1,2 Garichati san lira bun, Hobu,

bariñagun luagu lunti lan líchuguni Bungiu richaguaü bun?

3 Lugundun ariñagaadibu lun Bungiu:

«Kámegia buma ánhana afigouha?

Kagia wuribati ladügübei nifigoun bun?»

4 Nóunabaadibuti hau sun bumadagu.

5 Ariaguabéi sielu,

arihabéi lueirin liñun dúeri buéi.

6 Ánhabu afigouha,

madügüntibu wuribati lun Bungiu lau lira;

ka lan yebe liibe figóu badüga,

madügüntibu ni kata lun.

7 Anhein buidu bóuserun,

míchutibu ni kata lun lau;

madügüntibu ni murusun buiti lun lau lira.

8 Houn wügüriña kei buguya ladüga bifigoun wuribani,

hagía giñe únbaña ladüga bubuidun buiti.

9 Dan le lábugiñeñanu lan lidere dan gürigia,

wáguatiña, áluaha hagía kaba lan esefuraña

lábugiñegiñe habafu ha íchugubaña lidere dan houn;

10 gama lumoun máluahan hamuti Bungiu le adügübaliña,

le íchugubei erei lidan lanarime-agei luburiga.

11 Le arufudahabei woun sügǘ hau animaalugu áraabuna,

chúgüda ligía wau sügǘ hau dunuru.

12 Wáguatiña gama lumoun móunabun lumutiña Bungiu,

lugundun wügüriña wuribatiña hagía,

barügua hagía houngua.

13 Madügünti Bungiu Suntigabafu

gasu lau marasualugu.

14 Lau sun ariñaga ban luagu marihinbani Bungiu,

agurababéi, lugundun anihein bikesin liñúarü.

15 Ariñagatibu luagu magañidun lan

ani mabeihan ligía,

luagu maweirin lan letenirun lun figóu.

16 Gama lumoun, Hobu, badimurehaña katei málati,

badimurehaña saragu ani ibidiñeti bun ka lan bariñagubei!