásügürün.

11 Sanditiña anufudei lidan sun fulasu,

sanditiña kamá héibaahouña sun oura.

12 Lagumuchuña here ladüga ilamaü,

sétiñu liña lamiselu lun lábürühan hawagun.

13 Sandi ligía liraübei óunweni le hínsiñetimabei lun

léigiñeinti hágürügü murusun murusun.

14 Gidawatiña giñe lídangiñe darangilaü le hábiñebei,

barüwa hagía aduruhóueina ligibugiñoun lurúeite anufudei.

15 Béwatu haban;

túagua tuguya lau súfuru.

16 Ítara haña kei aban tídibu wewe

le sáühali tílagüle luma tilimun.

17 Gumuti laritawagún hawagun ubouagugiñe,

miridúnwadigiaali hiri.

18 Lagurúba lídangiñe larugounga lun lidoun luburiga;

habugúba ubouagugiñe.

19 Madügawagunbaña lidan fulasu le ñein lubéi haganóua;

úabei ni aban tílana haban erederutiña wínwanñu.

20 Danme hasubudiruni hasinun

lidan oubaü le ñéingiñe lubéi laboucha weyu,

luma le ñéingiñe lubéi lálüda,

halouchuba, habuinchuba lau anufudei.

21 Ítara liña lagumuchun habagari gürigia wuribatiña,

gürigia ha íchugutiña mebereseni lau Bungiu.