1 Aba lariñagun Hobu lun Bungiu:

2 Subudi numuti luagu gayara bani sun katei

ani úa lan ni kata básiñarun adüga.

3 Kátañadinagia lun lalouguaduba lan nafiñen luagu le badügübei,

arufudei libidiounigan nau lau lira?

Nadimurehaña meha luagu burí katei le úati gunfuranda nani,

lubuidun burí katei le násiñarubei gunfuranda.

4 Ariñagatibu nun: «Aganba bana,

busentina nadimurehan bun;

óunababei álügüdahani burí le nun».

5 Aganbaharügütina meha buagu,

gama lumoun guentó ariha náadibu lau nagu.

6 Nibusigaritina luagu sun le ariñaga náalibei,

ligía nasakürihanbei,

ñun lidan kaliki luma baligi.

7 Lárigiñe lariñaguni Bungiu katei burí le lun Hobu, aba giñe lariñagun lun Elifási:

—Wéiriti nigañi buma luma hama biángubei bumadagu, ladüga mariñagun humani inarüni nibügürü kei ladügüni Hobu le nubúein. 8 Guentó, barǘ humá sedü bágasu wügüriña hama sedü gábara, ábame hidin arihei Hobu, ábame hadagaragüdün le gudawarügüti huougua. Lafurieiduba Hobu huagu, ani neresibirubei lafurieidun, ábame madügün nan wuribati hun, lau sun yebe gadüna humani ladüga mariñagun humani inarüni nibügürü kei ladügüni Hobu.

9 Aba lidin Elifási, Bilüdádü luma Sofarü, adügei le lariñagubei Bungiu houn, aba leresibiruni Bungiu lafurieidun Hobu.

10 Lárigiñebei lafurieidun Hobu hawagu lumadagu, aba láguyugüdüni Bungiu sun le buga leferidirubei Hobu lun lárigoun, dóbuli luéi le buga lúmabei furumiñe áugiñe. 11 Ábati houdin sun líbirigu bisidei, lumadagu hama binadu lasubudiragun, aba hadügün aban adineruni lúbiñe. Aba hámalihani luagu lamiselu le burí buga lóunahabei Bungiu lun, aba líchugun kada aban hádangiñe seinsu lun, luma aban bagü golu.

12 Biní lumuti Bungiu Hobu lidan lagumuhóun lirumudiri sügǘ lau meha furumiñeti. Katorusuñanu-milu lilügüniña mudún, sisi-milu kameyu, milu feru bulu bágasu anaahatiña ilaü hama milu mile. 13 Garahüñüti giñe katorusu wügüriña hama ǘrüwa würiña. 14 Hemimá tíribei to íbugañaü, Kesia to habiaman, Keren-apuku to háürüwan. 15 Lidan sun ubóu, úatiña bugaha würiña buíduburitiña kei lirahüñü Hobu. Aba líchuguni háguchi lirisin houn úara hama hábirigu.

16,17 Wínwanti Hobu san-gádürü-wein irumu lárigiñe, aba lounwen dan le wéiyaali saragu, ariha lumutiña libañan, lílawagu hama laguragu.