1 Füramasehadina núniwagua

lun mawamadirun nániña nírügü würiña ha mámarigiña.

2 Kagia afayeiruahaü líchugubei Suntigabafu

siélugiñe lun kada gürigia?

3 Ma funagia lun wuribati

luma gafigounti yu lan lamiselu?

4 Odi marihin lumuti Bungiu le nadügübei,

meteni ligía lun kada aban lídangiñe néibugun?

5 Fiñutina luagu madügüngidina lan ni kata lau luriban aritaguni,

mouchun au neyeedun ni aban.

6 Ánhana lamisuraha Bungiu lidan balansu richati,

larihubei luagu madurun nan!

7 Anhein díreihadina lubéi luéi üma le surubei,

anhein ígiraguagüdaadina lubéi nungua lun igaaduaü,

anhein dariwaali lubéi hamegen amu gürigia numa,

8 hou haméi amu le nábunagubei,

hulá haméi lau sun lílagüle.

9 Anhein ígiraguagüdaadina lubéi nungua

lun tagañeirunina aban würi,

odi aríaaha naaru lan lúmari nubesinan,

10 barǘ hamóun amu númari lun hadamunme,

roun hagíame terencha tuma.

11 Lugundun mabuidunti hamuga le nadügübei,

yuuti hamuga lun nabeichúniwa luéigiñe.

12 Ítara liña hamuga kei aban gudáü

le agünrinchaguti sun le númati.

13 Dan meha hamuriahan numusuniña somu katei numa,

súnwandan meha níchuguni le hamuriahabei houn.

14 Ida liña hamugagia narufudagun nungua

ligibugiñe Bungiu?

Kaba hamugagia nóunabagüle lun danme lálügüdagunina?

15 Ábanmeme Bungiu adügübaliwa turageirugu wáguchu,

aba líchugun ibagari dandu houn, keisi nun.

16 Súnwandan meha níderaguniña gudemetiña lau le hemegeirubei,

mígiruntina lun háfagun hilaaña úmari ilamaü.

17 Méigintina meha nábugua,

súnwandan nafanreinraguni hama ha méteñuhañabaña.

18 Súnwandan meha nóuseruniña méteñuhaña keisi nisaanigu;

súnwandan nóunigiruniña würiña hilaaña úmari.

19 Dan le meha narihin lounwe lan gürigia ladüga madaüragun lan,

o lidan ua lan ni kata luma aban gudemeti lun ladouragun laugua,

20 bachaguagüda numuti lau guánarügü houra nilügüniña mudún,

ábaha leteingirunina.

21 Anhein meha óuseragua nubéi aban méteñuhali,

luéigiñerügü gabafu nan hawagu aguseragüdütiña,

22 Áhalahouala narüna, anhein adüga nubalin lira,

hulawagualá négewagugiñe.

23 Hanufudetina meha luéi labeichunina Bungiu;

násiñaruñein hamuga luéirigun awanda!

24 Manügünñaha nágili golu lébuname nemenigin

luma nachoururagun nungua.

25 Manügünñaha nágili lueirin irisini

odi lagañeirun saragu seinsu lébuname lubuidun nidaani.

26 Ariha naali ladurangun weyu,

luma lawanserun hati lau sun luenden,

27 gama lumoun máhuduraguntina houn aramudaguarügü

machüühan nuguya chuti houn lau núhabu.

28 Lun hamuga adüga nani figóu lira,

lunti hamuga nabeichún luéigiñe lira;

ítara liña hamuga kei neyeedagun lau Bungiu le siélubei.

29 Magundaarunñahagidina lau hasufurirun náganiñu,

magundaarun au giñe lau halamiserun.

30 Míñaragun numutiña,

mayumahan au óunweni houn.

31 Dan le lálugun aban hádangiñe ha aganóubaña numa

ladügün wuribati lun aban terencha,

32 mígirun numuti meha lun lásügürüni áriebu bóugudi,

súnwandan nadaaruni tubenari nuban houn chülüdügütiña.

33 Maramudun numuti nidurun kei hadüga amu,

máfaagun au lun nadouragun lau,

34 le nanufude hawéi gürigia.

Meredegidina darugu bena nau lidan límaniga

le nanufude luéi híchugun niduheñu mebereseni nau.

35 Naganbúadügü hamuga!

Ya lébeda nayanuhan nuéigiñegua;

guentoti, óunabalana Suntigabafu!

Abürühaléi nágani nidurun,

36 nanügübei númagua lau pantaü;

nadaürübei kei ridi.

37 Nafayeihaba luagu sun le nadügübei lun Bungiu,

nayarafaduba liñúarürugun Bungiu lau inebesei.

38 Magúarahanti burí numúan sielun kóntüra au,

mayahun ligía lárigiñe lagarabawaguniwa.

39 Ladüga anhein íweruha naali lubéi lalubahan amu,

anhein amudiragua naaña lubéi ábunagutiña,

40 hüchala hiiyu numúanrugu teweñegua türigu,

luma híduru wuribati teweñegua sebada!

Ya lagumucha layanuhan Hobu.