1 Anihein burí fulasu lábugiñe múa

le ñéingiñe lubéi lasagarúa pülata,

luma burí fulasu le ñein lubéi lafinuhóua golu.

2 Lídangiñe múa lasagarúa gürabu,

lau larürüdagun dübü aba lasaliragun kóbüre.

3 Gumuguagüda laali gürigia luburiga;

rariti lidoun lilulin-agei burí fulasu

áluaha dübü ñein lidan luburiga.

4 Ayudeigu hagía, dibiñu luagu aban gúrudu,

chigatiña fulasu lábugiñe múa

lidan burí fulasu le maganóunwati ñein,

le ñéingiñe lumuti másügürün hamá gürigia,

dise luéi uburugu.

5 Íñugiñe libiti múa hüchatu türigu,

ǘnabugiñe kamá hamuga mígisiguañu liña luma watu gemeti.

6 Anihein dübü wéndeti ñein

luma golu laganagua múa.

7 Ni burí ágila ibidiñeti fulasu ligía houn,

ni guriguri marihin hamagili burí üma ligía.

8 Másügürüntiña animaalu hanarimetiña ñéingiñe,

ni liñún madügüragun hamuti üma ligía.

9 Ru hamuti gürigia háhabu luagu dübü le deretimabei,

aba háhuluni wübü lau sun lílagüle.

10 Adügatiña huyu luagu burí dübü

aba hadarirun sun luwuyeri irisini,

11 achíaha hamuti burí fulasu le ñein lubéi láhücha duna

aba hasagaruni irisini aramudaguati le ñeinbei.

12 Gama lumoun, halíagiñe san liabin lichú aau?

Ka idan fulasu ladarirúa lualin ichügü?

13 Ibidiñeti lebegi houn gürigia,

madari hamuti giñe ya ubouagu.

14 Lariñaga barana:

«Úati ya, mama númañein».

15 Siñati lagañeihóuniwa lau golu,

ni giñe lau pülata.

16 Siñati lagañeihóun lichú aau lau golu le buítimabei

ni lau dübü wéndeti kei burí ágata o safiru.

17 Gebegiti sügǘ lau golu luma lifinun-agei bídiriu;

siñati lasansirun luagu katei lauti golu le fínutimati.

18 Buítimati lichú aau sügǘ lau golu würiti,

dübü wéndeti luma burí pérüla.

19 Buiti sügǘ lau dübü wéndeti le kürisólitu le Etiopíabei,

siñati lafayeirun lau golu le fínutimabei.

20 Halíagiñeti liabin lichú aau?

Ka san luwuyeri fulasu ñein lubéi lualin ichügü?

21 Aramudañu liña luéi harihin animaalu gáñitiña,

luma hawéi dunuru ha siélubaña.

22 Íbini günringuaü luma óunweni ariñagatiña:

«Aganbarügütiwa luagu».

23 Gama lumoun subudi lumuti Bungiu lémeri lichú aau,

ligíarügüñein subudi halía lan ladarirúa,

24 ladüga, ariha lumuti íbini lagumuhóun larigeirugu ubóu

luma sun katei le lábugiñebei sielu.

25 Dan le líchugunbalin Bungiu lébeha lere garabali,

ru ligía lébeha duna,

26 dan le líchugunbalin lilurudun huya

arufudaléi lémeri guran,

27 ariha lumuti giñe lichú aau,

ariha lumuti lebegi le richabei,

houcha lumuti aba lariñagun luagu buidu lan.

28 Aba lariñagun Bungiu houn gürigia:

Eseriwiduni lun Bungiu lau úaraguni,

ligía lichú aubei;

ladireirúniwa luéi wuribani,

ligía luálinbei ichügü.